ವಿಜಯ್-ತ್ರಿಶಾ ಮದುವೆಯಾದ್ರೆ ನಿಮಗೇನು ನಷ್ಟ? ಗಾಸಿಪ್ ಮಂದಿಗೆ ಕ್ಲಾಸ್ ತಗೊಂಡ ನಟಿ ಖುಷ್ಬೂ! | Vijay-Trisha

IANS ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಖುಷ್ಬೂ, ವಿಜಯ್ ಮತ್ತು ತ್ರಿಶಾ ಅವರ ವೈಯಕ್ತಿಕ ಜೀವನವನ್ನು ಸಾರ್ವಜನಿಕವಾಗಿ ಚರ್ಚಿಸುತ್ತಿರುವುದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. "ಜನರು ಈ ವಿಷಯವನ್ನು ಇಷ್ಟೊಂದು ದೊಡ್ಡದು ಮಾಡುತ್ತಿರುವುದು ನನಗೆ ಅರ್ಥವಾಗುತ್ತಿಲ್ಲ. ಅದು ಅವರ ವೈಯಕ್ತಿಕ ಜೀವನ. ಅವರ ಖಾಸಗಿ ವಿಚಾರಗಳಿಂದ ಯಾರಿಗಾದರೂ ತೊಂದರೆಯಾಗುತ್ತಿದೆಯೇ? ಇಲ್ಲ ಎಂದಾದರೆ, ಜನರು ಅವರ ಜೀವನದ ಬಗ್ಗೆ ಮಾತನಾಡುವುದು ಸರಿಯಲ್ಲ," ಎಂದು ಅವರು ನೇರವಾಗಿ ಹೇಳಿದ್ದಾರೆ.

ವಿಜಯ್ ಅವರ ರಾಜಕೀಯ ಪ್ರವೇಶ ಮತ್ತು ಈ ವದಂತಿಗಳು ಅವರ ಜನಪ್ರಿಯತೆಯ ಮೇಲೆ ಪರಿಣಾಮ ಬೀರಬಹುದೇ? ಎಂಬ ಪ್ರಶ್ನೆಗೆ ಉತ್ತರಿಸಿದ ಖುಷ್ಬೂ, "ಖಂಡಿತವಾಗಿಯೂ ಇಲ್ಲ. ವಿಜಯ್ ಅವರು ಒಬ್ಬ ನಾಯಕನಾಗಿರಬಹುದು, ಆದರೆ ಎಲ್ಲಕ್ಕಿಂತ ಹೆಚ್ಚಾಗಿ ಅವರೊಬ್ಬ ಮನುಷ್ಯ. ನಮ್ಮಂತೆಯೇ ಅವರಿಗೂ ವೈಯಕ್ತಿಕ ಜೀವನವಿದೆ. ಜನರು ವೋಟ್ ಮಾಡುವಾಗ ಸರಿಯಾದ ನಿರ್ಧಾರವನ್ನೇ ತೆಗೆದುಕೊಳ್ಳುತ್ತಾರೆ ಎಂದು ನಾನು ನಂಬುತ್ತೇನೆ. ರಾಜಕೀಯಕ್ಕೂ ಅವರ ಖಾಸಗಿ ಬದುಕಿಗೂ ಸಂಬಂಧ ಕಲ್ಪಿಸುವುದು ತಪ್ಪು," ಎಂದು ಅಭಿಪ್ರಾಯಪಟ್ಟಿದ್ದಾರೆ.

ದಳಪತಿ ವಿಜಯ್ ಅವರ ಪತ್ನಿ ಸಂಗೀತಾ ಸೊರ್ನಾಲಿಂಗಂ ಅವರು ಇತ್ತೀಚೆಗೆ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿರುವ ಸುದ್ದಿ ಹೊರಬಿದ್ದ ಬೆನ್ನಲ್ಲೇ, ವಿಜಯ್ ಮತ್ತು ತ್ರಿಶಾ ಒಟ್ಟಾಗಿ ಕಾಣಿಸಿಕೊಂಡಿರುವುದು ಈ ಎಲ್ಲ ಸಂಚಲನಕ್ಕೆ ಕಾರಣವಾಗಿದೆ. ಚೆನ್ನೈನಲ್ಲಿ ನಡೆದ ಮದುವೆಯ ಆರತಕ್ಷತೆಯಲ್ಲಿ ಇವರಿಬ್ಬರು ಒಟ್ಟಾಗಿ ವೇದಿಕೆ ಏರಿ ನವಜೋಡಿಯನ್ನು ಹಾರೈಸಿದ್ದು ಮಾತ್ರವಲ್ಲದೆ, ಕ್ಯಾಮೆರಾಗಳಿಗೆ ಪೋಸ್ ನೀಡಿದ್ದರು. 'ಗಿಲ್ಲಿ' ಚಿತ್ರದ ಕಾಲದಿಂದಲೂ ಈ ಜೋಡಿಯ ನಡುವೆ ಏನೋ ನಡೆಯುತ್ತಿದೆ ಎಂಬ ಗುಸುಗುಸು ಕೇಳಿಬರುತ್ತಲೇ ಇತ್ತು. ಆದರೆ ಈಗ ಖುಷ್ಬೂ ಅವರು ನೀಡಿರುವ ಹೇಳಿಕೆಯು ವಿರೋಧ ಪಕ್ಷದವರಿಗೆ ಮತ್ತು ಗಾಸಿಪ್ ಪ್ರಿಯರಿಗೆ ಬಿಸಿ ಮುಟ್ಟಿಸಿದೆ,(ಏಜೆನ್ಸೀಸ್).