ನಾನು ರಾಜೇಶ್ ಖನ್ನಾ ಪತ್ನಿ: ಅನಿತಾ ಅಡ್ವಾನಿ ಅರ್ಜಿ ವಜಾ ಮಾಡಿದ ಬಾಂಬೆ ಹೈಕೋರ್ಟ್​! Anita Advani and Rajesh Khanna

ಮುಂಬೈ: ಬಾಲಿವುಡ್ ಕಂಡ ಅಪ್ರತಿಮ ನಟ, ಲಕ್ಷಾಂತರ ಹೆಣ್ಣುಮಕ್ಕಳ ಕನಸಿನ ರಾಜಕುಮಾರನಾಗಿದ್ದ ದಿವಂಗತ ರಾಜೇಶ್ ಖನ್ನಾ ಅವರ ಜೀವನ ಸದಾ ಕುತೂಹಲಕಾರಿ. 2012ರಲ್ಲಿ ಅವರು ಇಹಲೋಕ ತ್ಯಜಿಸಿದ ನಂತರ, ಅವರ ಆಶೀರ್ವಾದ್ ಬಂಗಲೆ ಮತ್ತು ಅವರೊಂದಿಗಿನ ಸಂಬಂಧದ ಬಗ್ಗೆ ನಟಿ ಅನಿತಾ ಅಡ್ವಾಣಿ (Anita Advani and Rajesh Khanna) ಸುದೀರ್ಘ ಕಾನೂನು ಹೋರಾಟ ನಡೆಸುತ್ತಿದ್ದರು. ಆದರೆ, ಈಗ ಬಾಂಬೆ ಹೈಕೋರ್ಟ್ ಅನಿತಾ ಅವರ ಅರ್ಜಿಯನ್ನು ವಜಾಗೊಳಿಸುವ ಮೂಲಕ ಅವರ ಎಲ್ಲ ಹಕ್ಕುಗಳನ್ನು ತಿರಸ್ಕರಿಸಿದೆ.

ರಾಜೇಶ್ ಖನ್ನಾ ಅವರು ನಿಧನರಾಗುವ ಮುನ್ನ ಸುಮಾರು ಒಂದು ದಶಕಕ್ಕೂ ಹೆಚ್ಚು ಕಾಲ ತಾವು ಅವರೊಂದಿಗೆ ಲಿವ್-ಇನ್ ಸಂಬಂಧದಲ್ಲಿದ್ದೆ ಎಂದು ಅನಿತಾ ಅಡ್ವಾಣಿ ವಾದಿಸಿದ್ದರು. ಅಷ್ಟೇ ಅಲ್ಲದೆ, ತಮಗೆ ರಾಜೇಶ್ ಖನ್ನಾ ಅವರ ಪತ್ನಿಯಾಗಿ ಕಾನೂನುಬದ್ಧ ಮಾನ್ಯತೆ ನೀಡಬೇಕು ಮತ್ತು ಅವರ ಆಸ್ತಿಯಲ್ಲಿ ಪಾಲು ಬೇಕು ಎಂದು ಅವರು ನ್ಯಾಯಾಲಯದ ಮೆಟ್ಟಿಲೇರಿದ್ದರು. 2017ರಲ್ಲಿ ಮುಂಬೈನ ಸಿವಿಲ್ ನ್ಯಾಯಾಲಯವು ಇವರ ಅರ್ಜಿಯನ್ನು ವಜಾಗೊಳಿಸಿತ್ತು. ಇದನ್ನು ಪ್ರಶ್ನಿಸಿ ಅನಿತಾ ಹೈಕೋರ್ಟ್ ಮೆಟ್ಟಿಲೇರಿದ್ದರು.

ನ್ಯಾಯಮೂರ್ತಿ ಶರ್ಮಿಳಾ ದೇಶಮುಖ್ ಅವರಿದ್ದ ನ್ಯಾಯಪೀಠವು ಈ ಅರ್ಜಿಯ ವಿಚಾರಣೆ ನಡೆಸಿ, ಅನಿತಾ ಅಡ್ವಾಣಿ ಅವರ ಹಕ್ಕುಗಳಿಗೆ ಯಾವುದೇ ಕಾನೂನು ಆಧಾರವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಅನಿತಾ ಮತ್ತು ರಾಜೇಶ್ ಖನ್ನಾ ಅವರ ನಡುವಿನ ಸಂಬಂಧವು ಮದುವೆಯಂತಹ ವ್ಯವಸ್ಥೆಯ ಮಾನದಂಡಗಳನ್ನು ಪೂರೈಸುವುದಿಲ್ಲ ಎಂದು ಕೋರ್ಟ್ ಅಭಿಪ್ರಾಯಪಟ್ಟಿದೆ. ಈ ಮೂಲಕ ರಾಜೇಶ್ ಖನ್ನಾ ಕುಟುಂಬದ ವಿರುದ್ಧ ಅನಿತಾ ನಡೆಸುತ್ತಿದ್ದ ಸುದೀರ್ಘ ಹೋರಾಟಕ್ಕೆ ಹಿನ್ನಡೆಯಾಗಿದೆ.

ಈ ಪ್ರಕರಣದಲ್ಲಿ ರಾಜೇಶ್ ಖನ್ನಾ ಅವರ ಪತ್ನಿ ಡಿಂಪಲ್ ಕಪಾಡಿಯಾ, ಪುತ್ರಿ ಟ್ವಿಂಕಲ್ ಖನ್ನಾ ಮತ್ತು ಅಳಿಯ ಅಕ್ಷಯ್ ಕುಮಾರ್ ಪರವಾಗಿ ವಕೀಲರು ಬಲವಾದ ವಾದ ಮಂಡಿಸಿದ್ದರು. ಅನಿತಾ ಅಡ್ವಾಣಿ ಅವರು ಎಂದಿಗೂ ರಾಜೇಶ್ ಖನ್ನಾ ಅವರ ಮದುವೆಯಾಗಿಲ್ಲ ಅಥವಾ ಕಾನೂನುಬದ್ಧ ಪಾಲುದಾರರಾಗಿರಲಿಲ್ಲ ಎಂದು ಕುಟುಂಬವು ದೃಢವಾಗಿ ನಿರಾಕರಿಸಿತ್ತು. ರಾಜೇಶ್ ಖನ್ನಾ ಅವರ ಐತಿಹಾಸಿಕ ಆಶೀರ್ವಾದ್ ಬಂಗಲೆಯಿಂದ ತಮ್ಮನ್ನು ಬಲವಂತವಾಗಿ ಹೊರಹಾಕಲಾಗಿದೆ ಎಂಬ ಅನಿತಾ ಅವರ ಆರೋಪವನ್ನೂ ಕುಟುಂಬವು ತಳ್ಳಿಹಾಕಿತ್ತು.

2012ರಲ್ಲಿ ರಾಜೇಶ್ ಖನ್ನಾ ನಿಧನರಾದ ತಕ್ಷಣವೇ ಅನಿತಾ ಅಡ್ವಾಣಿ ಕೌಟುಂಬಿಕ ಹಿಂಸಾಚಾರ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದರು. ಆದರೆ 2015ರಲ್ಲಿಯೇ ಹೈಕೋರ್ಟ್ ಈ ಪ್ರಕರಣವನ್ನು ರದ್ದುಗೊಳಿಸಿತ್ತು. ಅಂದು ನ್ಯಾಯಾಲಯವು ಕೇವಲ ಸಂಬಂಧದಲ್ಲಿದ್ದ ಮಾತ್ರಕ್ಕೆ ಅದನ್ನು ಮದುವೆ ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಹೇಳಿತ್ತು. ಈಗಿನ ತೀರ್ಪು ಆ ಹಳೆಯ ತೀರ್ಪನ್ನೇ ಎತ್ತಿ ಹಿಡಿದಿದೆ.

1973ರಲ್ಲಿ ಡಿಂಪಲ್ ಕಪಾಡಿಯಾ ಅವರನ್ನು ವಿವಾಹವಾಗಿದ್ದ ರಾಜೇಶ್ ಖನ್ನಾ, ಬಾಲಿವುಡ್‌ನ ಸತತ 15 ಹಿಟ್ ಚಿತ್ರಗಳನ್ನು ನೀಡಿದ ಏಕೈಕ ನಟ. 100ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಅವರಿಗೆ ಭಾರತ ಸರ್ಕಾರ ಮರಣೋತ್ತರವಾಗಿ ಪದ್ಮಭೂಷಣ ನೀಡಿ ಗೌರವಿಸಿದೆ. ಇಂತಹ ಮಹಾನ್ ನಟನ ವೈಯಕ್ತಿಕ ಜೀವನದ ಸುತ್ತಲಿನ ಈ ವಿವಾದಾತ್ಮಕ ಅಧ್ಯಾಯವು ಈಗ ಈ ಕೋರ್ಟ್ ತೀರ್ಪಿನೊಂದಿಗೆ ಬಹುತೇಕ ಅಂತ್ಯಗೊಂಡಂತಿದೆ,(ಏಜನ್ಸೀಸ್​).