ಸ್ವರ್ಣಯುಗದ ಚಕ್ರವರ್ತಿ ಶ್ರೀ ಕೃಷ್ಣದೇವರಾಯನಾಗಿ ಕಿಚ್ಚ ಸುದೀಪ್: ದೇವರಾಯ ಚಿತ್ರದ ರಿಲೀಸ್​ ಡೇಟ್ ಕೂಡ ಅನೌನ್ಸ್​! Kichcha Sudeepa

ಬೆಂಗಳೂರು: ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ( Kichcha Sudeepa ​) ಇಂದು 53ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಈ ವಿಶೇಷ ಸಂದರ್ಭದಲ್ಲಿ ಸ್ಯಾಂಡಲ್​ವುಡ್ ಸೇರಿದಂತೆ ಇಡೀ ಚಿತ್ರರಂಗದ ಅಂಗಳದಲ್ಲಿ ಸಂಭ್ರಮ ಮನೆಮಾಡಿದೆ. ಮೂರು ದಶಕಗಳಿಗೂ ಅಧಿಕ ಕಾಲದಿಂದ ತಮ್ಮ ವಿಭಿನ್ನ ನಟನಾ ಶೈಲಿ, ಸ್ಟೈಲ್​, ಗತ್ತು ಮತ್ತು ಬೇಸ್​ ವಾಯ್ಸ್​ನಿಂದಲೇ ಕೋಟ್ಯಂತರ ಅಭಿಮಾನಿಗಳ ಹೃದಯ ಗೆದ್ದಿರುವ ಕಿಚ್ಚ, ಬಾದ್‌ಷಾ ಎಂದೇ ಖ್ಯಾತರಾಗಿದ್ದಾರೆ. ನಟ, ನಿರ್ದೇಶಕ, ನಿರ್ಮಾಪಕ, ನಿರೂಪಕ, ಕ್ರಿಕೆಟಿಗ, ಗಾಯಕ ಹಾಗೂ ಅತ್ಯುತ್ತಮ ಬಾಣಸಿಗ... ಆಡು ಮುಟ್ಟದ ಸೊಪ್ಪಿಲ್ಲ ಎನ್ನುವಂತೆ ಬಹುಮುಖ ಪ್ರತಿಭೆಯಾಗಿರುವ ಸುದೀಪ್​ ತಮ್ಮ ಹುಟ್ಟುಹಬ್ಬದ ಸಂಭ್ರಮದ ಜೊತೆಗೆ ಅಭಿಮಾನಿಗಳಿಗೆ ಭರ್ಜರಿ ಗುಡ್ ನ್ಯೂಸ್ ನೀಡಿದ್ದಾರೆ.

ತಮ್ಮ ಜನ್ಮದಿನದ ವಿಶೇಷವೆಂಬಂತೆ ನಟ ಸುದೀಪ್ ಅವರ ಹೊಸ ಸಿನಿಮಾಗಳು ಅಧಿಕೃತವಾಗಿ ಅನೌನ್ಸ್ ಆಗಿದ್ದು, ಸಿನಿರಂಗದಲ್ಲಿ ತೀವ್ರ ಕುತೂಹಲ ಮೂಡಿಸಿವೆ. ಎಂದಿನಂತೆ ತಮ್ಮ ಭಿನ್ನ ಕಥಾಹಂದರಗಳು ಮತ್ತು ಮಾಸ್ ಹಾಗೂ ಕ್ಲಾಸ್ ಅವತಾರಗಳ ಮೂಲಕ ಮತ್ತೊಮ್ಮೆ ರಂಗೇರಿಸಲು ಕಿಚ್ಚ ಸಜ್ಜಾಗುತ್ತಿದ್ದಾರೆ. ಈ ಬಾರಿ ವಿಶೇಷವೆಂದರೆ, ಅಭಿಮಾನಿಗಳ ಬಹುದಿನಗಳ ಕನಸಾಗಿರುವ ಐತಿಹಾಸಿಕ ಪಾತ್ರದಲ್ಲಿ ಕಿಚ್ಚ ಬಣ್ಣ ಹಚ್ಚಲಿದ್ದಾರೆ. ಹೌದು, ಕರ್ನಾಟಕದ ಶ್ರೇಷ್ಠ ರಾಜರುಗಳಲ್ಲಿ ಒಬ್ಬರಾಗಿರುವ ಶ್ರೀ ಕೃಷ್ಣದೇವರಾಯನ ಪಾತ್ರದಲ್ಲಿ ನಟ ಕಿಚ್ಚ ಸುದೀಪ್​ ಮಿಂಚಲಿದ್ದಾರೆ. ಈ ಸಿನಿಮಾದ ಕಾನ್ಸೆಪ್ಟ್​ ವಿಡಿಯೋ ಹುಟ್ಟುಹಬ್ಬದ ಪ್ರಯುಕ್ತ ಬಿಡುಗಡೆಯಾಗಿದ್ದು, ಅಭಿಮಾನಿಗಳಿಗೆ ಡಬಲ್​ ಮನರಂಜನೆಯನ್ನು ನೀಡಿದೆ.

ಪೀಪಲ್ ಮೀಡಿಯಾ ಫ್ಯಾಕ್ಟರಿ ಹಾಗೂ ಸುಪ್ರಿಯಾನ್ವಿ ಪಿಕ್ಚರ್ ಸ್ಟುಡಿಯೋ ಲಾಂಛನದಲ್ಲಿ ಅದ್ಧೂರಿಯಾಗಿ ಮೂಡಿಬರಲಿರುವ ದೇವಾರಾಯ (Devaraaya) ಸಿನಿಮಾದ ಅಧಿಕೃತ ಟೈಟಲ್ ಅನೌನ್ಸ್​ಮೆಂಟ್​ ಟೀಸರ್ ಬಿಡುಗಡೆಗೊಂಡಿದೆ. ಇತಿಹಾಸವನ್ನು ರೂಪಿಸಿದ ಸಾಮ್ರಾಜ್ಯ, ಒಂದು ಯುಗವನ್ನು ವ್ಯಾಖ್ಯಾನಿಸಿದ ರಾಜ ಹಾಗೂ ಕಾಲವನ್ನು ಮೀರಿದ ದಂತಕಥೆಯ ಪರಿಕಲ್ಪನೆಯೊಂದಿಗೆ ಈ ಚಿತ್ರದ ಶೀರ್ಷಿಕೆ ಅನಾವರಣಗೊಂಡಿದ್ದು, ಸ್ಯಾಂಡಲ್‌ವುಡ್ ವಲಯದಲ್ಲಿ ಭಾರೀ ಸಂಚಲನ ಸೃಷ್ಟಿಸಿದೆ.

ಸುದೀಪ್​ ಅವರನ್ನು ಒಮ್ಮೆಯಾದರೂ ಐತಿಹಾಸಿಪಾತ್ರದಲ್ಲಿ ನೋಡಬೇಕೆಂದು ಅಭಿಮಾನಿಗಳು ಬಯಸಿದ್ದರು. ಬಹುದಿನಗ ಆ ಬಯಕ ಇದೀಗ ನನಸಾಗಿದೆ. ಐತಿಹಾಸಿಕ ಪಾತ್ರ ಮಾಡುತ್ತಿರುವುದಾಗಿ ಸ್ವತಃ ಸುದೀಪ್​ ಕೂಡ ಈ ಹಿಂದೆ ಹೇಳಿದ್ದರು. ಕೊನೆಗೂ ಆ ಐತಿಹಾಸಿಕ ಪಾತ್ರದ ಝಲಕ್ ಅನಾವರಣಗೊಂಡಿದೆ. ಅಭಿಮಾನಿಗಳಿಗೆ ಹುಟ್ಟುಹಬ್ಬದ ಸಂಭ್ರಮವನ್ನು ದುಪ್ಪಟ್ಟಾಗಿಸಿದೆ.​