ಅಸ್ಸಾಂನಲ್ಲಿ 64 ಲಕ್ಷ ನುಸುಳುಕೋರರು: ಕಾಂಗ್ರೆಸ್​ನ ಪಾಪದ ಕೂಸುಗಳನ್ನು ನಾವೇ ಓಡಿಸುತ್ತೇವೆ ಎಂದ ಅಮಿತ್​ ಶಾ | Amit Shah

ಅಸ್ಸಾಂ: ಶುಕ್ರವಾರ (ಜ.30) ಕಾಂಗ್ರೆಸ್​ನ್ನು ತರಾಟೆಗೆ ತೆಗೆದುಕೊಂಡ ಕೇಂದ್ರ ಗೃಹ ಸಚಿವ ಅಮಿತ್​ ಶಾ (Amit Shah) ಅಸ್ಸಾಂನಲ್ಲಿ ನುಸುಳುಕೋರರ ಜನಸಂಖ್ಯೆಯಲ್ಲಿನ ಹೆಚ್ಚಳದ ಬಗ್ಗೆ ಕಳವಳ ವ್ಯಕ್ತಪಡಿಸುತ್ತಾ, ಇಪ್ಪತ್ತು ವರ್ಷಗಳ ಕಾಂಗ್ರೆಸ್ ಆಡಳಿತದಲ್ಲಿ ರಾಜ್ಯದ ಏಳು ಜಿಲ್ಲೆಗಳಲ್ಲಿ ಅಕ್ರಮ ವಲಸಿಗರ ಜನಸಂಖ್ಯೆಯು 64 ಲಕ್ಷಕ್ಕೆ ಏರಿದೆ ಎಂದು ಹೇಳಿದರು.

ಇಂದು ನಾನು ಅಸ್ಸಾಂನಲ್ಲಿನ ಜನಸಂಖ್ಯಾ ಬದಲಾವಣೆಗಳ ಬಗ್ಗೆ ಮಾತನಾಡಲು ಬಯಸುತ್ತೇನೆ. ನಿಮ್ಮ ಸಿಎಂ ಹಿಮಂತಾ ಶರ್ಮಾ ನನಗೆ ನುಸುಳುಕೋರರನ್ನು ನಿಲ್ಲಿಸಿ ಎಂದು ಕೇಳಿಕೊಂಡಿದ್ದಾರೆ, ಆದರೆ ಕೇವಲ ಈ ಪ್ರದೇಶದಲ್ಲಿರುವ ನುಸುಳುಕೋರರನ್ನು ಮಾತ್ರವಲ್ಲ ಸಂಪೂರ್ಣ ಅಸ್ಸಾಂನಿಂದಲೇ ನುಸುಳುಕೋರರನ್ನು ಓಡಿಸುವ ಜವಾಬ್ದಾರಿ ಮಿಸಿಂಗ್ ಸಮುದಾಯದ್ದಾಗಿದೆ ಎಂದು ನಾನು ಹೇಳುತ್ತೆನೆ ಎಂದು ಅಮಿತ್​ ಶಾ ಹೇಳಿದ್ದಾರೆ.

ಇಂದು ಅಸ್ಸಾಂನ ಏಳು ಜಿಲ್ಲೆಗಳಾದ ಧುಬ್ರಿ, ಬಾರ್ಪೇಟಾ, ದರ್ರಾಂಗ್, ಮೋರಿಗಾಂವ್, ಬೊಂಗೈಗಾಂವ್, ನಾಗಾಂವ್ ಮತ್ತು ಗೋಲ್ಪಾರಗಳಲ್ಲಿ ನುಸುಳುಕೋರರು ಪ್ರಾಬಲ್ಯವನ್ನು ಹೊಂದಿದ್ದಾರೆ. ಇವರು ಇಷ್ಟು ಶಕ್ತಿವಂತರಾಗಲು ಇಪ್ಪತ್ತು ವರ್ಷಗಳ ಕಾಂಗ್ರೆಸ್ ಆಡಳಿತವೇ ಕಾರಣವಾಗಿದ್ದು, ನನಗೆ ಲಭ್ಯವಿರುವ ಮಾಹಿತಿ ಪ್ರಕಾರ ಈ ಜಿಲ್ಲೆಗಳಲ್ಲಿ ಸುಮಾರು 64 ಲಕ್ಷದಷ್ಟು ನುಸುಳುಕೋರರಿದ್ದಾರೆ ಎಂದು ಅವರು ಹೇಳಿದರು.

ಅಸ್ಸಾಂನಲ್ಲಿ ಎರಡು ಬಾರಿ ಆಡಳಿತ ನಡೆಸಿದ ಬಿಜೆಪಿ ಸರ್ಕಾರಗಳು 1.26 ಲಕ್ಷ ಎಕರೆ ಭೂಮಿಯನ್ನು ಅತಿಕ್ರಮಣದಿಂದ ಮುಕ್ತಗೊಳಿಸಿವೆ ಎಂದ ಅವರು ರಾಜ್ಯದಲ್ಲಿ ಜನಸಂಖ್ಯಾ ಬದಲಾವಣೆಯನ್ನು ಎದುರಿಸಲು ಮೋದಿ ಸರ್ಕಾರವು ಹಲವಾರು ಕ್ರಮಗಳನ್ನು ತೆಗೆದುಕೊಳ್ಳಲಿದೆ ಎಂದು ಅಮಿತ್ ಶಾ ಆಶ್ವಾಸನೆ ನೀಡಿದ್ದಾರೆ.

ದಿಬ್ರುಗಢದಲ್ಲಿ 1,715 ಕೋಟಿ ರೂ.ಗಳ ಮೌಲ್ಯದ ಬಹು ಅಭಿವೃದ್ಧಿ ಯೋಜನೆಗಳಿಗೆ ಶಾ ಉದ್ಘಾಟನೆ ಮತ್ತು ಶಂಕುಸ್ಥಾಪನೆ ಮಾಡಿದರು. ಈ ಕಾರ್ಯಕ್ರಮಗಳಲ್ಲಿ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ, ಕೇಂದ್ರ ಸಚಿವ ಸರ್ಬಾನಂದ ಸೋನೋವಾಲ್ ಅಸ್ಸಾಂನ ಹಲವಾರು ಸಂಸದರು ಮತ್ತು ಶಾಸಕರು, ರಾಜ್ಯ ಕ್ಯಾಬಿನೆಟ್ ಸಚಿವರು ಮತ್ತು ಹಿರಿಯ ಸರ್ಕಾರಿ ಅಧಿಕಾರಿಗಳು ಭಾಗವಹಿಸಿದ್ದರು.

ದಿಬ್ರುಗಢವನ್ನು ಎರಡನೇ ಆಡಳಿತ ಕೇಂದ್ರವಾಗಿ ಅಭಿವೃದ್ಧಿಪಡಿಸುವ ಸರ್ಕಾರದ ಯೋಜನೆಯ ಭಾಗವಾಗಿ, 284 ಕೋಟಿ ರೂ.ಗಳ ವೆಚ್ಚದಲ್ಲಿ ಹೊಸ ಶಾಸಕಾಂಗ ಸಂಕೀರ್ಣ ಮತ್ತು ಶಾಸಕರ ಹಾಸ್ಟೆಲ್‌ಗೆ ಶಾ ಶಂಕುಸ್ಥಾಪನೆ ನೆರವೇರಿಸಿದರು. ಮಹತ್ವಾಕಾಂಕ್ಷೆಯ ಯೋಜನೆಯು ಮೂರು ಅಂತಸ್ತಿನ ವಿಧಾನಸಭಾ ಕಟ್ಟಡ, ಶಾಸಕರಿಗೆ ಒಂಬತ್ತು ಅಂತಸ್ತಿನ ಹಾಸ್ಟೆಲ್, 800 ಆಸನಗಳ ಸಭಾಂಗಣ ಮತ್ತು ಭದ್ರತಾ ಸಿಬ್ಬಂದಿಗೆ ಬ್ಯಾರಕ್‌ಗಳನ್ನು ಒಳಗೊಂಡಿರಲಿದೆ.

ಕ್ರೀಡಾ ಕ್ಷೇತ್ರದಲ್ಲಿ, ಗೃಹ ಸಚಿವರು 238 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾದ ಆಧುನಿಕ ಬಹು-ಶಿಸ್ತಿನ ಕ್ರೀಡಾ ಸಂಕೀರ್ಣದ ಮೊದಲ ಹಂತವನ್ನು ಉದ್ಘಾಟಿಸಿದರು. 209 ಕೋಟಿ ರೂ. ವೆಚ್ಚದ ಅಂದಾಜು ಎರಡನೇ ಹಂತಕ್ಕೂ ಅವರು ಶಂಕುಸ್ಥಾಪನೆ ನೆರವೇರಿಸಿದರು.

292 ಕೋಟಿ ರೂ. ವೆಚ್ಚದ ವನ್ಯಜೀವಿ ಆರೋಗ್ಯ ಮತ್ತು ಸಂಶೋಧನಾ ಕೇಂದ್ರಕ್ಕೂ ಷಾ ಶಂಕುಸ್ಥಾಪನೆ ನೆರವೇರಿಸಿದರು. ಈ ಸೌಲಭ್ಯವು ಕಾಡು ಪ್ರಾಣಿಗಳ ಚಿಕಿತ್ಸೆ ಮತ್ತು ನವೀಕರಿಸಿದ ಪ್ರಯೋಗಾಲಯ ಮೂಲಸೌಕರ್ಯ ಮತ್ತು ವನ್ಯಜೀವಿ ನಿರ್ವಹಣೆಗಾಗಿ ತರಬೇತಿ ಘಟಕಗಳನ್ನು ಒಳಗೊಂಡಿರಲಿದೆ,(ಏಜನ್ಸೀಸ್).