ನಾನು ಹನುಮಂತನ ಮಗಳೆಂದು ಹೇಳಿಕೊಳ್ಳುವುದೇ ನನಗೆ ಹೆಮ್ಮೆ! ನಟಿ ಅನಸೂಯಾ ಕಾಮೆಂಟ್​ ವೈರಲ್​...Anasuya Bharadwaj

Anasuya Bharadwaj : ಕಿರುತೆರೆಯಲ್ಲಿ ಸ್ಟಾರ್ ನಿರೂಪಕಿಯಾಗಿ ಧೂಳೆಬ್ಬಿಸಿ, ಬಳಿಕ ಬೆಳ್ಳಿತೆರೆಯಲ್ಲಿ ಬ್ಯಾಕ್-ಟು-ಬ್ಯಾಕ್ ಹಿಟ್ ನೀಡುತ್ತಾ ಸದ್ಯ ಚಿತ್ರರಂಗದ ಮೋಸ್ಟ್ ವಾಂಟೆಡ್ ನಟಿಯಾಗಿ ಹೊರಹೊಮ್ಮಿರುವ ಅನಸೂಯಾ ಭಾರದ್ವಾಜ್, ಸಿನಿಮಾದಿಂದಾಚೆಗೆ ಸದಾಕಾಲ ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ಗಳ ಮೂಲಕವೇ ಜಾಲತಾಣಗಳಲ್ಲಿ ಸಖತ್​ ಸದ್ದು ಮಾಡುತ್ತಿರುತ್ತಾರೆ. ಇದರ ನಡುವೆ ತಾನು ಹಿಂದೂ ಧರ್ಮ ಹಾಗೂ ಸನಾತನ ಧರ್ಮವನ್ನು ಅವಮಾನಿಸಿದ್ದೇನೆ ಎಂದು ತನ್ನ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯವಸ್ಥಿತವಾಗಿ ನಡೆಯುತ್ತಿರುವ ಅಪಪ್ರಚಾರದ ಕುರಿತು ಅನಸೂಯಾ ಇತ್ತೀಚೆಗೆ ತಮ್ಮದೇ ಆದ ಶೈಲಿಯಲ್ಲಿ ತಿರುಗೇಟು ನೀಡಿದ್ದಾರೆ.

ನಾನು ಹಿಂದೂ ಧರ್ಮ ಹಾಗೂ ಸನಾತನ ಧರ್ಮದ ವಿರುದ್ಧ ಅಪಪ್ರಚಾರ ಮಾಡುತ್ತಿದ್ದೇನೆ ಎಂದು ಕೆಲವರು ಪೂರ್ಣ ವಿಡಿಯೋವನ್ನು ಮರೆಮಾಚಿ, ಕೇವಲ ಕೆಲವೇ ಸೆಕೆಂಡ್‌ಗಳ ತುಣುಕನ್ನು ಮಾತ್ರ ಎಡಿಟ್ ಮಾಡಿ ಸುಳ್ಳು ಆರೋಪ ಹೊರಿಸುತ್ತಿರುವುದಕ್ಕೆ ನಟಿ ಅನಸೂಯಾ ಭಾರದ್ವಾಜ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ನಾನೆಂದಿಗೂ ಹಿಂದೂ ಧರ್ಮವನ್ನಾಗಲಿ ಅಥವಾ ಸನಾತನ ಧರ್ಮವನ್ನಾಗಲಿ ಅವಮಾನಿಸಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಕೆಲವರು ನನ್ನ ಮಾತನ್ನು ತಪ್ಪಾಗಿ ಅರ್ಥೈಸಿಕೊಂಡು ಎಲ್ಲರನ್ನು ದಾರಿ ತಪ್ಪಿಸುತ್ತಿದ್ದಾರೆ ಎಂದಿರುವ ಅನಸೂಯಾ, ನನ್ನನ್ನು ವೈಯಕ್ತಿಕವಾಗಿ ನಿಂದಿಸುವವರಿಗೆ ಅಥವಾ ಬೆದರಿಕೆ ಹಾಕುವವರಿಗೆ ನಾನು ಆ ಮಾತುಗಳನ್ನು ಆಡಿರಲಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ. ಬದಲಿಗೆ, ಯಾವುದೇ ಧರ್ಮವನ್ನು ಗುರಿಯಾಗಿಸಿ ಅಪಪ್ರಚಾರ ಮಾಡುವವರ ಉದ್ದೇಶವನ್ನು ಪ್ರಶ್ನಿಸಿದ್ದೇನೆ ಎಂದು ತಿಳಿಸಿದ್ದು, ಇನ್ಮುಂದೆ ತಾನೊಬ್ಬ ಸನಾತನಿ ಹಾಗೂ ಹಿಂದೂ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವುದಾಗಿ ತಿಳಿಸಿದ್ದಾರೆ.

ಸನಾತನ ಧರ್ಮವು ತನಗೆ ಧೈರ್ಯವಾಗಿರಲು, ಸತ್ಯದ ಪರ ನಿಲ್ಲಲು ಮತ್ತು ಇತರರನ್ನು ಗೌರವಿಸಲು ಕಲಿಸಿದೆ ಎಂದು ತಿಳಿಸಿರುವ ಅನಸೂಯಾ, ತಮ್ಮ ಧರ್ಮ, ನಂಬಿಕೆ ಮತ್ತು ಮೌಲ್ಯಗಳು ಚೆನ್ನಾಗಿ ತಿಳಿದಿವೆ ಎಂದಿದ್ದಾರೆ. ಈ ವಿಚಾರದಲ್ಲಿ ನಾನು ಯಾರಿಗೂ ಕ್ಷಮೆ ಯಾಚಿಸುವ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಿರುವ ಅನಸೂಯಾ, ತಾನೊಬ್ಬ ಹನುಮಂತನ ಮಗಳು ಎಂದು ಹೇಳಿಕೊಳ್ಳುವುದೇ ನನಗೆ ಹೆಮ್ಮೆ ಎಂದು ಬಣ್ಣಿಸಿದ್ದಾರೆ.

ಕೆಲವರು ನನ್ನ ಮಾತನ್ನು ತಿರುಚಿ, ಅನಸೂಯಾ ಹಿಂದೂ ಧರ್ಮದ ವಿರುದ್ಧ ಮಾತನಾಡಿದ್ದಾರೆ ಎಂದು ಬಿಂಬಿಸಿರುವುದು ಸಂಪೂರ್ಣ ತಪ್ಪು ಎಂದು ಖಂಡಿಸಿರುವ ಅನಸೂಯಾ, ಯಾರನ್ನೂ ಧರ್ಮದ ಆಧಾರದ ಮೇಲೆ ನಾನು ನಿರ್ಧರಿಸಿಲ್ಲ ಎಂದಿದ್ದಾರೆ. ಅರ್ಧಕ್ಕೆ ಎಡಿಟ್ ಮಾಡಿದ ಕ್ಲಿಪ್‌ಗಳನ್ನು ನೋಡಿ ಯಾರೂ ತಪ್ಪು ಕಲ್ಪನೆಗೆ ಬಾರದೆ, ಯಾವ ಸಂದರ್ಭದಲ್ಲಿ ಮಾತನಾಡಲಾಗಿದೆ ಎಂಬುದನ್ನು ಸಂಪೂರ್ಣವಾಗಿ ತಿಳಿದುಕೊಳ್ಳುವಂತೆ ಇದೇ ವೇಳೆ ಮನವಿ ಮಾಡಿದ್ದಾರೆ.

ಯಾವುದೇ ಜಾತಿ ಅಥವಾ ಧರ್ಮವನ್ನು ಅಗೌರವಿಸುವುದು ತಪ್ಪು ಎಂದು ಅಭಿಪ್ರಾಯಪಟ್ಟಿರುವ ಅನಸೂಯಾ, ಕೊನೆಯಲ್ಲಿ "ಜೈ ಶ್ರೀ ರಾಮ್, ಜೈ ಹನುಮಾನ್" ಎಂದು ಬರೆದು ತಮ್ಮ ಸ್ಪಷ್ಟನೆಯನ್ನು ಮುಕ್ತಾಯಗೊಳಿಸಿದ್ದಾರೆ. ಸನಾತನಿ ಅಥವಾ ಹಿಂದೂಗಳನ್ನು ತಾನು ಎಂದಿಗೂ ಅವಮಾನಿಸಿಲ್ಲ ಎಂದು ಸ್ಪಷ್ಟನೆ ನೀಡಿರುವ ಅನಸೂಯಾ ಅವರ ಮೇಲಿನ ಟೀಕೆಗಳ ಸುರಿಮಳೆ ಇನ್ಮುಂದೆಯಾದರೂ ನಿಲ್ಲುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ, (ಏಜೆನ್ಸೀಸ್​).