ಇರಾನ್​ ಆಡಳಿತ ವ್ಯವಸ್ಥಿತವಾಗಿ ಪುಡಿಪುಡಿ.. ಅಮೆರಿಕ-ಇಸ್ರೇಲ್ ಜಂಟಿ ಕಾರ್ಯಾಚರಣೆಯ ಸಕ್ಸಸ್ ಸ್ಟೋರಿ ಬಿಚ್ಚಿಟ್ಟ ನೆತನ್ಯಾಹು | Benjamin Netanyahu

ಪಾಸ್ಓವರ್ ಹಬ್ಬಕ್ಕೂ ಮುನ್ನ ಸಾರ್ವಜನಿಕರನ್ನು ಉದ್ದೇಶಿಸಿ ಹೀಬ್ರೂ ಭಾಷೆಯಲ್ಲಿ ಮಾತನಾಡಿದ ನೆತನ್ಯಾಹು, ಯಹೂದಿ ರಾಷ್ಟ್ರಕ್ಕೆ ಎದುರಾಗಿದ್ದ ಅಸ್ತಿತ್ವದ ಅಪಾಯಗಳನ್ನು ಯಶಸ್ವಿಯಾಗಿ ನಿವಾರಿಸಲಾಗುತ್ತಿದ್ದು, ಇರಾನಿನ ಆಡಳಿತವು ಕುಸಿಯುವುದು ಖಚಿತ ಎಂದು ಭವಿಷ್ಯ ನುಡಿದಿದ್ದಾರೆ.

ಇರಾನ್ ಒಡ್ಡುತ್ತಿರುವ ಸಾಮೂಹಿಕ ಬೆದರಿಕೆಯನ್ನು ಎದುರಿಸಲು ಇಸ್ರೇಲ್ ಪ್ರಾದೇಶಿಕವಾಗಿ ಪ್ರಮುಖ ದೇಶಗಳೊಂದಿಗೆ ಹೊಸ ಮೈತ್ರಿಗಳನ್ನು ರೂಪಿಸಿಕೊಳ್ಳುತ್ತಿದೆ ಎಂದು ಹೇಳಿರುವ ನೆತಾನ್ಯಾಹು, ಈ ಕುರಿತು ಹೆಚ್ಚಿನ ವಿವರಗಳನ್ನು ಶೀಘ್ರದಲ್ಲೇ ಬಹಿರಂಗಪಡಿಸುವುದಾಗಿ ಭರವಸೆ ನೀಡಿದ್ದಾರೆ. ಈ ಸ್ವಾತಂತ್ರ್ಯ ಹಬ್ಬದ ಮುನ್ನಾದಿನದಂದು ಇಸ್ರೇಲ್ ಎಂದಿಗಿಂತಲೂ ಬಲಶಾಲಿಯಾಗಿದೆ. ಇಡೀ ಜಗತ್ತು ನಮ್ಮ ಸಿಂಹ ಘರ್ಜನೆಯನ್ನು ಕೇಳುತ್ತಿದೆ. ನಾವು ಇಂದು ಮಿಲಿಟರಿ ಯಶಸ್ಸು ಪಡೆದಿದ್ದು, ಅದಕ್ಕೆ ಸೈನಿಕರ ಬಲಿದಾನಗಳು ಕಾರಣವಾಗಿವೆ ಎಂದು ವಿಷಾದ ವ್ಯಕ್ತಪಡಿಸಿದ್ದಾರೆ.

ಅಮೆರಿಕದೊಂದಿಗಿನ ಜಂಟಿ ಕಾರ್ಯಾಚರಣೆಯ ಒಂದು ತಿಂಗಳ ಪ್ರಗತಿಯನ್ನು ಮೆಲುಕು ಹಾಕಿದ ನೆತನ್ಯಾಹು, ದಶಕಗಳಿಂದ ಅಮೆರಿಕ ಮತ್ತು ಇಸ್ರೇಲ್‌ಗೆ ಸಾವು ಎಂದು ಕೂಗುತ್ತಿದ್ದ ಭಯೋತ್ಪಾದಕ ಆಡಳಿತವನ್ನು ಹಂತಹಂತವಾಗಿ ಹತ್ತಿಕ್ಕಲಾಗುತ್ತಿದ್ದು, ಅಯತೊಲ್ಲಾಗಳ ಆಡಳಿತವು ಮಧ್ಯಪ್ರಾಚ್ಯವನ್ನು ವಶಪಡಿಸಿಕೊಳ್ಳಲು ಮತ್ತು ಪರಮಾಣು ಶಕ್ತಿ ಹಾಗೂ ಬ್ಯಾಲಿಸ್ಟಿಕ್ ಕ್ಷಿಪಣಿಗಳ ಮೂಲಕ ಜಗತ್ತಿಗೆ ಬೆದರಿಕೆ ಹಾಕಲು ಪ್ರಯತ್ನಿಸುತ್ತಿದೆ ಎಂದು ಅವರು ಗಂಭೀರ ಆರೋಪ ಮಾಡಿದ್ದಾರೆ.

ಈ ಎಲ್ಲ ಕೊಲೆಗಾರ ಮಹತ್ವಾಕಾಂಕ್ಷೆಗಳಿಗಾಗಿ ಇರಾನ್ ಕಳೆದ ಕೆಲವು ವರ್ಷಗಳಲ್ಲಿ ಸುಮಾರು ಒಂದು ಟ್ರಿಲಿಯನ್ ಡಾಲರ್‌ಗಳಷ್ಟು ಹಣವನ್ನು ವ್ಯಯಿಸಿದೆ. ಆದರೆ ಆ ಹಣವೆಲ್ಲಾ ಈಗ ಚರಂಡಿ ಪಾಲಾಗಿದೆ ಎಂದು ನೆತನ್ಯಾಹು ವ್ಯಂಗ್ಯವಾಡಿದ್ದಾರೆ.

ಇಸ್ರೇಲ್ ಪ್ರಸ್ತುತ ದುಷ್ಟತೆಯ ಅಕ್ಷದ ವಿರುದ್ಧ ಅಂತಹದೇ ಹೋರಾಟ ನಡೆಸುತ್ತಿದ್ದು, ಗಾಜಾದಲ್ಲಿ ಹಮಾಸ್, ಲೆಬನಾನ್‌ನಲ್ಲಿ ಹಿಜ್ಬೊಲ್ಲಾ, ಸಿರಿಯಾದಲ್ಲಿ ಅಸ್ಸಾದ್ ಸರ್ಕಾರ, ಯೆಮೆನ್‌ನಲ್ಲಿ ಹೌತಿಗಳು ಮತ್ತು ಜುಡಿಯಾ-ಸಮರಿಯಾದಲ್ಲಿನ ಉಗ್ರಗಾಮಿಗಳ ವಿರುದ್ಧದ ದಾಳಿಗಳನ್ನು ಅವರು ಈ ಸಂದರ್ಭದಲ್ಲಿ ಪಟ್ಟಿ ಮಾಡಿದ್ದಾರೆ. ಇರಾನ್ ವಿರುದ್ಧದ ಕ್ರಮಗಳಲ್ಲಿ ಪ್ರಮುಖವಾಗಿ ಅವರ ಪರಮಾಣು ಕಾರ್ಯಕ್ರಮ, ಕ್ಷಿಪಣಿ ಕೇಂದ್ರಗಳು, ಆಡಳಿತದ ಮೂಲಸೌಕರ್ಯ ಮತ್ತು ಇರಾನಿನ ಹಿರಿಯ ನಾಯಕತ್ವಕ್ಕೆ ನೀಡಿರುವ ಭಾರಿ ಹೊಡೆತಗಳನ್ನು ನೆತನ್ಯಾಹು ತಮ್ಮ ಭಾಷಣದಲ್ಲಿ ಪ್ರಮುಖವಾಗಿ ಉಲ್ಲೇಖಿಸಿದ್ದಾರೆ(ಏಜೆನ್ಸೀಸ್​​).