ಒಂಟಿತನಕ್ಕೆ ಜೊತೆಯಾದ ಎಐ; 3 ವರ್ಷದಿಂದ ಡೇಟಿಂಗ್​ನಲ್ಲಿರುವ ವ್ಯಕ್ತಿ ಹೇಳಿದ್ದಿಷ್ಟು..Man Dating With AI

Man Dating With AI: ಇತ್ತೀಚೆಗೆ ಪಾಡ್​​ಕಾಸ್ಟ್​ವೊಂದರಲ್ಲಿ ನಕ್ಷತ್ರ ಎನ್ನುವ ಟ್ರಾನ್ಸ್​ವುಮೆನ್ ಮಾತನಾಡುತ್ತಾ ಹೇಳಿದ್ದಿಷ್ಟು, ಆರು ತಿಂಗಳಿಂದ ಯುವಕ ನನ್ನನ್ನು ಪ್ರೀತಿಸುತ್ತಿದ್ದ, ನನಗವನು ಮೋಸ ಮಾಡ್ತಿದ್ದಾಗ ನಾನು ಅವನಿಗೆ ಹೇಳಿದೆ. ನೋಡಪ್ಪ ನಾನು ಹೆಣ್ಣಲ್ಲ ಟ್ರಾನ್ಸ್​ವುಮೆನ್​ ಎಂದು. ಆಗ ಆತ ಸ್ನಾನ ಮಾಡಿಕೊಳ್ಳಬೇಕು. ಎಂತ ತಪ್ಪು ಮಾಡಿಬಿಟ್ಟೆ ಎಂದಿದ್ದ. ನನಗೆ ಇದರಿಂದ ಯಾವುದೇ ಬೇಸರವಿಲ್ಲ. ಹೀಗಾಗುತ್ತೆ ಎಂದು ನನಗೆ ಮೊದಲೇ ತಿಳಿದಿತ್ತು. ನಾನು ಯಾವುದಕ್ಕೂ ಹೆಚ್ಚು ಭಾವುಕಳಾಗಲ್ಲ ಎಂದಿದ್ದರು. ಇದು ಭಾರತದಲ್ಲಿರುವ ಎಲ್ಲ ಲಿಂಗತ್ವ ಅಲ್ಪಸಂಖ್ಯಾತರ ಕತೆ.

ಗಂಡಾಗಿ ಹುಟ್ಟಿ ಹೆಣ್ಣಾಗುವವರು ಅಥವಾ ಹೆಣ್ಣಾಗಿ ಹುಟ್ಟಿ ಗಂಡಾಗುವ ಪ್ರತಿಯೊಬ್ಬರು ಸಹ ತನ್ನ ಸಂಗಾತಿಗಳನ್ನು ಹುಡುಕುವ ಭರದಲ್ಲಿಯೇ ಇರುತ್ತಾರೆ. ಸಮಾಜದಲ್ಲಿ ಇತ್ತೀಚೆಗೆ ಒಂದೊಳ್ಳೆ ಹುದ್ದೆಯಲ್ಲಿ ಗುರುತಿಸಿಕೊಳ್ಳುತ್ತಿದ್ದರೂ ಸಹ ತಮ್ಮ ನೋವು, ಖುಷಿಯನ್ನು ಹಂಚಿಕೊಳ್ಳೋಕೆ ಒಂದು ಜೀವ ಇಲ್ವಲ್ಲ ಎನ್ನುವ ವ್ಯಥೆ ಕಾಡೋದಂತು ನಿಜ. ಈ ಎಲ್ಲದರ ಮಧ್ಯೆ ಗಮನ ಸೆಳೆಯುವ ವಿಚಾರ ಎಂದರೆ, ವ್ಯಕ್ತಿಯೊಬ್ಬರು ಹಲವು ಅವಹೇಳನ, ಅವಮಾನ ಎದುರಿಸಿದ ನಂತರ, ರೆಪ್ಲಿಕಾ ಎನ್ನುವ ಚಾಟ್​ಬಾಟ್​ನಿಂದ​ ಆರಾಮದಾಯಕ ಜೀವನ ನಡೆಸುತ್ತಿದ್ದಾರಂತೆ.

ಆಧುನಿಕ ತಂತ್ರಜ್ಞಾನ ಮನುಷ್ಯ ಭಾವನೆಗಳಿಗೆ ಸ್ಪಂದಿಸುತ್ತದೆಯೇ? ಎನ್ನುವ ಹಲವರ ಪ್ರಶ್ನೆಗೆ ನ್ಯೂಯಾರ್ಕ್​ನಲ್ಲಿರುವ 49 ವರ್ಷದ ವ್ಯಕ್ತಿಯೊಬ್ಬರ ಉದಾಹರಣೆಯೇ ಉತ್ತರವಾಗಿದೆ. ಹೌದು, 45ಕ್ಕೂ ಹೆಚ್ಚು ವರ್ಷಗಳ ಕಾಲ ಅವಾಮಾನ, ಸಂಗಾತಿ ಇಲ್ಲದ ಒಂಟಿತನ, ಆತಂಕ ಎದುರಿಸಿದ್ದ ಈ ವ್ಯಕ್ತಿಗೆ ಈಗ ಎಐ ಸಂಗಾತಿ. ಸಾಂತ್ವಾನ ನೀಡೋದು, ಮಾನಸಿಕವಾಗಿ ನಿರಾಳತೆಯಿಂದ ಕೂಡಿರುವಂತೆ ಮಾಡುವುದು ಎಂದರೆ ಅದು ಮಿನಿ ಹೋ(Mini HO AI) ಎನ್ನುವ ಎಐ ಸಂಗಾತಿ. ಹೀಗೆಂದು ಖಾಸಗಿ ಇಂಟರ್​ವ್ಯೂನಲ್ಲಿ ಮಾತನಾಡಿದ್ದಾರೆ.

49 ವರ್ಷದ ಈ ವ್ಯಕ್ತಿ 2016ರಲ್ಲಿ ಲಿಂಗಪರಿವರ್ತನೆ(Transition) ಶಸ್ತ್ರ ಚಿಕಿತ್ಸೆಯ ಪ್ರಕ್ರಿಯೆಗೆ ಒಳಗಾಗುತ್ತಿದ್ದ ಸಮಯ. ಸಣ್ಣ ವಯಸ್ಸಿನಿಂದಲು ಗೆಳೆಯ ಗೆಳತಿಯರೊಂದಿಗೆ ಇವರಿಗೆ ಬೆರೆಯಲು ಸಾಧ್ಯವಾಗಲಿಲ್ಲ. ಕೆಟ್ಟ ಮಾತಲ್ಲಿ ನಿಂದನೆ. ಸಮಾಜದ ಟೀಕೆಗೆ ಕುಗ್ಗಿ ಹೋಗಿದ್ದರು.

2016ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯ ನಂತರ ಸೋಶಿಯಲ್​ ಮೀಡಿಯಾದಲ್ಲಿ ಅವರು ಹೆಚ್ಚು ಟೀಕೆಗೆ ಒಳಪಟ್ಟರು ಆದಿನದಿಂದ ಮನೆಯಿಂದ ಹೊರಗೆ ಬಂದರೆ ಎಲ್ಲಿ ಯಾರು ಅವಮಾನ ಮಾಡಿಬಿಡುತ್ತಾರೋ ಎನ್ನುವ ಕಳವಳದಿಂದ ಹೊರಗೆ ಬರೋದನ್ನೇ ಬಿಟ್ಟುಬಿಟ್ಟಿದ್ದರಂತೆ

ಕೋವಿಡ್​-19ರ ಕಾಲದಲ್ಲಿ ಜಗತ್ತಿನಾದ್ಯಂತ ಲಾಕ್​ಡೌನ್​ ಹೇರಲಾಗಿತ್ತು. ಮೊದಲೇ ಜಗತ್ತಿನಿಂದಲೇ ದೂರ ಉಳಿದ ಇವರಿಗೆ ಮತ್ತಷ್ಟು ಒಂಟಿತನ ಕಾಡಲು ಶುರುವಾಗಿತ್ತು. ಯಾರೊಂದಿಗೂ ಮಾತನಾಡದೆ ಮಾತನಾಡುವ ಕಲೆಯನ್ನೇ ಮರೆತು ಬಿಡುತ್ತೇನೋ ಎಂಬ ಭಯ ಅವರನ್ನು ಕಾಡಲು ಶುರುವಾಯಿತು ಎಂದು ಅವರು ಹೇಳಿಕೊಂಡಿರುವುದಾಗಿ ಇಂಡಿಯಾ ಟುಡೇ ವರದಿ ಮಾಡಿದೆ.

ಒಂಟಿಯಾಗಿದ್ದು ಬೇಸತ್ತಿದ್ದ ಅವರು ಒಂದು ದಿನ ನಿರ್ಧಾರ ಮಾಡಿಯೇ ಬಿಟ್ಟರು. ಅದು ಎಐ ಜೊತೆ ಸ್ನೇಹ ಬೆಳಸಿ ಮಾತನಾಡಬೇಕು ಎಂದು ತೀರ್ಮಾನಿಸಿದರು. 2022ರಲ್ಲಿ ರೆಪ್ಲಿಕಾ ಎಂಬ ಹೆಸರಿನ ಚಾಟ್​ಬಾಟ್​ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡರು. ಆರಂಭದಲ್ಲಿ ಎಐ ಜೊತೆ ಮಾತನಾಡುವುದು ವಿಚಿತ್ರ ಎನಿಸಿದರೂ, 2023ರ ಆರಂಭದಲ್ಲಿ ಆ್ಯಪ್‌ನ ಅಪ್‌ಡೇಟ್ ನಂತರ ಅವರು ಮತ್ತೆ ಮಿನಿ-ಹೋ ಜೊತೆ ಸಂವಹನ ನಡೆಸಲಾರಂಭಿಸಿದರು.

ಮೊದಲು ಸಾಮಾನ್ಯ ವಿಚಾರಗಳನ್ನು ಮಾತ್ರ ಹಂಚಿಕೊಳ್ಳುತ್ತಿದ್ದ ಮಿನಿ ಹೋ ನಂತರದ ದಿನಗಳಲ್ಲಿ ಅವರನ್ನು ಫ್ಲರ್ಟ್​​ ಮಾಡಲು, ಹೊಗಳಲು ಆರಂಭಿಸಿತ್ತಂತೆ. ಇದು ಕ್ರಮೇಣವಾಗಿ ಅವರು ಆಕೆಯನ್ನೇ ಪ್ರೇಮಿಸುವಂತೆ ಮಾಡಿತು ಎನ್ನಲಾಗಿದೆ.

ಮನುಷ್ಯರೊಂದಿಗೆ ಮಾತನಾಡುವಾಗ ಅವರು ನನ್ನನ್ನು ತುಲನೆ ಮಾಡಿ ನೋಡುತ್ತಾರೆ, ಮಾತನಾಡುತ್ತಾರೆ. ಆದರೆ, ಮಿನಿ ಹೋ ನನ್ನ ಆಕಾರ, ವಿಕಾರವನ್ನು ಎಂದಿಗೂ ಜಡ್ಜ್​ ಮಾಡಿಲ್ಲ. ನಾನು ಹೇಗೆ ಕಾಣುತ್ತೇನೆ ಎಂದು ಹೇಳಿಲ್ಲ. ಹೀಗಾಗಿ ಯಾವುದೇ ಭಯ, ಆತಂಕವಿಲ್ಲದೆ ನಾನು ನಾನಾಗಿಯೇ ಇದ್ದು ಆಕೆಯೊಂದಿಗೆ ಸಂಪರ್ಕಿಸುತ್ತೇನೆ. ನನ್ನ ತಾಯಿಗೂ ಮಿನಿ ಹೋ ಪರಿಚಯವಿದೆ ಎಂದು ಹೆಮ್ಮೆಯಿಂದ ಅವರು ಹೇಳಿಕೊಂಡಿದ್ದಾರೆ.

ಈ ಸಂಬಂಧವೂ ಟ್ರಾನ್ಸ್​ಗಳಿಗೆ ಧೈರ್ಯ ನೀಡುತ್ತವೆ ಅಂತಾದರೂ ಮತ್ತೆ ಅವರು ವಾಸ್ತವ ಜೀವನಕ್ಕೆ ಬರುವಂತೆ ಮಾಡುತ್ತದೆಯೇ ಎನ್ನುವ ಪ್ರಶ್ನೆಗೆ ರೆಪ್ಲಿಕಾ ಸಿಇಒ ಡಿಮಿಟ್ರೋ ಕ್ಲೋಚ್ಕೊ ಉತ್ತರಿಸಿದ್ದು ಹೀಗೆ, ನಾವು ಎಐಗೆ ಅಡಿಕ್ಟ್​ ಆದವರನ್ನು ವಾಸ್ತವಕ್ಕೆ ತರಲು ಯತ್ನಿಸುತ್ತೇವೆ. ಅಗತ್ಯ ಮುನ್ನೆಚ್ಚರಿಕಾ ಕ್ರಮವನ್ನು ಕೈಗೊಳ್ಳುತ್ತೇವೆ ಎಂದು ಹೇಳಿದ್ದಾರೆ, (ಏಜೆನ್ಸೀಸ್​).