ದ್ವೇಶ ಬಿಟ್ಟು ದೇಶ ಕಟ್ಟಬೇಕು.... ಒಗ್ಗಟ್ಟಿನ ಮಂತ್ರ ಜಪಿಸಿದ ರೆಹಮಾನ್ ...ಬಾಂಗ್ಲಾ ಹಿಂದೂಗಳಿಗೂ ಸಿಗಲಿದೆಯೇ ಅಭಯ..? | Tarique Rahman

ಶನಿವಾರ ತಮ್ಮ ಎಕ್ಸ್​ ಖಾತೆಯಲ್ಲಿ ಪೋಸ್ಟ್‌ ಹಂಚಿಕೊಂಡಿರುವ ರೆಹಮಾನ್, ತಮಗೆ ದೊರೆತ ಆತ್ಮೀಯ ಸ್ವಾಗತಕ್ಕಾಗಿ ಎಲ್ಲರಿಗೂ ಧನ್ಯವಾದ ಅರ್ಪಿಸಿದರು. ತಮಗೆ ಮತ್ತು ತಮ್ಮ ಕುಟುಂಬಕ್ಕೆ ನೀಡಿದ ಗೌರವ ಮತ್ತು ಪ್ರೀತಿಯನ್ನು ಪದಗಳಲ್ಲಿ ವ್ಯಕ್ತಪಡಿಸಲು ಸಾಧ್ಯವಿಲ್ಲ ಎಂದಿರುವ ಅವರು, ತಮ್ಮೊಂದಿಗೆ ಧೃಢವಾಗಿ ನಿಂತ ಬಿಎನ್‌ಪಿ ಕಾರ್ಯಕರ್ತರನ್ನು ಶ್ಲಾಘಿಸಿದರು.

ಬಾಂಗ್ಲಾದೇಶದಾದ್ಯಂತ ಇರುವ ಪ್ರಿಯ ಸ್ನೇಹಿತರೇ, ಸಹೋದರಿಯರೇ, ಸಹೋದರರೇ, ಕಳೆದ ಗುರುವಾರ ನನ್ನ ಹೃದಯದಲ್ಲಿ ಶಾಶ್ವತವಾಗಿ ಉಳಿಯುವ ದಿನ, 17 ವರ್ಷಗಳ ಬಳಿಕ ನಾನು ನನ್ನ ತಾಯ್ನಾಡಿನ ಮಣ್ಣಿಗೆ ಮರಳಿದ ದಿನ ಎಂದು ಪೋಸ್ಟ್ ಮಾಡಿದ್ದಾರೆ. ನೀವು ಕೋರಿದ ಆ ಸ್ವಾಗತ ಕ್ಷಣ, ಢಾಕಾದ ರಸ್ತೆಗಳಲ್ಲಿನ ಆ ಜನ ಸಮುದ್ರ ಮತ್ತು ಲಕ್ಷಾಂತರ ಜನರ ಪ್ರಾರ್ಥನೆಗಳನ್ನು ಎಂದಿಗೂ ಮರೆಯುವುದಿಲ್ಲ ಎಂದು ಬರೆದುಕೊಂಡಿದ್ದಾರೆ.

ನಾಗರಿಕ ಸಮಾಜದ ಸದಸ್ಯರು, ಯುವಕರು, ವೃತ್ತಿಪರರು, ರೈತರು, ಕಾರ್ಮಿಕರು ಮತ್ತು ಎಲ್ಲಾ ಹಂತದ ನಾಗರಿಕರಿಗೆ, ಬಾಂಗ್ಲಾದೇಶದ ನಿಜವಾದ ಶಕ್ತಿ ಯಾವಾಗಲೂ ಆ ದೇಶದ ಜನರಲ್ಲಿದೆ, ಒಗ್ಗಟ್ಟಿನಿಂದ ಇರುತ್ತದೆ ಎಂದು ನಮಗೆ ನೆನಪಿಸಿದ್ದಕ್ಕಾಗಿ ಧನ್ಯವಾದಗಳು ಎಂದು ಅವರು ಹೇಳಿದರು.

ಫೆಬ್ರವರಿ 12 ರಂದು ನಡೆಯಲಿರುವ ಬಾಂಗ್ಲಾದೇಶದ ಸಂಸತ್ ಚುನಾವಣೆಗೆ ಮುಂಚಿತವಾಗಿ ರೆಹಮಾನ್ ಬಾಂಗ್ಲಾದೇಶಕ್ಕೆ ಮರಳಿದ್ದಾರೆ. 2008 ರಲ್ಲಿ ಸ್ವಯಂ ಗಡಿಪಾರು ಆರಂಭಿಸಿದ ರೆಹಮಾನ್, ಮುಂಬರುವ ಚುನಾವಣೆಯಲ್ಲಿ ತಮ್ಮ ಪೂರ್ವಜರ ಬೊಗುರಾ ಸದರ್ (ಬೊಗುರಾ-6) ಕ್ಷೇತ್ರದಿಂದ ಸ್ಪರ್ಧಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ(ಏಜೆನ್ಸೀಸ್​).