"ಖಮೇನಿ ಖತಂ, ಇರಾನ್ ಇನ್ನು ನಿಮ್ಮದು!" – ಟ್ರಂಪ್ ಗುಡುಗು; ಇಡೀ ದೇಶಕ್ಕೆ 'ರೆಬೆಲ್' ಕರೆ ನೀಡಿದ ಅಮೆರಿಕ ಅಧ್ಯಕ್ಷ! | Khamenei Death

ಖಮೇನಿ ಅಷ್ಟೆ ಅಲ್ಲದೇ ಅವರ ಅಳಿಯ ಮತ್ತು ಸೊಸೆ ಸಾವನ್ನಪ್ಪಿದ್ದಾರೆ ಎಂದು ಟೆಹ್ರಾನ್ ನಗರ ಮಂಡಳಿಯ ಸದಸ್ಯರನ್ನು ಉಲ್ಲೇಖಿಸಿ ಹಲವಾರು ಮಾಧ್ಯಮ ವರದಿಗಳು ತಿಳಿಸಿವೆ. ಖಮೇನಿ ದೇಹದ ಛಾಯಾಚಿತ್ರವನ್ನು ಟ್ರಂಪ್ ಮತ್ತು ನೆತನ್ಯಾಹು ಅವರಿಗೆ ತೋರಿಸಲಾಗಿದೆ ಎಂದು ಇಸ್ರೇಲ್ ಮಾಧ್ಯಮಗಳು ಹೇಳಿಕೊಂಡಿವೆ.

ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಸಂಘಟಿತ ಮಿಲಿಟರಿ ದಾಳಿಯಲ್ಲಿ ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಸಾವನ್ನಪ್ಪಿದ್ದಾರೆ ಎಂದು ಇರಾನ್‌ನ ರಾಜ್ಯ ಮಾಧ್ಯಮ ಅಧಿಕೃತವಾಗಿ ದೃಢಪಡಿಸಿದೆ. ಟ್ರಂಪ್ ಹೇಳಿಕೆಗಳನ್ನು ಅನುಸರಿಸಿ ತಸ್ನಿಮ್ ನ್ಯೂಸ್ ಏಜೆನ್ಸಿ ಮತ್ತು ಫಾರ್ಸ್ ನ್ಯೂಸ್ ಏಜೆನ್ಸಿಯಂತಹ ಪ್ರಮುಖ ಇರಾನಿನ ಸುದ್ದಿ ಸಂಸ್ಥೆಗಳಿಂದ ಈ ದೃಢೀಕರಣ ಬಂದಿದೆ.

ಇದು ನಿಮ್ಮ ದೇಶವನ್ನು ನೀವು ಮರಳಿ ಪಡೆಯಲು ಸಿಕ್ಕಿರುವ ಅತ್ಯಂತ ದೊಡ್ಡ ಸುವರ್ಣಾವಕಾಶವಾಗಿದ್ದು, ದಶಕಗಳ ಕಾಲ ನೀವು ಸಹಾಯಕ್ಕಾಗಿ ಕೇಳುತ್ತಿದ್ದಿರಿ, ಈಗ ನಿಮ್ಮನ್ನು ರಕ್ಷಿಸುವ ಅಧ್ಯಕ್ಷ ನಿಮ್ಮೊಂದಿಗಿದ್ದಾರೆ ಎಂದು ಇರಾನ್ ಜನತೆಯನ್ನು ಉದ್ದೇಶಿಸಿ ಟ್ರಂಪ್​ ಈ ರೀತಿ ಬರೆದುಕೊಂಡಿದ್ದಾರೆ.

ಈ ದಾಳಿಗೆ ತಕ್ಕ ಪ್ರತಿಕ್ರಿಯೆ ನೀಡುವುದಾಗಿ ಇರಾನ್ ಈಗ ಪ್ರತಿಜ್ಞೆ ಮಾಡಿ, ಕುವೈತ್, ಇರಾಕ್, ಬಹ್ರೇನ್ ಮತ್ತು ಕತಾರ್ ಸೇರಿದಂತೆ ಈ ಪ್ರದೇಶದಲ್ಲಿನ ಅಮೆರಿಕದ ನೆಲೆಗಳನ್ನು ಗುರಿಯಾಗಿಸಿಕೊಂಡಿದೆ. ದುಬೈ ಮತ್ತು ಅಬುಧಾಬಿಯಲ್ಲಿ ಇರಾನಿನ ಕ್ಷಿಪಣಿ ದಾಳಿಗಳು ವರದಿಯಾಗಿದ್ದು, ಇದರಲ್ಲಿ ವ್ಯಕ್ತಿಯೊಬ್ಬ ಸಾವನಪ್ಪಿದ್ದಾನೆ ಎನ್ನಲಾಗಿದೆ.

ಈ ದಾಳಿಗಳು ಗಲ್ಫ್ ರಾಷ್ಟ್ರಗಳಿಂದ ಟೀಕೆಗೆ ಗುರಿಯಾಗಿದ್ದು, ಈ ರೀತಿಯ ದ್ವೇಶವನ್ನು ತಕ್ಷಣವೇ ಕೊನೆಗೊಳಿಸಬೇಕೆಂದು ಕರೆ ನೀಡಿವೆ. ಅನೇಕ ಯುರೋಪಿಯನ್ ರಾಷ್ಟ್ರಗಳು ಸಹ ಸಂವಾದದ ಮೂಲಕ ಈ ಸಂಘರ್ಷವನ್ನು ಪರಿಹರಿಸಬೇಕೆಂದು ಒತ್ತಾಯಿಸಿವೆ. ಮಧ್ಯಪ್ರಾಚ್ಯದ ಪರಿಸ್ಥಿತಿಯ ಬಗ್ಗೆ ಭಾರತ ಕೂಡ ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ಬೆಳವಣಿಗೆಯನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡುತ್ತಿದೆ ಎಂದು ಹೇಳಿದೆ. ಭಾರತವು ಈ ಪ್ರದೇಶದ ತನ್ನ ಎಲ್ಲಾ ನಾಗರಿಕರಿಗೆ ಅನಗತ್ಯ ಪ್ರಯಾಣವನ್ನು ತಪ್ಪಿಸುವಂತೆ ಮತ್ತು ಈ ಪ್ರದೇಶದ ಭಾರತೀಯ ರಾಯಭಾರ ಕಚೇರಿಗಳೊಂದಿಗೆ ಸಂಪರ್ಕದಲ್ಲಿರಲು ಸೂಚಿಸಿದೆ(ಏಜೆನ್ಸೀಸ್​).