ದೇಶ

ಇರಾನ್​ ಅಮೆರಿಕಾ ಸಂಘರ್ಷ ತಾರಕಕ್ಕೆ

iran-us
iran-us
Published on: 
ಇರಾನ್​ನ ಸವೋಚ್ಚ ನಾಯಕ ಸಯ್ಯದ್ ಅಲಿ ಹೊಸೇನಿ ಖಮೇನಿ ದುರಾಡಳಿತದ ವಿರುದ್ಧ ಇರಾನ್​ನಲ್ಲಿ ಪ್ರತಿಭಟನೆಗಳು ಭುಗಿಲೆದ್ದಿರುವ ಬೆನ್ನಲ್ಲೇ, ಅಮೆರಿಕ ತನ್ನ ವ್ಯಾಪಾರ ಸಮರವನ್ನೂ ತೀವ್ರಗೊಳಿಸಿದೆ. ಇರಾನ್ ಜತೆ ವ್ಯಾಪಾರ ವಹಿವಾಟು ನಡೆಸುವ ದೇಶಗಳ ಮೇಲೆ ತಕ್ಷಣದಿಂದ ಜಾರಿಗೆ ಬರುವಂತೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶೇಕಡ 25ರಷ್ಟು ಸುಂಕ ಹೇರಿದ್ದಾರೆ. ಈ ರಾಷ್ಟ್ರಗಳಲ್ಲಿ ಭಾರತವೂ ಸೇರಿದೆ.
ಮುಂಬರುವ ದಿನಗಳಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ಹೆಚ್ಚಲಿದ್ದು, ಈ ನಡುವೆ ಇರಾನ್ ಕರೆನ್ಸಿಯ ಮೌಲ್ಯ ಬಹುತೇಕ ಸೊನ್ನೆಗೆ ತಲುಪಿದೆ. 1979ರಿಂದಲೂ ಅಮೆರಿಕ ಆಗಾಗ ಇರಾನ್ ಮೇಲೆ ಕಠಿಣ ಆರ್ಥಿಕ ನಿರ್ಬಂಧಗಳನ್ನು ಹೇರುತ್ತಲೇ ಇದೆ. ಇರಾನ್​ನೊಂದಿಗೆ ಹೆಚ್ಚು ವ್ಯಾಪಾರ ವಹಿವಾಟನ್ನು ಚೀನಾ, ಯುಎಇ, ಭಾರತ, ಟರ್ಕಿ ನಡೆಸುತ್ತಿದ್ದು, ಈ ಎಲ್ಲ ಬೆಳವಣಿಗೆಗಳ ಅವಲೋಕನ ಇಲ್ಲಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಾರಿರುವ ಸುಂಕ ಸಮರ ಈಗ ಮತ್ತೊಂದು ಮಹತ್ವದ ತಿರುವು ಪಡೆದುಕೊಂಡಿದೆ. ಇರಾನ್ ಸ್ಥಿತಿ ಅಯೋಮಯವಾಗಿದ್ದು, ಸರ್ಕಾರ ವಿರೋಧಿ ಪ್ರತಿಭಟನೆಗಳು ಭುಗಿಲೆದ್ದಿವೆ. ಇರಾನ್ ಜತೆ ವ್ಯವಹಾರ ನಡೆಸುವ ದೇಶಗಳ ಮೇಲೆ ಶೇಕಡ 25ರಷ್ಟು ಸುಂಕ ವಿಧಿಸಲಾಗುವುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೋಮವಾರ ರಾತ್ರಿ ಘೋಷಿಸಿದ್ದಾರೆ.
ಈ ಕುರಿತು ಸಾಮಾಜಿಕ ಮಾಧ್ಯಮ ‘ಟ್ರೂತ್ ಸೋಷಿಯಲ್’ನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, ‘ಇರಾನ್ ಇಸ್ಲಾಮಿಕ್ ಗಣರಾಜ್ಯದೊಂದಿಗೆ ವಾಣಿಜ್ಯ ವ್ಯವಹಾರ ನಡೆಸುವ ಯಾವುದೇ ದೇಶವು ತಕ್ಷಣದಿಂದ ಜಾರಿಗೆ ಬರುವಂತೆ, ಅಮೆರಿಕದ ಜತೆ ನಡೆಸುವ ಯಾವುದೇ ವ್ಯವಹಾರ ಮತ್ತು ಎಲ್ಲ ವ್ಯವಹಾರಗಳ ಮೇಲೆ ಶೇ.25ರಷ್ಟು ಸುಂಕವನ್ನು ಪಾವತಿಸಬೇಕು. ಈ ಆದೇಶವು ಅಂತಿಮ ಹಾಗೂ ನಿರ್ಣಾಯಕವಾಗಿದೆ’ ಎಂದಿದ್ದಾರೆ. ಆದರೆ, ಈ ಸುಂಕದ ಕುರಿತಂತೆ ಶ್ವೇತಭವನ ಇನ್ನೂ ಅಧಿಕೃತ ಅಧಿಸೂಚನೆ ಹೊರಡಿಸಿಲ್ಲ.
ಇರಾನ್ ತೊರೆಯಲು ಸೂಚನೆ: ಇರಾನ್ ವಿರುದ್ಧ ಮಿಲಿಟರಿ ದಾಳಿಗೆ ಸಿದ್ಧವಾಗಿರುವಂತೆ ಅಮೆರಿಕ ತನ್ನ ಸೈನ್ಯಕ್ಕೆ ಸೂಚನೆ ನೀಡಿದೆ. ಇದರ ಬೆನ್ನಲ್ಲೇ, ಇರಾನ್​ನಲ್ಲಿರುವ ಅಮೆರಿಕ ಪ್ರಜೆಗಳು ಕೂಡಲೇ ದೇಶ ತೊರೆಯುವಂತೆ ಟ್ರಂಪ್ ಆಡಳಿತ ಸೂಚಿಸಿದೆ. ‘ಈಗಲೇ ಇರಾನ್​ನಿಂದ ಹೊರಡಿ. ಅಮೆರಿಕ ಸರ್ಕಾರದ ಸಹಾಯವನ್ನು ಅವಲಂಬಿಸಬೇಡಿ. ನಿಮ್ಮದೇ ಯೋಜನೆ ರೂಪಿಸಿಕೊಳ್ಳಿ’ ಎಂದು ತಿಳಿಸಿದೆ. ಹೊರಡಲು ಸಾಧ್ಯವಾಗದವರಿಗೆ, ಸುರಕ್ಷಿತ ಸ್ಥಳಗಳಲ್ಲಿ ಅಗತ್ಯ ಸಾಮಗ್ರಿಗಳನ್ನು ಇರಿಸಿಕೊಂಡು ಇರುವಂತೆ ಸೂಚಿಸಲಾಗಿದೆ.

ಅಕ್ಕಿ ರಫ್ತಿಗೆ ಅಡ್ಡಿ

ಇರಾನ್​ನಲ್ಲಿ ಪ್ರತಿಭಟನೆ ಮತ್ತು ಹಿಂಸಾಚಾರ ತೀವ್ರ ಸ್ವರೂಪ ಪಡೆದುಕೊಂಡಿದ್ದು, ಭಾರತದಿಂದ ಬಾಸ್ಮತಿ ಅಕ್ಕಿ ರಫ್ತಿಗೆ ಅಡ್ಡಿಯಾಗಿದೆ ಮತ್ತು ಈಗಾಗಲೇ ರಫ್ತು ಮಾಡಿರುವ ಅಕ್ಕಿಯ ಮೌಲ್ಯವನ್ನು (ಪಾವತಿ) ಪಡೆದುಕೊಳ್ಳಲು ವಿಳಂಬವಾಗಲಿದೆ. ಭಾರತ 2025ರ ಏಪ್ರಿಲ್​ನಿಂದ ನವೆಂಬರ್ ಅವಧಿಯಲ್ಲಿ ಇರಾನ್​ಗೆ 468.10 ಮಿಲಿಯನ್ ಡಾಲರ್ ಮೊತ್ತದ 5.99 ಲಕ್ಷ ಟನ್ ಬಾಸ್ಮತಿ ಅಕ್ಕಿಯನ್ನು ರಫ್ತು ಮಾಡಿದೆ. ಭಾರತದಿಂದ ಬಾಸ್ಮತಿ ಅಕ್ಕಿ ಹೆಚ್ಚು ರಫ್ತಾಗುವ ದೇಶಗಳಲ್ಲಿ ಇರಾನ್ ಮೊದಲನೆಯದು. ಇರಾನ್ ಪರಿಸ್ಥಿತಿ ತಿಳಿಯಾಗುವವರೆಗೆ ಆತಂಕ ತಪ್ಪಿದ್ದಲ್ಲ ಎಂದು ಭಾರತೀಯ ಅಕ್ಕಿ ರಫ್ತುದಾರರ ಫೆಡರೇಷನ್ ಪ್ರತಿಕ್ರಿಯಿಸಿದೆ.
ಇರಾನ್​ನ ಪ್ರಮುಖ ವ್ಯಾಪಾರ ಪಾಲುದಾರರಲ್ಲಿ ಚೀನಾ, ಟರ್ಕಿ, ಭಾರತ, ಯುಎಇ, ಪಾಕಿಸ್ತಾನ ಮತ್ತು ಅರ್ವೆನಿಯಾ ಸೇರಿವೆ. ಟ್ರಂಪ್ ಘೋಷಣೆ ಭಾರತದ ಮೇಲೂ ಪರಿಣಾಮ ಬೀರಲಿದ್ದು, ಈ ಕುರಿತಂತೆ ಭಾರತ ಸದ್ಯಕ್ಕೆ ಕಾದು ನೋಡುವ ತಂತ್ರ ಅನುಸರಿಸಲಿದೆ. ಅಮೆರಿಕವು ಭಾರತದ ಮೇಲೆ ಈಗಾಗಲೇ ಶೇಕಡ 50ರಷ್ಟು ಸುಂಕವನ್ನು ವಿಧಿಸಿದೆ. ಇದು ವಿಶ್ವದಲ್ಲೇ ಅತಿ ಹೆಚ್ಚು. ರಷ್ಯಾದಿಂದ ಕಚ್ಚಾ ತೈಲ ಖರೀದಿಸುತ್ತಿರುವುದಕ್ಕೆ ದಂಡವಾಗಿ ಶೇ.25ರಷ್ಟು ಹೆಚ್ಚುವರಿ ಸುಂಕ ಇದರಲ್ಲಿ ಒಳಗೊಂಡಿದೆ.
ವಾಸ್ತವದಲ್ಲಿ, ಭಾರತ ಮತ್ತು ಇರಾನ್ ನಡುವೆ ವಾಣಿಜ್ಯ ಸಂಬಂಧಗಳು ಉತ್ತಮವಾಗಿವೆ. ಎರಡೂ ದೇಶಗಳ ನಡುವೆ ವ್ಯಾಪಾರ ಕೊಡುಕೊಳ್ಳುವಿಕೆ ಇದೆ. ಇರಾನ್​ನಿಂದ ಭಾರತವು ಒಣಹಣ್ಣುಗಳು (ಡ್ರೈಫ್ರೂಟ್ಸ್), ಸಾವಯವ ರಾಸಾಯನಿಕಗಳು ಮತ್ತು ಗಾಜಿನ ಸಾಮಗ್ರಿಗಳನ್ನು ಆಮದು ಮಾಡಿಕೊಳ್ಳುತ್ತಿದೆ. ಅಲ್ಲದೆ, ಭಾರತವು ಇರಾನ್​ಗೆ ಬಾಸ್ಮತಿ ಅಕ್ಕಿ, ಚಹಾಪುಡಿ, ಸಕ್ಕರೆ, ಔಷಧಗಳು, ಮಾನವನಿರ್ವಿುತ ನಾರು ಉತ್ಪನ್ನಗಳು, ವಿದ್ಯುತ್ ಯಂತ್ರೋಪಕರಣಗಳು ರಫ್ತು ಮಾಡುತ್ತಿದೆ.
ಇರಾನ್​ನಿಂದ ಭಾರತ ಕಚ್ಚಾ ತೈಲವನ್ನು ದೊಡ್ಡ ಮಟ್ಟದಲ್ಲಿ ಆಮದು ಮಾಡಿಕೊಳ್ಳುತ್ತಿತ್ತು. ಆದರೆ, ಅಮೆರಿಕದ ನಿರ್ಬಂಧದ ಬಳಿಕ ಕಚ್ಚಾ ತೈಲದ ಆಮದು ಗಣನೀಯ ಪ್ರಮಾಣದಲ್ಲಿ ಕಡಿಮೆಯಾಗಿದೆ. 2025ರ ಮೊದಲ 10 ತಿಂಗಳುಗಳಲ್ಲಿ (ಜನವರಿ-ಅಕ್ಟೋಬರ್) ದ್ವಿಪಕ್ಷೀಯ ವ್ಯಾಪಾರದ ಮೊತ್ತ ಸುಮಾರು 1.34 ಬಿಲಿಯನ್ ಡಾಲರ್ ಆಗಿದೆ. ಇದು ಭಾರತದ ಒಟ್ಟು ವ್ಯಾಪಾರದಲ್ಲಿ ತುಂಬ ಸಣ್ಣ ಪಾಲು (ಸುಮಾರು 0.1-0.2%). ಇರಾನ್​ನಲ್ಲಿನ ಉದ್ವಿಗ್ನತೆ ಹಾಗೂ ಅಮೆರಿಕ ನಿರ್ಬಂಧಗಳ ಪರಿಣಾಮ ಇತ್ತೀಚಿನ ವರ್ಷಗಳಲ್ಲಿ ಉಭಯ ದೇಶಗಳ ನಡುವೆ ವ್ಯಾಪಾರ ಪ್ರಮಾಣ ಕಡಿಮೆಯಾಗುತ್ತಿದೆ, ವಾರ್ಷಿಕವಾಗಿ ಸರಾಸರಿ 6.5% ರಷ್ಟು ಇಳಿಕೆಯಾಗಿದೆ.
ಇರಾನ್ ತನ್ನ ಉತ್ಪನ್ನಗಳ ರಫ್ತು ಮೂಲಕ ಉತ್ತಮ ಅದಾಯ ಮಾಡಿಕೊಳ್ಳುತ್ತಿದೆ. ಕಚ್ಚಾ ತೈಲ, ಪೆಟ್ರೋಲಿಯಂ ಉತ್ಪನ್ನಗಳು, ನೈಸರ್ಗಿಕ ಅನಿಲ ಪ್ರಮುಖವಾದವು. ಇದಲ್ಲದೆ, ಪೆಟ್ರೋಕೆಮಿಕಲ್ಸ್, ಉಕ್ಕು, ತಾಮ್ರ, ಕೆಲ ಕೃಷಿ ಉತ್ಪನ್ನಗಳನ್ನು ರಫ್ತು ಮಾಡುತ್ತದೆ. ಅಮೆರಿಕ ತಕ್ಷಣದಿಂದ ಜಾರಿಗೆ ಬರುವಂತೆ ಸುಂಕ ವಿಧಿಸಿರುವುದರಿಂದ ಇರಾನ್ ಸಂಕಷ್ಟ ಹೆಚ್ಚಲಿದೆ. ಈಗಾಗಲೇ ಜೀವನಾವಶ್ಯಕ ವಸ್ತುಗಳ ಬೆಲೆ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದ್ದು, ಜನರ ಆಕ್ರೋಶಕ್ಕೆ ಕಾರಣವಾಗಿದೆ.
2026ರ ಬಜೆಟ್​ನಲ್ಲಿ ತೆರಿಗೆ ದರಗಳನ್ನು ಮತ್ತಷ್ಟು ಹೆಚ್ಚಿಸಲು ಖಮೇನಿ ಆಡಳಿತ ಮುಂದಾಗಿರುವುದು, ಜನರ ವಿರೋಧಕ್ಕೆ ಕಾರಣವಾಗಿದೆ. ಒಟ್ಟಾರೆ, ಇರಾನ್ ಆರ್ಥಿಕ ಸಂಕಷ್ಟ ವಿಕೋಪಕ್ಕೆ ಹೋಗಲಿದ್ದು, ಸದ್ಯದಲ್ಲೇ ಇದಕ್ಕೆ ಪರಿಹಾರ ಕಾಣುವ ಲಕ್ಷಣಗಳಿಲ್ಲ. ಉಳಿದ ದೇಶಗಳ ಮೇಲೆ ಇದರಿಂದ ಪರಿಣಾಮ ಅಲ್ಪವಾದರೂ, ಜಾಗತಿಕ ಮಟ್ಟದಲ್ಲಿ ಷೇರುಪೇಟೆಗಳು ತಲ್ಲಣಿಸುವ ಸಾಧ್ಯತೆ ಇದೆ ಎನ್ನುತ್ತಾರೆ ಮಾರುಕಟ್ಟೆ ವಿಶ್ಲೇಷಕರು. ಚೀನಾ ಕಚ್ಚಾ ತೈಲಕ್ಕಾಗಿ ಇರಾನ್ ಮತ್ತು ರಷ್ಯಾವನ್ನು ಅವಲಂಬಿಸಿದೆ. ಆದರೆ, ಅಮೆರಿಕವು ಇರಾನ್ ಮತ್ತು ರಷ್ಯಾ ಮೇಲೆ ಸುಂಕಾಸ್ತ್ರ ಪ್ರಯೋಗಿಸಿರುವುದರಿಂದ ಡ್ರಾ್ಯಗನ್ ರಾಷ್ಟ್ರ ಚೀನಾ ಕೂಡ ಪರ್ಯಾಯ ಆಯ್ಕೆಗಳನ್ನು ಶೋಧಿಸಬೇಕಿದೆ.

ಕರೆನ್ಸಿ ಮೌಲ್ಯ ಕುಸಿತ

ಇರಾನ್​ನಲ್ಲಿ ಬೆಲೆಏರಿಕೆಯನ್ನು ವಿರೋಧಿಸಿ ಮತ್ತು ಸರ್ಕಾರದ ಆರ್ಥಿಕ ನೀತಿಗಳನ್ನು ಖಂಡಿಸಿ ಪ್ರತಿಭಟನೆಗಳು ನಡೆಯುತ್ತಿವೆ. ಇದರಿಂದ, ಆರ್ಥಿಕ ಚಟುವಟಿಕೆಗಳು ಮತ್ತಷ್ಟು ಕ್ಷೀಣಗೊಂಡಿದ್ದು, ಕರೆನ್ಸಿ ಮೌಲ್ಯ ಕುಸಿತ ಕಂಡಿದೆ. ಭಾರತೀಯ ರೂಪಾಯಿಯಲ್ಲಿ 1 ರಿಯಾಲ್​ನ (ಇರಾನ್ ಕರೆನ್ಸಿ) ಮೌಲ್ಯ 0.000079 ರೂ.ಗೆ ಬಂದು ತಲುಪಿದೆ.

ನಿಷೇಧ ಹೊಸದೇನಲ್ಲ

  1. 1979ರ ವರ್ಷ. ಇರಾನ್​ನಲ್ಲಿ ‘ಇಸ್ಲಾಮಿಕ್ ಕ್ರಾಂತಿ’ ಸಂಭವಿಸಿತು. ತೆಹರಾನ್​ನಲ್ಲಿ ಅಮೆರಿಕದ ರಾಯಭಾರಿ ಕಚೇರಿಯನ್ನು ವಶಪಡಿಸಿಕೊಂಡು, ಅಮೆರಿಕದ 52 ನಾಗರಿಕರನ್ನು ಒತ್ತೆ ಇರಿಸಲಾಯಿತು. ಇದಾದ 46 ವರ್ಷಗಳಲ್ಲಿ ಅಮೆರಿಕ ಇರಾನ್ ಮೇಲೆ ಹಲವು ಬಾರಿ ಕಠಿಣ ಆರ್ಥಿಕ ನಿರ್ಬಂಧಗಳನ್ನು ವಿಧಿಸಿದೆ. ಮಾತ್ರವಲ್ಲ, 1980ರಿಂದಲೇ ಅಮೆರಿಕ ಇರಾನ್ ಜತೆ ರಾಜತಾಂತ್ರಿಕ ಸಂಬಂಧಗಳನ್ನು ಕಡಿದುಕೊಂಡಿದೆ.
  2. 1979- ಇರಾನ್​ನ ಸ್ವತ್ತುಗಳನ್ನು ವಶಪಡಿಸಿಕೊಂಡಿತು ಮತ್ತು ಇರಾನ್​ನೊಂದಿಗೆ ವ್ಯಾಪಾರ ವಹಿವಾಟನ್ನು ನಿಷೇಧಿಸಿತು.
  3. 1995- ಇರಾನ್​ನ ಕಚ್ಚಾ ತೈಲ ಹಾಗೂ ಅನಿಲ ಕ್ಷೇತ್ರದಲ್ಲಿ ಅಮೆರಿಕ ಕಂಪನಿಗಳ ಹೂಡಿಕೆಯನ್ನು ನಿಷೇಧಿಸಲಾಯಿತು. ಮಾತ್ರವಲ್ಲ, ಇರಾನ್​ನಿಂದ ಕಚ್ಚಾ ತೈಲ ಆಮದನ್ನು ಸಂಪೂರ್ಣವಾಗಿ ಬಂದ್ ಮಾಡಿತು.
  4. 2006-2010: ಅಣ್ವಸ್ತ್ರಗಳನ್ನು ಹೊಂದಲು ಈ ಕಾಲಾವಧಿಯಲ್ಲಿ ಇರಾನ್ ತನ್ನ ಪ್ರಯತ್ನಗಳನ್ನು ತೀವ್ರಗೊಳಿಸಿತು. ಪರಿಣಾಮ, ಅಮೆರಿಕ ಬ್ಯಾಂಕಿಂಗ್, ಶಸ್ತ್ರಾಸ್ತ್ರ, ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಕ್ಷೇತ್ರಗಳ ಮೇಲೆ ನಿಷೇಧ ಹೇರಿತು, ಇರಾನ್​ನ ಅಣ್ವಸ್ತ್ರ ಕಾರ್ಯಕ್ರಮ ಜಾರಿಯಾಗದಂತೆ ಹಲವು ದಿಕ್ಕಿನಲ್ಲಿ ಆ ದೇಶವನ್ನು ನಿರ್ಬಂಧಗಳ ಮೂಲಕವೇ ಸುತ್ತುವರಿಯಿತು.
  5. 2012: ಇರಾನ್​ನ ಸೆಂಟ್ರಲ್ ಬ್ಯಾಂಕ್ ಮೇಲೆ ನಿಷೇಧ ಹೇರಿತು. SWIFT ಸಿಸ್ಟಮ್ಂದ ಇರಾನ್ ಬ್ಯಾಂಕುಗಳನ್ನು ಹೊರಗಿಟ್ಟಿತು.
  6. 2015: ಪರಮಾಣು ಒಪ್ಪಂದ JCPOA ಅಂತಿಮಗೊಂಡ ಬಳಿಕ ಕೆಲ ನಿರ್ಬಂಧಗಳನ್ನು ತಾತ್ಕಾಲಿಕವಾಗಿ ಹಿಂಪಡೆಯಲಾಯಿತು.
  7. 2018: JCPOAಯಿಂದ ಹೊರಬಂದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ದೊಡ್ಡ ಮಟ್ಟದ ನಿರ್ಬಂಧಗಳನ್ನು ಮರುಜಾರಿಗೊಳಿಸಿದರು.
  8. 2024: ಇರಾನ್​ನೊಂದಿಗೆ ವ್ಯಾಪಾರ ವಹಿವಾಟು ನಡೆಸುವ ದೇಶಗಳು ಮತ್ತು ಕಂಪನಿಗಳ ವಿರುದ್ಧ ಕ್ರಮ ಕೈಗೊಂಡಿತು.
  9. 2026: ಇರಾನ್ ಜತೆ ವಾಣಿಜ್ಯ ವಹಿವಾಟು ನಡೆಸುವವರ ಮೇಲೆ ಶೇಕಡ 25 ಸುಂಕ ಹೇರುವ ಘೋಷಣೆ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net