ವಿಜಯ್ ಸರ್ಕಾರಕ್ಕೆ ಆರಂಭಿಕ ವಿಘ್ನ!...ಸದನ ಪ್ರವೇಶಿಸದಂತೆ ಟಿವಿಕೆ ಶಾಸಕನಿಗೆ ನಿಷೇಧ; ಕಾರಣ ಇಲ್ಲಿದೆ ನೋಡಿ | Srinivasa Sethupathi

ಶಿವಗಂಗಾ ಜಿಲ್ಲೆಯ ತಿರುಪತ್ತೂರು ಕ್ಷೇತ್ರದಲ್ಲಿ ಶ್ರೀನಿವಾಸ ಸೇತುಪತಿ ವಿರುದ್ಧ ಕೇವಲ ಒಂದು ಮತದ ಅಂತರದಿಂದ ಸೋತಿದ್ದ ಡಿಎಂಕೆ ಮಾಜಿ ಸಚಿವ ಕೆ.ಆರ್. ಪೆರಿಯಕರುಪ್ಪನ್ ಅರ್ಜಿ ಸಲ್ಲಿಸಿದ್ದು, ಕ್ಷೇತ್ರದ ಒಂದು ಅಂಚೆ ಮತಪತ್ರವನ್ನು ಅಧಿಕಾರಿಗಳು ತಪ್ಪಾಗಿ ಬೇರೆ ಕ್ಷೇತ್ರಕ್ಕೆ ವರ್ಗಾಯಿಸಿ, ಅದಾದ ಬಳಿಕ ಅದನ್ನು ತಿರಸ್ಕರಿಸಿದ್ದಾರೆ ಎಂಬುದು ಅರ್ಜಿದಾರರ ವಾದವಾಗಿದೆ. ಈ ಗೊಂದಲ ಬಗೆಹರಿಯುವವರೆಗೆ ಸೇತುಪತಿ ಶಾಸಕರಾಗಿ ಕಾರ್ಯನಿರ್ವಹಿಸದಂತೆ ತಡೆಯಬೇಕು ಎಂದು ಪೆರಿಯಕರುಪ್ಪನ್ ನ್ಯಾಯಾಲಯವನ್ನು ಕೋರಿದ್ದರು.

ಚುನಾವಣಾ ಆಯೋಗವು ಮತ ಎಣಿಕೆ ಮುಗಿದ ಮೇಲೆ ಇಂತಹ ದೂರುಗಳಿಗೆ ಮನ್ನಣೆ ನೀಡುವ ಅಗತ್ಯವಿಲ್ಲ ಎಂದು ವಾದಿಸಿದರೂ, ಅರ್ಜಿದಾರರು ಸಲ್ಲಿಸಿದ ಪುರಾವೆಗಳನ್ನು ಗಮನಿಸಿದ ಹೈಕೋರ್ಟ್ ಮಧ್ಯಂತರ ನಿಷೇಧಾಜ್ಞೆ ವಿಧಿಸಿದೆ. ಅಲ್ಲದೆ, ಎಲ್ಲಾ ಅಂಚೆ ಮತಗಳನ್ನು ಮತ್ತು ಚುನಾವಣೆಯ ವಿಡಿಯೋ ತುಣುಕುಗಳನ್ನು ಸುರಕ್ಷಿತವಾಗಿಡಲು ಆದೇಶಿಸಿದೆ.

ಮತ್ತೊಂದೆಡೆ, ಸದನದಲ್ಲಿ ಟಿವಿಕೆ ಶಾಸಕ ಜೆಸಿಡಿ ಪ್ರಭಾಕರ್​​ರನ್ನು ವಿಧಾನಸಭಾ ಸ್ಪೀಕರ್ ಆಗಿ ಸರ್ವಾನುಮತದಿಂದ ಆಯ್ಕೆ ಮಾಡಲಾಗಿದೆ. ಸೋಮವಾರವಷ್ಟೇ ಮುಖ್ಯಮಂತ್ರಿ ವಿಜಯ್ ಸಮ್ಮುಖದಲ್ಲಿ ಪ್ರಭಾಕರ್ ನಾಮಪತ್ರ ಸಲ್ಲಿಸಿದ್ದರು. 2026ರ ಚುನಾವಣೆಯಲ್ಲಿ ಥೌಸಂಡ್ ಲೈಟ್ಸ್ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ಇವರು ಡಿಎಂಕೆ ಅಭ್ಯರ್ಥಿ ಎಜ್ಲಿಯನ್ ನಾಗನಾಥನ್ ವಿರುದ್ಧ ಗೆಲುವು ಸಾಧಿಸಿದ್ದರು. ಟಿವಿಕೆ ನೇತೃತ್ವದ ನೂತನ ಸರ್ಕಾರದ ಭಾಗವಾಗಿ ಈಗಾಗಲೇ ಎಲ್ಲಾ ಶಾಸಕರು ಪ್ರಮಾಣವಚನ ಸ್ವೀಕರಿಸಿದ್ದು, ಇದೀಗ ಶ್ರೀನಿವಾಸ ಸೇತುಪತಿ ಅವರಿಗೆ ಹೇರಲಾಗಿರುವ ನಿಷೇಧವು ವಿಶ್ವಾಸಮತ ಯಾಚನೆಯ ವೇಳೆ ಯಾವ ರೀತಿಯ ತಿರುವು ಪಡೆಯಲಿದೆ ಕಾದು ನೋಡಬೇಕು(ಏಜೆನ್ಸೀಸ್​​).