ನಂಬಿಕೆಗೆ ಅರ್ಹವಲ್ಲ ಪಾಕ್​: ಅಮೆರಿಕ-ಇರಾನ್ ಸಂಧಾನದ ಮಧ್ಯಸ್ಥಿಕೆಗೆ ಇಸ್ರೇಲ್ ತೀವ್ರ ವಿರೋಧ! ಏನಿದು ಹೊಸ ರಾಜತಾಂತ್ರಿಕ ಸಮರ..? Israel

ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಅವರು ಏಪ್ರಿಲ್ 11 ರಂದು ಇಸ್ಲಾಮಾಬಾದ್‌ಗೆ ಭೇಟಿ ನೀಡಿ ಇರಾನ್ ಜೊತೆ ನೇರ ಮಾತುಕತೆ ನಡೆಸಲಿರುವ ಹಿನ್ನೆಲೆಯಲ್ಲಿ ಇಸ್ರೇಲ್‌ನ ಈ ಹೇಳಿಕೆ ರಾಜತಾಂತ್ರಿಕ ವಲಯದಲ್ಲಿ ಸಂಚಲನ ಮೂಡಿಸಿದೆ.

ಈ ಬಗ್ಗೆ ಸುದ್ದಿ ಸಂಸ್ಥೆ ಎಎನ್ಐ ಜೊತೆ ಮಾತನಾಡಿದ ರೂವೆನ್ ಅಜರ್, ನಾವು ಪಾಕಿಸ್ತಾನವನ್ನು ವಿಶ್ವಾಸಾರ್ಹ ಸಂಧಾನಕಾರ ಎಂದು ನೋಡುವುದಿಲ್ಲ. ಅಮೆರಿಕ ತನ್ನದೇ ಆದ ಕೆಲವು ಕಾರಣಗಳಿಗಾಗಿ ಪಾಕಿಸ್ತಾನದ ಸೌಲಭ್ಯಗಳನ್ನು ಬಳಸಿಕೊಳ್ಳಲು ನಿರ್ಧರಿಸಿರಬಹುದು. ಆದರೆ ಇಸ್ರೇಲ್ ದೃಷ್ಟಿಯಲ್ಲಿ ಪಾಕಿಸ್ತಾನದ ಪಾತ್ರ ಪ್ರಶ್ನಾರ್ಹ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇರಾನ್ ಜೊತೆಗಿನ ಕದನ ವಿರಾಮ ಮಾತುಕತೆಯನ್ನು ಇಸ್ರೇಲ್ ಸ್ವಾಗತಿಸಿದೆಯಾದರೂ, ಲೆಬನಾನ್ ವಿಷಯದಲ್ಲಿ ತನ್ನ ದಾಳಿಯನ್ನು ಸಮರ್ಥಿಸಿಕೊಂಡಿದೆ. ಹಿಜ್ಬುಲ್ಲಾ ಉಗ್ರರ ವಿರುದ್ಧದ ಹೋರಾಟವು ಇರಾನ್ ಮಾತುಕತೆಗಿಂತ ಭಿನ್ನವಾಗಿದೆ ಎಂದು ಅಜರ್ ವಿವರಿಸಿದ್ದಾರೆ.

ಹಿಜ್ಬುಲ್ಲಾ ನಿರ್ಮೂಲನೆ: ದಕ್ಷಿಣ ಲೆಬನಾನ್‌ನಲ್ಲಿರುವ ಹಿಜ್ಬುಲ್ಲಾ ಭಯೋತ್ಪಾದಕ ಮೂಲಸೌಕರ್ಯಗಳನ್ನು ಸಂಪೂರ್ಣವಾಗಿ ತೆರವುಗೊಳಿಸುವುದು ಇಸ್ರೇಲ್‌ನ ಪ್ರಮುಖ ಗುರಿಯಾಗಿದೆ.

ಲಿಟಾನಿ ನದಿ ಗಡಿ: ಲಿಟಾನಿ ನದಿಯ ದಕ್ಷಿಣ ಭಾಗದಲ್ಲಿ ಹಿಜ್ಬುಲ್ಲಾ ಉಪಸ್ಥಿತಿಯನ್ನು ಇಸ್ರೇಲ್ ಸಹಿಸುವುದಿಲ್ಲ. ಅವರನ್ನು ನಿಶ್ಶಸ್ತ್ರಗೊಳಿಸುವುದು ಲೆಬನಾನ್ ಸರ್ಕಾರದ ಜವಾಬ್ದಾರಿ ಎಂದು ಅಜರ್​ ಹೇಳಿದ್ದಾರೆ.

ವಾಯುಪಡೆ ದಾಳಿ: ಕಳೆದ ಕೆಲವು ಗಂಟೆಗಳಲ್ಲಿ ಇಸ್ರೇಲ್ ವಾಯುಪಡೆ ನಡೆಸಿದ ಕಾರ್ಯಾಚರಣೆಯಲ್ಲಿ ಸುಮಾರು 250 ಕ್ಕೂ ಹೆಚ್ಚು ಹಿಜ್ಬುಲ್ಲಾ ಉಗ್ರರನ್ನು ಹತ್ಯೆ ಮಾಡಲಾಗಿದೆ ಎಂದು ರಾಯಭಾರಿ ಮಾಹಿತಿ ನೀಡಿದ್ದಾರೆ.

ಅಮೆರಿಕ ನೇತೃತ್ವದ ಈ ಸಂಧಾನವು ಇರಾನ್‌ನಿಂದ ಎದುರಾಗಿರುವ ಎರಡು ಪ್ರಮುಖ ಅಸ್ತಿತ್ವವಾದದ ಬೆದರಿಕೆಗಳನ್ನು ಕೊನೆಗೊಳಿಸಬೇಕು ಎಂಬುದು ಇಸ್ರೇಲ್‌ನ ಆಶಯವಾಗಿದೆ. ಅಲ್ಲದೆ, ಇರಾನ್‌ನ ಪರಮಾಣು ಯೋಜನೆ ಮತ್ತು ಬ್ಯಾಲಿಸ್ಟಿಕ್ ಕ್ಷಿಪಣಿಗಳ ಉತ್ಪಾದನೆಯನ್ನು ಸ್ಥಗಿತಗೊಳಿಸಬೇಕು.

ನಾವು ಅಧಿಕೃತವಾಗಿ ಈ ಕದನ ವಿರಾಮವನ್ನು ಬೆಂಬಲಿಸಿದ್ದೇವೆ. ಅಮೆರಿಕದ ನೇತೃತ್ವದ ಮಾತುಕತೆಗಳು ಒಂದು ಸಕಾರಾತ್ಮಕ ಸೂಚನೆ ಎಂದು ಅಜರ್ ಆಶಾವಾದ ವ್ಯಕ್ತಪಡಿಸಿದ್ದಾರೆ.

ಮತ್ತೊಂದೆಡೆ, ಇರಾನ್ ಈ ಬೆಳವಣಿಗೆಯನ್ನು ಬೇರೆಯದೇ ದೃಷ್ಟಿಕೋನದಲ್ಲಿ ನೋಡುತ್ತಿದೆ. ಲೆಬನಾನ್ ಮೇಲೆ ಇಸ್ರೇಲ್ ನಡೆಸುತ್ತಿರುವ ನಿರಂತರ ದಾಳಿಗಳು ಅಮೆರಿಕ-ಇರಾನ್ ನಡುವಿನ ತಾತ್ಕಾಲಿಕ ಕದನ ವಿರಾಮವನ್ನು ಅಪಾಯಕ್ಕೆ ದೂಡುತ್ತಿವೆ ಎಂದು ಇರಾನ್ ಬುಧವಾರ ಆರೋಪಿಸಿದೆ. ಇಸ್ರೇಲ್‌ನ ಈ ಕೃತ್ಯಗಳು ಮುಂದುವರಿದರೆ ಹೋರ್ಮುಜ್ ಜಲಸಂಧಿಯಲ್ಲಿ ಮತ್ತೆ ಉದ್ವಿಗ್ನತೆ ಉಂಟಾಗಬಹುದು ಮತ್ತು ಒಪ್ಪಂದವು ಮುರಿದುಬೀಳಬಹುದು ಎಂದು ಇರಾನ್ ಎಚ್ಚರಿಸಿದೆ.

ಆದರೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಲೆಬನಾನ್ ಅನ್ನು ಕದನ ವಿರಾಮದ ಭಾಗವಾಗಿ ಪರಿಗಣಿಸಿಲ್ಲ ಎಂದು ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ. ಇದು ಈ ಪ್ರದೇಶದಲ್ಲಿ ಸಂಘರ್ಷದ ತೀವ್ರತೆ ಇನ್ನು ಕೆಲವು ಕಾಲ ಮುಂದುವರಿಯುವ ಸೂಚನೆ ನೀಡುತ್ತಿದೆ,(ಏಜೆನ್ಸೀಸ್).