ಇರಾನ್-ಇಸ್ರೇಲ್ ಯುದ್ಧ: ಕಚ್ಚಾ ತೈಲ ಬ್ಯಾರೆಲ್‌ಗೆ 100 ಡಾಲರ್ ದಾಟುವ ಭೀತಿ! ಭಾರತದಲ್ಲಿ ಪೆಟ್ರೋಲ್, ಡೀಸೆಲ್ ಮತ್ತೆ ಏರಿಕೆ? Iran Israel War

ನವದೆಹಲಿ/ದುಬೈ: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಿಡಿ ಹೊತ್ತಿಕೊಂಡರೆ ಅದು ಕೇವಲ ಎರಡು ದೇಶಗಳ ನಡುವಿನ ಜಗಳವಾಗಿ ಉಳಿಯುವುದಿಲ್ಲ. ಬದಲಾಗಿ ವಿಶ್ವದಾದ್ಯಂತ ಇರುವ ಪ್ರತಿ ಮನೆಯ ಅಡುಗೆ ಮನೆ ಮತ್ತು ವಾಹನಗಳ ಇಂಧನದ ಮೇಲೂ ಪರಿಣಾಮ ಬೀರುತ್ತದೆ. 

ಇರಾನ್ ಮೇಲೆ ಅಮೆರಿಕ-ಇಸ್ರೇಲ್ (Iran Israel War) ಜಂಟಿ ದಾಳಿ ಮತ್ತು ಅದಕ್ಕೆ ಇರಾನ್ ನೀಡುತ್ತಿರುವ ಪ್ರತೀಕಾರದ ಎಚ್ಚರಿಕೆ ಈಗ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ನಡುಕ ಹುಟ್ಟಿಸಿದೆ. ಒಂದು ವೇಳೆ ಈ ಸಂಘರ್ಷ ತೀವ್ರಗೊಂಡರೆ, ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 100 ಡಾಲರ್ ಗಡಿ ದಾಟುವುದು ಖಚಿತ ಎಂದು ಆರ್ಥಿಕ ತಜ್ಞರು ಎಚ್ಚರಿಸುತ್ತಿದ್ದಾರೆ. 

ಇರಾನ್ ಕೇವಲ ಒಂದು ದೇಶವಲ್ಲ, ಅದು ವಿಶ್ವದ ಅಗ್ರ 10 ತೈಲ ಉತ್ಪಾದಕ ರಾಷ್ಟ್ರಗಳಲ್ಲಿ ಒಂದು. ಇರಾನ್ ಬಳಿ ವಿಶ್ವದ ಮೂರನೇ ಅತಿ ದೊಡ್ಡ ತೈಲ ನಿಕ್ಷೇಪವಿದೆ.  ಪ್ರತಿ ದಿನ ಸುಮಾರು 31 ಲಕ್ಷ ಬ್ಯಾರೆಲ್ ತೈಲವನ್ನು ಉತ್ಪಾದಿಸುವ ಇರಾನ್, ಚೀನಾ ಸೇರಿದಂತೆ ಹಲವು ದೇಶಗಳಿಗೆ ಇಂಧನ ಪೂರೈಸುತ್ತದೆ.

ಯುದ್ಧದ ಅಸಲಿ ಕೇಂದ್ರಬಿಂದು ಇರಾನ್‌ನ ತೈಲ ಬಾವಿಗಳಲ್ಲ, ಬದಲಿಗೆ ಹಾರ್ಮುಜ್ ಜಲಸಂಧಿ (Strait of Hormuz). ಇದು ಕೇವಲ 50 ಕಿಲೋಮೀಟರ್ ಅಗಲವಿರುವ ಸಮುದ್ರ ಮಾರ್ಗ. ಆದರೆ, ಪ್ರಪಂಚದ ಒಟ್ಟು ತೈಲ ಬಳಕೆಯ ಶೇಕಡಾ 20ರಷ್ಟು ಭಾಗ ಇದೇ ಸಣ್ಣ ಮಾರ್ಗದ ಮೂಲಕ ಹಾದುಹೋಗುತ್ತದೆ.

ಭಾರತ ತನ್ನ ತೈಲ ಅಗತ್ಯದ ಶೇಕಡಾ 80ಕ್ಕಿಂತ ಹೆಚ್ಚಿನ ಭಾಗವನ್ನು ಆಮದು ಮಾಡಿಕೊಳ್ಳುತ್ತದೆ. ಒಂದು ವೇಳೆ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಸಾರಿಗೆ ವೆಚ್ಚ ಹೆಚ್ಚಾಗಿ ತರಕಾರಿ, ಹಣ್ಣು ಮತ್ತು ಅಗತ್ಯ ವಸ್ತುಗಳ ಬೆಲೆ ಏರುತ್ತದೆ. ತೈಲ ಖರೀದಿಗೆ ಹೆಚ್ಚು ಡಾಲರ್ ನೀಡಬೇಕಾಗಿರುವುದರಿಂದ ಭಾರತದ ರೂಪಾಯಿ ಮೌಲ್ಯ ಕುಸಿಯಬಹುದು. ಹಾಗೆಯೇ, ಹಣದುಬ್ಬರ ನಿಯಂತ್ರಿಸಲು ಬ್ಯಾಂಕುಗಳು ಸಾಲದ ಮೇಲಿನ ಬಡ್ಡಿದರವನ್ನು ನಿರಂತರವಾಗಿ ಹೆಚ್ಚಿಸುತ್ತಲೇ ಹೋಗುತ್ತವೆ.

ಇನ್ನೊಂದು ಆಸಕ್ತಿದಾಯಕ ವಿಷಯವೆಂದರೆ, ಇರಾನ್‌ನಲ್ಲಿ ಒಂದು ಬ್ಯಾರೆಲ್ ತೈಲ ಉತ್ಪಾದಿಸಲು ಕೇವಲ 10 ಡಾಲರ್ ಖರ್ಚಾಗುತ್ತದೆ (ಅಮೆರಿಕದಲ್ಲಿ ಇದಕ್ಕೆ 40-60 ಡಾಲರ್ ಬೇಕು). ಹೀಗಾಗಿ, ಯುದ್ಧದ ಕಾರಣದಿಂದ ತೈಲ ಬೆಲೆ 100 ಡಾಲರ್ ದಾಟಿದರೆ, ಇರಾನ್ ಕಡಿಮೆ ಪ್ರಮಾಣದ ತೈಲ ಮಾರಿದರೂ ಅದಕ್ಕೆ ಸಿಗುವ ಲಾಭ ಮಾತ್ರ ದುಪ್ಪಟ್ಟಾಗಿರುತ್ತದೆ.

ತೈಲ ಮಾರುಕಟ್ಟೆಯಲ್ಲಿ ಶಾಂತಿಗಿಂದ ಭಯಕ್ಕೇ ಬೆಲೆ ಹೆಚ್ಚು. ಯುದ್ಧದ ಭೀತಿ ಇರುವವರೆಗೂ ಹೂಡಿಕೆದಾರರು ಆತಂಕದಲ್ಲಿರುತ್ತಾರೆ, ತೈಲ ಬೆಲೆಗಳು ಏರುತ್ತಲೇ ಇರುತ್ತವೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಮುಂದಿನ ನಡೆ ಮತ್ತು ಇರಾನ್‌ನ ಪ್ರತೀಕಾರದ ತೀವ್ರತೆ ಮಾತ್ರ ಜಗತ್ತಿನ ಇಂಧನ ಭವಿಷ್ಯವನ್ನು ನಿರ್ಧರಿಸಲಿವೆ ಎನ್ನುವುದು ಆರ್ಥಿಕ ತಜ್ಞರ ಅಭಿಪ್ರಾಯವಾಗಿದೆ,(ಏಜನ್ಸೀಸ್​).