ನಟಿ ತ್ವಿಶಾ ಶರ್ಮಾ ನಿಗೂಢ ಸಾವು: ತಲೆಮರೆಸಿಕೊಂಡಿದ್ದ ಪತಿ ಪ್ರತ್ಯಕ್ಷ; 7 ದಿನಗಳ ಪೊಲೀಸ್ ಕಸ್ಟಡಿಗೆ ಆದೇಶಿಸಿದ ಭೋಪಾಲ್​ ಕೋರ್ಟ್​! Twisha Sharma

ಭೋಪಾಲ್​: ದೇಶದಾದ್ಯಂತ ಸಂಚಲನ ಸೃಷ್ಟಿಸಿರುವ ನಟಿ ತ್ವಿಶಾ ಶರ್ಮಾ (Twisha Sharma) ಸಾವಿನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪತಿ ಸಮರ್ಥ ಸಿಂಗ್ (Samarth Singh) ನನ್ನು ಏಳು ದಿನಗಳ ಪೊಲೀಸ್​ ಕಸ್ಟಡಿಗೆ ನೀಡುವಂತೆ ಭೋಪಾಲ್​ ನ್ಯಾಯಾಲಯ ಶನಿವಾರ (ಮೇ.23) ಆದೇಶಿಸಿದೆ.

ಮೇ. 12 ರಂದು ತ್ವಿಶಾ ಶರ್ಮಾ ಸಾವನ್ನಪ್ಪಿದ ದಿನದಿಂದ ಕಣ್ಮರೆಯಾಗಿದ್ದ ಸಮರ್ಥ ಸಿಂಗ್​ ನಿನ್ನೆ (ಮೇ.22) ಭೋಪಾಲ್​ ನ್ಯಾಯಾಲಯಕ್ಕೆ ಶರಣಾಗಿದ್ದು, ಈಗ ಏಳು ದಿನಗಳ ಮಟ್ಟಿಗೆ ಪೊಲೀಸರ ವಶದಲ್ಲಿರಲಿದ್ದಾನೆ.

ಕಳೆದ ಮೇ 12 ರಂದು ಭೋಪಾಲ್‌ನ ಕತಾರಾ‌ ಹಿಲ್ಸ್‌ನಲ್ಲಿರುವ ತನ್ನ ಪತಿಯ ಮನೆಯಲ್ಲಿ ತ್ವಿಶಾ ಶರ್ಮಾ ಶವವಾಗಿ ಪತ್ತೆಯಾಗಿದ್ದರು. ಮರುದಿನವೇ ಅಂದರೆ ಮೇ 13 ರಂದು ಮೊದಲ ಮರಣೋತ್ತರ ಪರೀಕ್ಷೆ ನಡೆದಿತ್ತು. ಆದರೆ, ಈ ಮೊದಲ ವರದಿಯಲ್ಲಿ ಹಲವು ಅನುಮಾನಾಸ್ಪದ ಅಂಶಗಳು ಹೊರಬಂದಿವೆ.

ಅಷ್ಟೇ ಅಲ್ಲದೆ ತ್ವಿಶಾಳ ಪತಿ ಹಾಗೂ ಅತ್ತೆ (ಗಂಡನ ತಾಯಿ) ತನ್ನ ಮಗಳಿಗೆ ವರದಕ್ಷಿಣೆ ಸಂಬಂಧ ನಿರಂತರ ಕಿರುಕುಳ ನೀಡುತ್ತಿದ್ದರು. ನನ್ನ ಮಗಳು ಆತ್ಮಹತ್ಯೆ ಮಾಡಿಕೊಳ್ಳುವಷ್ಟು ದುರ್ಬಲ ಮನಸ್ಥಿತಿಯವಳಲ್ಲ. ನಮ್ಮ ಮಗಳ ಕೊಲೆ ನಡೆದ ಬಗ್ಗೆ ಅನುಮಾನವಿದೆ ಎನ್ನುವುದು ತ್ವಿಶಾಳ ಪಾಲಕರ ವಾದವಾಗಿದೆ.

ತ್ವಿಶಾಳ ಕುಟುಂಬ ವರ್ಗ ಮೊದಲು ನಡೆದಿರುವ ಮರಣೋತ್ತರ ಪರೀಕ್ಷೆಯಲ್ಲಿ ನಂಬಿಕೆವಿಲ್ಲ ಎಂಬ ವಾದಕ್ಕೆ ಒಪ್ಪಿಗೆ ನೀಡಿರುವ ನ್ಯಾಯಾಲಯ ಎರಡನೇ ಮರಣೋತ್ತರ ಪರೀಕ್ಷೆ ನಡೆಸಲು ಸೂಚಿಸಿದೆ.

ಈ ಮರಣೋತ್ತರ ಪರೀಕ್ಷೆಯನ್ನು ಏಮ್ಸ್​ ದೆಹಲಿಯ ನಾಲ್ಕು ವೈದ್ಯರ ತಂಡ ನಡೆಸಲಿದ್ದು, ದೆಹಲಿಯಿಂದ ವೈದ್ಯರು ಭೋಪಾಲ್​ಗೆ ತೆರಳಿದ್ದಾರೆ. ನಮ್ಮ ವೈದ್ಯ ತಂಡ ಇಂದು (ಮೇ.23) ಆಧುನಿಕ ಉಪಕರಣಗಳೊಂದಿಗೆ ಭೋಪಾಲ್​ ತಲುಪಲಿದ್ದು ಆದಷ್ಟು ಬೇಗ ಮರಣೋತ್ತರ ಪರೀಕ್ಷೆ ನಡೆಸಿ ವರದಿಯನ್ನು ಹೈಕೋರ್ಟ್​ಗೆ ನೀಡಲಿದ್ದೆವೆ ಎಂದು ದೆಹಲಿ ಏಮ್ಸ್‌ನ ವಿಧಿವಿಜ್ಞಾನ ವಿಭಾಗದ ಮುಖ್ಯಸ್ಥ ಡಾ. ಸುಧೀರ್ ಗುಪ್ತಾ ತಿಳಿಸಿದ್ದಾರೆ,(ಏಜನ್ಸೀಸ್​).