CSK ವಿರುದ್ಧ RCB ಭರ್ಜರಿ ಗೆಲುವು ದಾಖಲಿಸಿದ ಬೆನ್ನಲ್ಲೇ ಅನನ್ಯಾ ಬಿರ್ಲಾ ಐ ಲವ್​ ಯೂ ಅಂದಿದ್ದು ಯಾರಿಗೆ? Ananya Birla

Ananya Birla : ನಿನ್ನೆ ನಡೆದ ಹೈವೋಲ್ಟೇಜ್​ ಪಂದ್ಯದಲ್ಲಿ ಚೆನ್ನೈ ಸೂಪರ್​ ಕಿಂಗ್ಸ್​ ( CSK ) ವಿರುದ್ಧ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ( RCB ) ತಂಡ ಭರ್ಜರಿ ಜಯ ಸಾಧಿಸಿತು. ಈ ಮೂಲಕ 19ನೇ ಆವೃತ್ತಿಯ ಐಪಿಎಲ್​ ಟೂರ್ನಮೆಂಟ್​ನಲ್ಲಿ ಸತತ ಎರಡನೇ ಗೆಲುವು ದಾಖಲಿಸಿ, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೆ ಜಿಗಿಯಿತು. ನಿನ್ನೆ ಟಿಮ್​ ಡೇವಿಡ್​ ಅವರ ಸುನಾಮಿ ಬ್ಯಾಟಿಂಗ್​ ಒಂದೆಡೆಯಾದರೆ, ಇನ್ನೊಂದೆಡೆ ಆರ್​​ಸಿಬಿಯ ಒಡತಿ ಅನನ್ಯಾ ಬಿರ್ಲಾ ಹಾಗೂ ಟೆನಿಸ್​ ದಂತಕಥೆ ಸಾನಿಯಾ ಮಿರ್ಜಾ ವಿಶೇಷ ಗಮನ ಸೆಳೆದರು.

ಅಂದಹಾಗೆ, ಸನ್‌ರೈಸರ್ಸ್ ಹೈದರಾಬಾದ್ ( SRH ) ತಂಡದ ಒಡತಿ ಕಾವ್ಯಾ ಮಾರನ್ ಅವರ ಐಪಿಎಲ್ ಕ್ರೇಜ್ ಬಗ್ಗೆ ಮಾತನಾಡುವ ಅಗತ್ಯವಿಲ್ಲ. ತಮ್ಮ ತಂಡ ಆಡುವ ಪ್ರತಿಯೊಂದು ಪಂದ್ಯಕ್ಕೂ ಹಾಜರಾಗುತ್ತಾರೆ ಮತ್ತು ಆಟಗಾರರು ಹಾಗೂ ಅಭಿಮಾನಿಗಳನ್ನು ಹುರಿದುಂಬಿಸುತ್ತಾರೆ. ಎಸ್‌ಆರ್‌ಎಚ್ ತಂಡ ಗೆದ್ದರೂ ಅಥವಾ ಸೋತರೂ, ಕಾವ್ಯಾ ಮಾರನ್ ಅವರ ಹಾವಭಾವಗಳು ಮಾತ್ರ ಯಾವಾಗಲೂ ಹೈಲೈಟ್​ ಆಗುತ್ತಿರುತ್ತವೆ. ಇದೀಗ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿಯ ಮಾಲೀಕತ್ವದ ಭಾಗವಾಗಿರುವ ಅನನ್ಯ ಬಿರ್ಲಾ, ಕಾವ್ಯಾ ಮಾರನ್​ಗೆ ಸ್ಪರ್ಧಿಯಾಗಿ ಸೇರಿಕೊಂಡಿದ್ದಾರೆ. ವಿಶೇಷವಾಗಿ 19ನೇ ಆವೃತ್ತಿಯ ಉದ್ಘಾಟನಾ ಪಂದ್ಯದಲ್ಲಿ ಆರ್‌ಸಿಬಿ ಮತ್ತು ಸನ್‌ರೈಸರ್ಸ್ ಮುಖಾಮುಖಿಯಾದಾಗ ಅವರಿಬ್ಬರೂ ಹೈಲೈಟ್ ಆದರು.

ಬಿರ್ಲಾ ಗ್ರೂಪ್ ಅಧ್ಯಕ್ಷ ಕುಮಾರ್ ಮಂಗಲಂ ಬಿರ್ಲಾ ಅವರ ಹಿರಿಯ ಮಗಳೇ ಅನನ್ಯಾ ಬಿರ್ಲಾ. ಐಪಿಎಲ್ 19ನೇ ಸೀಸನ್ ಪ್ರಾರಂಭವಾಗುವ ಮೊದಲು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಮಾಲೀಕತ್ವವು ಬದಲಾಯಿತು. ಐಪಿಎಲ್‌ನ ಉದ್ಘಾಟನಾ ಋತುವಿನಿಂದ ತಂಡವನ್ನು ನಡೆಸುತ್ತಿರುವ ಯುನೈಟೆಡ್ ಸ್ಪಿರಿಟ್ಸ್ ಲಿಮಿಟೆಡ್ (ಯುಎಸ್‌ಎಸ್), ಇತ್ತೀಚೆಗೆ ಆರ್‌ಸಿಬಿಯನ್ನು 16,706 ಕೋಟಿ ರೂ.ಗೆ ಮಾರಾಟ ಮಾಡಿತು. ಆದಿತ್ಯ ಬಿರ್ಲಾ ಗ್ರೂಪ್, ಟೈಮ್ಸ್ ಆಫ್ ಇಂಡಿಯಾ, ಬೋಲ್ಟ್ ವೆಂಚರ್ಸ್ ಮತ್ತು ಇನ್ವೆಸ್ಟ್​ಮೆಂಟ್​ ಗ್ರೂಪ್ ಒಕ್ಕೂಟವು ಆರ್‌ಸಿಬಿಯನ್ನು ಸ್ವಾಧೀನಪಡಿಸಿಕೊಂಡಿವೆ. ಬಿರ್ಲಾ ಅವರ ಮಗ, 28 ವರ್ಷದ ಆರ್ಯಮಾನ್ ಬಿರ್ಲಾ, ಆರ್‌ಸಿಬಿಯ ಹೊಸ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಈ ಹಿನ್ನೆಲೆಯಲ್ಲಿ, ಅನನ್ಯಾ ಬಿರ್ಲಾ ಕೂಡ ಆರ್​ಸಿಬಿ ಒಡತಿಯಾಗಿದ್ದು, ಆರ್​​ಸಿಬಿಯ ಪಂದ್ಯಗಳಿಗೆ ತಪ್ಪದೇ ಹಾಜರಾಗುತ್ತಿದ್ದಾರೆ. 

ನಿನ್ನೆ (ಏಪ್ರಿಲ್​ 05) ಭಾನುವಾರ ಡಬಲ್ ಹೆಡರ್ ಪಂದ್ಯ ನಡೆಯಿತು. ಮಧ್ಯಾಹ್ನ ನಡೆದ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್​ ಮತ್ತು ಲಖನೌ ಸೂಪರ್ ಜೈಂಟ್ಸ್ ಮುಖಾಮುಖಿಯಾದವು. ಈ ಪಂದ್ಯಕ್ಕೆ ಎಂದಿನಂತೆ ಕಾವ್ಯ ಮಾರನ್ ಹಾಜರಾದರು. ಮತ್ತೊಂದೆಡೆ, ಸಂಜೆ ಆರ್‌ಸಿಬಿ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಪಂದ್ಯ ನಡೆಯಿತು. ಈ ವೇಳೆ ಅನನ್ಯಾ ಬಿರ್ಲಾ ಅವರು ಹಾಜರಾದರು. ಆದರೆ, ಈ ಬಾರಿ ಅನನ್ಯಾ ತಮ್ಮ ಆತ್ಮೀಯ ಸ್ನೇಹಿತೆ ಮತ್ತು ಭಾರತೀಯ ಟೆನಿಸ್ ದಂತಕಥೆ ಸಾನಿಯಾ ಮಿರ್ಜಾ ಅವರನ್ನು ತಮ್ಮೊಂದಿಗೆ ಕರೆತಂದರು. ಒಂದೆಡೆ, ಆರ್‌ಸಿಬಿ ದಿಗ್ಗಜ ವಿರಾಟ್ ಕೊಹ್ಲಿ ಅವರ ಪತ್ನಿ ಅನುಷ್ಕಾ ಶರ್ಮಾ ಇದ್ದರೆ, ಮತ್ತೊಂದೆಡೆ ಅನನ್ಯಾ ಮತ್ತು ಸಾನಿಯಾ ಮಿರ್ಜಾ ಕ್ರೀಡಾಂಗಣದಿಂದ ಆರ್‌ಸಿಬಿ ತಂಡವನ್ನು ಹುರಿದುಂಬಿಸಿದರು. ಈ ವೇಳೆ ಸಾನಿಯಾ ಜೊತೆಗೆ ಅವರ ಮಗ ಇಜಹಾನ್ ಕೂಡ ಪಂದ್ಯ ವೀಕ್ಷಿಸಿದರು.

ಇದಕ್ಕೆ ಸಂಬಂಧಿಸಿದ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿವೆ. ಇದರ ನಡುವೆ ಅನನ್ಯಾ ಅವರು ತಮ್ಮ ಇನ್​​ಸ್ಟಾಗ್ರಾಂ ಸ್ಟೋರಿಯಲ್ಲಿ ಹಂಚಿಕೊಂಡಿರುವ ಪೋಸ್ಟ್​ ನೆಟ್ಟಿಗರ ಗಮನ ಸೆಳೆಯುತ್ತಿದೆ. ಸಾನಿಯಾ ಮತ್ತು ಇಜಹಾನ್ ಹಿಂದಿನ ಸಾಲಿನಲ್ಲಿ ಕುಳಿತಿರುವ ಫೋಟೋವನ್ನು ಹಂಚಿಕೊಂಡಿರುವ ಅನನ್ಯಾ, ನಾವು ಯಾವಾಗಲೂ ಒಟ್ಟಿಗೆ ಫೋಟೋ ತೆಗೆದುಕೊಳ್ಳುವುದನ್ನು ಮರೆಯುತ್ತಿದ್ದೆವು ಆದರೆ, ಈ ಬಾರಿ ಎಲ್ಲೋ ಈ ಫೋಟೋ ನನಗೆ ಸಿಕ್ಕಿತು. ನಾನು ನಿನ್ನನ್ನು ಪ್ರೀತಿಸುತ್ತೇನೆ ಸಾನಿಯಾ, ಇಜ್ಜು... ನೀನು ಅತ್ಯುತ್ತಮ ಎಂದು ಬರೆದುಕೊಂಡಿದ್ದಾರೆ. ಈ ಪೋಸ್ಟ್​ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಆರ್​ಸಿಬಿ ಅಭಿಮಾನಿಗಳ ಗಮನ ಸೆಳೆದಿದೆ. 

ಪಂದ್ಯಗಳ ವಿಷಯಕ್ಕೆ ಬಂದರೆ, ಸನ್‌ರೈಸರ್ಸ್ ಹೈದರಾಬಾದ್​ ತಂಡ ಲಖನೌ ಸೂಪರ್​ ಜೈಂಟ್ಸ್​ ವಿರುದ್ಧ ಸೋತರೆ, ಚೆನ್ನೈ ಸೂಪರ್​ ಕಿಂಗ್ಸ್​ ತಂಡವನ್ನು ಸೋಲಿಸಿ ಆರ್​ಸಿಬಿ ತಂಡ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು. ಕಾವ್ಯ ಮಾರನ್​ ನಿರಾಶೆಯಿಂದ ಹಿಂದೆ ಸರಿದರೆ, ಅನನ್ಯಾ ಬಿರ್ಲಾ ತಮ್ಮ ತಂಡದ ಯಶಸ್ಸು ನೋಡಿ ಖುಷಿಪಟ್ಟರು, (ಏಜೆನ್ಸೀಸ್​).