981 ದಿನಗಳ ಬಳಿಕ ನೇಮರ್ ಕಮ್‌ಬ್ಯಾಕ್: ಭಾವುಕರಾಗಿ ಕಣ್ಣೀರಿಟ್ಟ ಬ್ರೆಜಿಲ್‌ನ ಸ್ಟಾರ್ ಆಟಗಾರ

ಗಂಭೀರ ಗಾಯದ ಕಾರಣದಿಂದ ದೀರ್ಘಕಾಲ ತಂಡದಿಂದ ದೂರವಾಗಿದ್ದ ನೇಮರ್, ಪಂದ್ಯ ಮುಗಿದ ಬಳಿಕ ಭಾವುಕರಾಗಿ ಕಣ್ಣೀರಿಟ್ಟರು. ಮೈದಾನದಲ್ಲೇ ಕುಟುಂಬ ಸದಸ್ಯರನ್ನು ಅಪ್ಪಿಕೊಂಡ ದೃಶ್ಯ ಅಭಿಮಾನಿಗಳ ಗಮನ ಸೆಳೆಯಿತು.

2023ರ ಅಕ್ಟೋಬರ್‌ನಲ್ಲಿ ಉರುಗ್ವೆ ವಿರುದ್ಧದ ಪಂದ್ಯದಲ್ಲಿ ನೇಮರ್ ಅವರ ಮೊಣಕಾಲಿಗೆ ಗಂಭೀರ ಗಾಯವಾಗಿತ್ತು. ಇದರಿಂದ ಅವರು ದೀರ್ಘಕಾಲ ರಾಷ್ಟ್ರೀಯ ತಂಡದಿಂದ ಹೊರಗುಳಿದಿದ್ದರು. ಮಿಯಾಮಿಯಲ್ಲಿ ನಡೆದ ಸ್ಕಾಟ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ನೇಮರ್ ಆರಂಭಿಕ ತಂಡದಲ್ಲಿ ಸ್ಥಾನ ಪಡೆದಿರಲಿಲ್ಲ. ಪಂದ್ಯದ 76ನೇ ನಿಮಿಷದಲ್ಲಿ ಬದಲಿ ಆಟಗಾರನಾಗಿ ಮೈದಾನಕ್ಕಿಳಿದರು. ಆ ವೇಳೆಗೆ ಬ್ರೆಜಿಲ್ ಈಗಾಗಲೇ 3-0 ಮುನ್ನಡೆ ಸಾಧಿಸಿತ್ತು.

ನೇಮರ್ ವಾರ್ಮ್‌ಅಪ್ ಆರಂಭಿಸಿದ ಕ್ಷಣದಿಂದಲೇ ಕ್ರೀಡಾಂಗಣದಲ್ಲಿ ಅಭಿಮಾನಿಗಳ ಸಂಭ್ರಮ ಶುರುವಾಯಿತು. ಅವರು ಮೈದಾನಕ್ಕಿಳಿದಾಗ ಸಾವಿರಾರು ಅಭಿಮಾನಿಗಳು ಎದ್ದು ನಿಂತು ಚಪ್ಪಾಳೆ ತಟ್ಟಿ ಸ್ವಾಗತಿಸಿದರು. ನೇಮರ್ ಚೆಂಡನ್ನು ಸ್ಪರ್ಶಿಸಿದ ಪ್ರತಿ ಬಾರಿ ಪ್ರೇಕ್ಷಕರಿಂದ ಭರ್ಜರಿ ಹರ್ಷೋದ್ಗಾರ ಕೇಳಿಬಂತು. ಇದು ಅವರ ನಾಲ್ಕನೇ ವಿಶ್ವಕಪ್ ಭಾಗವಹಿಸುವಿಕೆಯಾಗಿದೆ.

ಪಂದ್ಯದ ಬಳಿಕ ಮಾತನಾಡಿದ ನೇಮರ್, "ಮೂರು ವರ್ಷಗಳ ಬಳಿಕ ಮತ್ತೆ ರಾಷ್ಟ್ರೀಯ ತಂಡದ ಜೆರ್ಸಿ ಧರಿಸಿರುವುದು ನನಗೆ ತುಂಬಾ ಸಂತೋಷ ತಂದಿದೆ. ದೈಹಿಕವಾಗಿ ನಾನು ಉತ್ತಮ ಸ್ಥಿತಿಯಲ್ಲಿದ್ದೇನೆ. ಇಷ್ಟು ದಿನ ಮೈದಾನದಿಂದ ದೂರ ಇರುವುದು ಕಷ್ಟವಾಗಿತ್ತು" ಎಂದು ಹೇಳಿದರು. ಬ್ರೆಜಿಲ್ ತಂಡದ ಕೋಚ್ ಕಾರ್ಲೊ ಅಂಚೆಲೊಟ್ಟಿ, ನೇಮರ್ ಅವರನ್ನು ಬದಲಿ ಆಟಗಾರನಾಗಿ ಬಳಸುವ ಯೋಜನೆ ಹೊಂದಿದ್ದರು ಎಂದು ವರದಿಯಾಗಿದೆ.

ಪಂದ್ಯದಲ್ಲಿ ಎರಡು ಗೋಲು ಗಳಿಸಿದ ಬ್ರೆಜಿಲ್ ಆಟಗಾರ ವಿನಿಸಿಯಸ್ ಜೂನಿಯರ್, ನೇಮರ್ ಅವರ ಮರಳಿಕೆಯನ್ನು ಸ್ವಾಗತಿಸಿದರು. "ಇದು ನಮ್ಮೆಲ್ಲರಿಗೂ ಮಹತ್ವದ ಕ್ಷಣ. ನಮ್ಮ ಆದರ್ಶ ಆಟಗಾರ ಮರಳಿದ್ದಾರೆ. ಗಾಯದ ನಡುವೆಯೂ ಅವರು ಇಲ್ಲಿಗೆ ಬರಲು ಸಾಕಷ್ಟು ಹೋರಾಟ ಮಾಡಿದ್ದಾರೆ. ಅವರು ಇನ್ನಷ್ಟು ಉತ್ತಮ ಪ್ರದರ್ಶನ ನೀಡಿ ತಂಡಕ್ಕೆ ನೆರವಾಗಲಿ ಎಂದು ಆಶಿಸುತ್ತೇನೆ" ಎಂದು ಹೇಳಿದರು. ಬ್ರೆಜಿಲ್ ತಂಡದ ಅಭಿಮಾನಿಗಳಿಗೆ ನೇಮರ್ ಅವರ ಮರಳಿಕೆ ಹೊಸ ಉತ್ಸಾಹ ಮೂಡಿಸಿದ್ದು, ಮುಂದಿನ ಪಂದ್ಯಗಳಲ್ಲೂ ಅವರ ಪ್ರದರ್ಶನದ ಮೇಲೆ ಎಲ್ಲರ ಗಮನ ನೆಟ್ಟಿದೆ,(ಏಜೆನ್ಸೀಸ್​​).