ಬಿರುಗಾಳಿಯ ಬ್ಯಾಟಿಂಗ್​ ಆಡಿ ಟಿ20 ನಾಯಕ ಸೂರ್ಯಕುಮಾರ್​ ಬುಡಕ್ಕೆ ತಂದಿಟ್ಟ ವೈಭವ್: ಬಿಸಿಸಿಐಗೆ ತಲೆನೋವು! Vaibhav Sooryavanshi

Vaibhav Sooryavanshi : ಪ್ರಸ್ತುತ ನಡೆಯುತ್ತಿರುವ 19ನೇ ಆವೃತ್ತಿಯ ಐಪಿಎಲ್​ನಲ್ಲಿ 15 ವರ್ಷದ ಯುವ ಸೆನ್ಸೇಷನ್ ವೈಭವ್​ ಸೂರ್ಯವಂಶಿ ಭರ್ಜರಿ ಬ್ಯಾಟಿಂಗ್​ ಪ್ರದರ್ಶನ ನೀಡುತ್ತಿರುವುದು ಎಲ್ಲರಿಗೂ ಗೊತ್ತೇ ಇದೆ. ಈಗಾಗಲೇ ತಮ್ಮ ಬ್ಯಾಟಿಂಗ್​ ಬತ್ತಳಿಕೆಯಿಂದ ಎರಡು ಆಕರ್ಷಕ ಅರ್ಧಶತಕಗಳು ಬಂದಿವೆ. ವಿಶ್ವದರ್ಜೆಯ ಬೌಲರ್​ಗಳನ್ನು ಬೆಂಡೆತ್ತುತ್ತಿದ್ದಾರೆ. ಹೀಗಾಗಿ, ಭಾರತದ ಹಿರಿಯ ತಂಡಕ್ಕೆ ವೈಭವ್​ರನ್ನು ಆಯ್ಕೆ ಮಾಡಬೇಕೆಂಬ ಕೂಗು ಎಲ್ಲೆಡೆ ಜೋರಾಗಿ ಕೇಳಿಬರುತ್ತಿದ್ದು, ಬಿಸಿಸಿಐ ಆಯ್ಕೆ ಸಮಿತಿಯು ಕೂಡ ವೈಭವ್​ ಪ್ರದರ್ಶನದ ಮೇಲೆ ದೃಷ್ಟಿ ನೆಟ್ಟಿದೆ.

ಅಂದಹಾಗೆ, ಮುಂಬರುವ ಐರ್ಲೆಂಡ್​ ಪ್ರವಾಸದಲ್ಲಿ ವೈಭವ್ ಪಾದರ್ಪಣೆ ಮಾಡಲಿದ್ದಾರೆ ಎಂಬ ವರದಿಗಳಿವೆ. ಒಂದು ವೇಳೆ ಇದು ನಿಜವಾದರೆ, ಸೂರ್ಯಕುಮಾರ್​, ಸಂಜು ಸ್ಯಾಮ್ಸನ್​ ಹಾಗೂ ಅಭಿಷೇಕ್​ ಶರ್ಮಾ ಅವರ ಅಭಿಮಾನಿಗಳಿಗೆ ಬ್ಯಾಡ್​ ನ್ಯೂಸ್​ ಸಿಕ್ಕರೂ ಅಚ್ಚರಿ ಪಡಬೇಕಿಲ್ಲ. ಏಕೆಂದರೆ, ವೈಭವ್​ ಬಂದರೆ, ತಂಡದ ಸಂಯೋಜನೆಯಲ್ಲಿ ಭಾರಿ ಗೊಂದಲ ಸೃಷ್ಟಿಯಾಗಲಿದೆ. ಪಿಟಿಐ ವರದಿಯ ಪ್ರಕಾರ, ಐರ್ಲೆಂಡ್​ ಪ್ರವಾಸಕ್ಕೆ ಶಾರ್ಟ್​ಲಿಸ್ಟ್​ ಮಾಡಿರುವ 35 ಟಿ20 ಸ್ಪೆಷಲಿಸ್ಟ್​ಗಳಲ್ಲಿ ವೈಭವ್ ಕೂಡ ಇದಾರೆ.

ಅಂದಹಾಗೆ, ಭಾರತ ತಂಡವು ಮೊದಲ ಬಾರಿಗೆ ಐರ್ಲೆಂಡ್‌ಗೆ ಭೇಟಿ ನೀಡುತ್ತಿರುವುದರಿಂದ, ಆಟಗಾರರಿಗೆ ಪ್ರತ್ಯೇಕವಾದ ಐರ್ಲೆಂಡ್ ವೀಸಾ ಅತ್ಯಗತ್ಯವಾಗಿದೆ (ಯುಕೆ ವೀಸಾ ಇಲ್ಲಿ ನಡೆಯುವುದಿಲ್ಲ). ಈ ಹಿನ್ನೆಲೆಯಲ್ಲಿ, ವೀಸಾ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಕನಿಷ್ಠ 35 ಆಟಗಾರರ ಪಟ್ಟಿಯನ್ನು ನೀಡುವಂತೆ ಬಿಸಿಸಿಐ ಲಾಜಿಸ್ಟಿಕ್ಸ್ ವಿಭಾಗವು ಆಯ್ಕೆಗಾರರಿಗೆ ಸೂಚಿಸಿದೆ ಎಂದು ಪಿಟಿಐ ವರದಿ ಮಾಡಿದೆ.

ಪ್ರಸ್ತುತ ಭಾರತ ತಂಡದಲ್ಲಿ ಅಭಿಷೇಕ್​ ಶರ್ಮಾ, ಸಂಜು ಸ್ಯಾಮ್ಸನ್​ ಹಾಗೂ ಇಶಾನ್​ ಕಿಶನ್​ರಂತಹ ಪ್ರಮುಖ ಆರಂಭಿಕ ಆಟಗಾರರಿದ್ದಾರೆ. ಇದೀಗ ಸೂರ್ಯವಂಶಿ ಎಂಟ್ರಿಯಾದರೆ, ಈ ಮೂವರಲ್ಲಿ ಒಬ್ಬರು ತಂಡದಿಂದ ಹೊರಗುಳಿಯಬೇಕಾಗುತ್ತದೆ. ವೈಭವ್​, ಹಿರಿಯ ತಂಡದಲ್ಲಿ ಆಡಲು ಸಂಪೂರ್ಣ ಸಜ್ಜಾಗಿರುವುದು ಬಿಸಿಸಿಐಗೆ ಮನವರಿಕೆಯಾಗಿದೆ. ಆದರೆ, ಇತ್ತೀಚೆಗೆ ಮುಗಿದ ಟಿ20 ವಿಶ್ವಕಪ್​ ಫೈನಲ್​ನಲ್ಲಿ ಸಂಜು, ಅಭಿ ಮತ್ತು ಇಶಾನ್​ ಅರ್ಧ ಶತಕ ಬಾರಿಸಿದ್ದಾರೆ. ಅಲ್ಲದೆ, ಪ್ರಸ್ತುತ ನಡೆಯುತ್ತಿರುವ ಐಪಿಎಲ್​ನಲ್ಲೂ ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ. ಹೀಗಾಗಿ, ಅವರನ್ನೂ ಕಡೆಗಣಿಸುವಂತಿಲ್ಲ. ಇದರ ನಡುವೆ ಮತ್ತೊಬ್ಬ ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್​ ಕೂಡ ಅತ್ಯದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ. ಹೀಗಾಗಿ, ಬಿಸಿಸಿಐ ಆಯ್ಕೆ ಸಮಿತಿ ಯಾರನ್ನು ಆಯ್ಕೆ ಮಾಡಬೇಕು? ಯಾರನ್ನು ಬಿಡಬೇಕು? ಎಂಬ ಗೊಂದಲದಲ್ಲಿ ಸಿಲುಕುವುದು ಖಚಿತ ಎನ್ನಲಾಗುತ್ತಿದೆ.

ಭಾರತ ತಂಡದಲ್ಲಿ ವೈಭವ್ ಸೂರ್ಯವಂಶಿ ಅವರಂತಹ ಹೊಸ ಆಟಗಾರರಿಗೆ ಅವಕಾಶ ನೀಡುವ ಚರ್ಚೆ ನಡೆಯುತ್ತಿದೆ. ಆದರೆ, ಅಭಿಷೇಕ್ ಶರ್ಮಾ ಅಥವಾ ಸಂಜು ಸ್ಯಾಮ್ಸನ್ ಅವರಂತಹ ಆಟಗಾರರನ್ನು ತಂಡದಿಂದ ಕೈಬಿಡುವುದು ಆಯ್ಕೆದಾರರಿಗೆ ದೊಡ್ಡ ಸವಾಲಾಗಲಿದೆ. ಈ ಇಬ್ಬರಲ್ಲಿ ಯಾರನ್ನಾದರೂ ಕೈಬಿಟ್ಟರೆ, ಅದು ನೇರವಾಗಿ ನಾಯಕ ಸೂರ್ಯಕುಮಾರ್ ಯಾದವ್ ಅವರ ಸ್ಥಾನದ ಮೇಲೆ ಪ್ರಶ್ನೆಗಳು ಏಳುವಂತೆ ಮಾಡುತ್ತದೆ. ಇದಕ್ಕೆ ಮುಖ್ಯ ಕಾರಣ ಸೂರ್ಯಕುಮಾರ್ ಅವರ ಇತ್ತೀಚಿನ ಕಳಪೆ ಫಾರ್ಮ್.

2024ರ ಟಿ20 ವಿಶ್ವಕಪ್ ನಂತರ ಸೂರ್ಯಕುಮಾರ್​, ಬ್ಯಾಟಿಂಗ್ ಸರಾಸರಿ 20ಕ್ಕಿಂತ ಕಡಿಮೆ ಇದೆ. ಹೀಗಾಗಿ, ಅಭಿಷೇಕ್ ಅಥವಾ ಸಂಜು ಅವರನ್ನು ತಂಡದಿಂದ ಹೊರಗಿಡಲು ಆಯ್ಕೆದಾರರು ಬಲವಾದ ಕಾರಣ ನೀಡಬೇಕಾಗುತ್ತದೆ. ಏಕೆಂದರೆ, ಅವರನ್ನು ಕೈಬಿಟ್ಟರೆ, ಸತತವಾಗಿ ವೈಫಲ್ಯ ಅನುಭವಿಸುತ್ತಿರುವ ಸೂರ್ಯಕುಮಾರ್ ಅವರು ಮಾತ್ರ ತಂಡದಲ್ಲಿ ಹೇಗೆ ಮುಂದುವರಿಯುತ್ತಿದ್ದಾರೆ ಎಂಬ ಪ್ರಶ್ನೆ ಎದುರಾಗುತ್ತದೆ. ಹೀಗಾಗಿ, ಬಿಸಿಸಿಐ ಆಯ್ಕೆ ಸಮಿತಿ ಇದೀಗ ಇಕ್ಕಟ್ಟಿಗೆ ಸಿಲುಕಿದೆ ಎಂದು ವರದಿಯಾಗಿದೆ. ಇದನ್ನು ಬಿಸಿಸಿಐ ಆಯ್ಕೆ ಸಮಿತಿ ಹೇಗೆ ನಿಭಾಯಿಸುತ್ತದೆ ಅನ್ನೋದನ್ನು ಕಾದು ನೋಡಬೇಕಿದೆ, (ಏಜೆನ್ಸೀಸ್​).