ಬೆತ್ತಲಾಗಿದ್ದೇನೆ ಎಂದು ಸನ್ನಿ ಹೇಳಿದ ಮಾತು ಕೇಳಿ ತಂದೆ-ತಾಯಿಯ ಪ್ರತಿಕ್ರಿಯೆ ಹೇಗಿತ್ತು? ಯಶಸ್ಸು ಸಾಧಿಸು ಎಂದಿದ್ದೇಕೆ ಅಪ್ಪ? Sunny Leone

Sunny Leone : ಮಾಜಿ ನೀಲಿ ತಾರೆ ಹಾಗೂ ಬಾಲಿವುಡ್ ನಟಿ ಸನ್ನಿ ಲಿಯೋನ್ ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ಎದುರಿಸಿದ ಕಠಿಣ ಸವಾಲುಗಳು ಮತ್ತು ಇದರಿಂದ ತಮ್ಮ ಕುಟುಂಬ ಅನುಭವಿಸಿದ ನೋವಿನ ಬಗ್ಗೆ ಇದೀಗ ಮುಕ್ತವಾಗಿ ಮಾತನಾಡಿದ್ದಾರೆ.

ತಮ್ಮ ಜೀವನಚರಿತ್ರೆ ಆಧರಿಸಿದ 'ಕರಂಜಿತ್ ಕೌರ್: ದಿ ಅನ್ಟೋಲ್ಡ್ ಸ್ಟೋರಿ ಆಫ್ ಸನ್ನಿ ಲಿಯೋನ್' ವೆಬ್ ಸೀರಿಸ್ ಮೂಲಕ ಅವರು ಈ ನೋವಿನ ಕಥೆಯನ್ನು ಹಂಚಿಕೊಂಡಿದ್ದು, ವಯಸ್ಕರ ಮನರಂಜನಾ ಉದ್ಯಮಕ್ಕೆ ತಾವು ಕಾಲಿಟ್ಟಾಗ ತಾಯಿ ಹಾಗೂ ಕುಟುಂಬದವರು ಅನುಭವಿಸಿದ ಆಘಾತ ಮತ್ತು ಒಂಟಿತನದ ಬಗ್ಗೆ ಭಾವುಕರಾಗಿ ಸ್ಮರಿಸಿದ್ದಾರೆ.

ತಮ್ಮ ತಂದೆ-ತಾಯಿಗೆ ಈ ವಿಷಯವನ್ನು ತಿಳಿಸುವುದು ತಮಗೆ ಜೀವನದಲ್ಲೇ ಅತ್ಯಂತ ಕಷ್ಟಕರವಾಗಿತ್ತು ಎಂದು ಸನ್ನಿ ಹೇಳಿದ್ದಾರೆ. ಈ ಆಘಾತವನ್ನು ಕಡಿಮೆ ಮಾಡಲು, ತಮಗೆ ಪ್ರತಿಷ್ಠಿತ 'ಪೆಂಟಹೌಸ್ ಪೆಟ್ ಆಫ್ ದಿ ಇಯರ್' ಪ್ರಶಸ್ತಿ ಮತ್ತು 100,000 ಡಾಲರ್ ಬಹುಮಾನ ಬಂದಿದೆ ಎಂಬ ಒಳ್ಳೆಯ ಸುದ್ದಿಯೊಂದಿಗೆ ವಿಷಯವನ್ನು ತಿಳಿಸಿದ್ದಾಗಿ ಸನ್ನಿ ಲಿಯೋನ್​ ಹೇಳಿದ್ದಾರೆ.

ಈ ಸುದ್ದಿಯನ್ನು ಕೇಳಿದ ನನ್ನ ತಂದೆ-ತಾಯಿ ಸಂಪೂರ್ಣವಾಗಿ ಮೌನಕ್ಕೆ ಜಾರಿದರು. ಇದಾದ ಬಳಿಕ ಆಘಾತದಿಂದಲೇ ಮಾತನಾಡಿದ ನನ್ನ ತಾಯಿ, ನೀನು ಬೆತ್ತಲಾಗಿದ್ದೀಯಾ? ಎಂದು ಪ್ರಶ್ನಿಸಿ ಕಣ್ಣೀರಿಟ್ಟರು. ಅಲ್ಲದೆ, ತಮ್ಮ ನಿಜವಾದ ಹೆಸರಾದ ಕರಂಜಿತ್ ಕೌರ್ ಬದಲಿಗೆ 'ಸನ್ನಿ ಲಿಯೋನ್' ಎಂಬ ಹೆಸರನ್ನು ಆರಿಸಿಕೊಂಡಿದ್ದಕ್ಕೆ ತಾಯಿ ಹೆಚ್ಚು ಬೇಸರ ವ್ಯಕ್ತಪಡಿಸಿದರು ಎಂದು ಮಾಜಿ ನೀಲಿ ತಾರೆ ತಮ್ಮ ನೋವು ತೋಡಿಕೊಂಡಿದ್ದಾರೆ.

ಕುಟುಂಬದವರನ್ನು ಕೇಳದೆ ಇಂತಹ ದೊಡ್ಡ ನಿರ್ಧಾರ ತೆಗೆದುಕೊಂಡಿದ್ದಕ್ಕೆ ತಂದೆಗೆ ತೀವ್ರ ಕೋಪ ಮತ್ತು ಬೇಸರವಾಯಿತು. ಮಗಳು ನಮ್ಮಿಂದ ಶಾಶ್ವತವಾಗಿ ದೂರವಾಗಬಹುದು ಎಂಬ ಭಯದಿಂದ ತಂದೆ-ತಾಯಿ ಯಾವುದೇ ಕಠಿಣ ಕ್ರಮ ಕೈಗೊಳ್ಳಲಿಲ್ಲವಾದರೂ, ನೀನು ಈ ದಾರಿಯನ್ನೇ ಆರಿಸಿಕೊಂಡ ಮೇಲೆ, ಅದರಲ್ಲಿ ಯಶಸ್ಸನ್ನು ಸಾಧಿಸು ಎಂದು ತಂದೆ ಬೆಂಬಲ ಸೂಚಿಸಿದರು. ನನ್ನ ತಂದೆ ಆಗಾಗ ಏಕಾಂಗಿಯಾಗಿ ಕುಳಿತು ಕಣ್ಣೀರು ಹಾಕುತ್ತಿದ್ದರು ಎಂದು ನನ್ನ ತಾಯಿ ಹೇಳಿದರು ಎಂದು ಸನ್ನಿ ಲಿಯೋನ್​ ತಿಳಿಸಿದ್ದಾರೆ.

ಆರ್ಥಿಕ ಭದ್ರತೆಯೇ ತಾನು ಈ ಕ್ಷೇತ್ರವನ್ನು ಆಯ್ಕೆ ಮಾಡಲು ಮುಖ್ಯ ಕಾರಣ ಎಂದು ಸನ್ನಿ ತಿಳಿಸಿದ್ದಾರೆ. ಯಾವುದೇ ಕುಟುಂಬದ ಸಹಾಯವಿಲ್ಲದೆ ಸ್ವಾವಲಂಬಿಯಾಗಲು ಹಾಗೂ ವಾರಕ್ಕೆ 10,000 ದಿಂದ 15,000 ಡಾಲರ್ ಗಳಿಸಲು ಈ ಉದ್ಯಮವು ಅವರಿಗೆ ನೆರವಾಯಿತು ಎಂದು ಹೇಳಿದ್ದಾರೆ. ಸನ್ನಿಯ ಈ ನಿರ್ಧಾರದಿಂದಾಗಿ ಕುಟುಂಬವು ಸಮಾಜದಲ್ಲಿ ತೀವ್ರ ಬಹಿಷ್ಕಾರ ಮತ್ತು ಅಪಹಾಸ್ಯವನ್ನು ಎದುರಿಸಬೇಕಾಯಿತು. ಸಂಬಂಧಿಕರು ಮತ್ತು ಸ್ನೇಹಿತರು ಅವರೊಂದಿಗೆ ಎಲ್ಲಾ ಸಂಬಂಧಗಳನ್ನು ಕಡಿದುಕೊಂಡರೂ, ಸನ್ನಿ ಮಾತ್ರ ತಮ್ಮ ನಿರ್ಧಾರಕ್ಕೆ ಬದ್ಧರಾಗಿದ್ದರು ಮತ್ತು ತಾವು ಮಾಡಿದ್ದಕ್ಕೆ ಯಾವುದೇ ಪಶ್ಚಾತಾಪವಿಲ್ಲ ಎಂದು ಹೇಳಿದ್ದಾರೆ.

ನೀಲಿ ಲೋಕಕ್ಕೆ ಗುಡ್​ ಬೈ ಹೇಳಿದ ಸನ್ನಿ ಲಿಯೋನ್​, 2012ರಲ್ಲಿ ಬಾಲಿವುಡ್‌ಗೆ ಪ್ರವೇಶಿಸಿ, ಹಲವಾರು ಹಿಟ್ ಸಿನಿಮಾಗಳು ಮತ್ತು ಹಾಡುಗಳ ಮೂಲಕ ಭಾರತದಾದ್ಯಂತ ಜನಪ್ರಿಯತೆ ಗಳಿಸಿದರು. ಕಠಿಣ ಸವಾಲುಗಳು ಮತ್ತು ಸಾಮಾಜಿಕ ಅಡೆತಡೆಗಳನ್ನು ಮೆಟ್ಟಿ ನಿಂತು, ಇಂದು ಬಾಲಿವುಡ್‌ನ ಪ್ರಮುಖ ತಾರೆಯಾಗಿ ಹಾಗೂ ಯಶಸ್ವಿ ಉದ್ಯಮಿಯಾಗಿ ಹೊರಹೊಮ್ಮಿದ್ದಾರೆ, (ಏಜೆನ್ಸೀಸ್​).