ಹೊಸ ವರ್ಷಕ್ಕೆ ಬೈರಂಪಳ್ಳಿ ಗ್ರಾಪಂ ಬಂದ್

ಹೆಬ್ರಿ: ಮೂವರು ಸಿಬ್ಬಂದಿ ಸಾಮೂಹಿಕವಾಗಿ ರಾಜೀನಾಮೆ ನೀಡಿದ ಹಿನ್ನೆಲೆಯಲ್ಲಿ ಬುಧವಾರ ಬೈರಂಪಳ್ಳಿ ಗ್ರಾಪಂ ಮಧ್ಯಾಹ್ನದ ತನಕ ಬಂದ್ ಆಗಿ, ಸಾರ್ವಜನಿಕರಿಗೆ ಸೇವೆಯಲ್ಲಿ ವೃತ್ಯಯ ಉಂಟಾಯಿತು.

ಪಿಡಿಒ ಹಾಗೂ ಪಂಚಾಯಿತಿ ಸದಸ್ಯರಿಂದ ನೆಮ್ಮದಿಯಾಗಿ ಕರ್ತವ್ಯ ನಿರ್ವಹಿಸಲು ಸಾಧ್ಯವಾಗುತ್ತಿಲ್ಲ ಎಂದು ಸುಮನಾ, ವಸಂತಿ, ಮನೋಹರ್ ಎಂಬುವರು ಡಿ.19ರಂದು ರಾಜೀನಾಮೆ ನೀಡಿದ್ದು, ಡಿ.31ರ ಒಳಗಾಗಿ ಅಂಗೀಕಾರ ಮಾಡಬೇಕೆಂದು ಕೇಳಿಕೊಂಡಿದ್ದರು.

ಪಂಚಾಯಿತಿ ಅಧ್ಯಕ್ಷರು ರಾಜೀನಾಮೆ ಅಂಗೀಕಾರ ಮಾಡದೆ, ರಾಜೀನಾಮೆ ಪತ್ರ ಇಒ ಹಾಗೂ ಸಿಇಒಗೆ ಡಿ.20ಕ್ಕೆ ಕಳುಹಿಸಿದ್ದು, ಯಾವುದೇ ಸಮರ್ಪಕ ಉತ್ತರ ಬಂದಿರಲಿಲ್ಲ. ಆ ನಿಟ್ಟಿನಲ್ಲಿ ಬುಧವಾರ ಸಿಬ್ಬಂದಿ ಕರ್ತವ್ಯಕ್ಕೆ ಹಾಜರಾಗದೆ ಬಂದ್ ಇದ್ದಿತು. ಕಾರ್ಯದರ್ಶಿ 15 ದಿನಗಳಿಂದ ರಜೆಯಲ್ಲಿದ್ದಾರೆ. ಪಿಡಿಒ ಪ್ರಭಾರಿಯಲ್ಲಿರುವುದರಿಂದ ಬೇರೆ ಪಂಚಾಯಿತಿಯಲ್ಲಿದ್ದರು. ಮಧ್ಯಾಹ್ನ 12.30ಕ್ಕೆ ಉಡುಪಿ ತಾಪಂ ಇಒ ಸ್ಥಳಕ್ಕೆ ಆಗಮಿಸಿ ಪಂಚಾಯಿತಿ ತೆರೆದರು.

ವಿಡಿಯೋ ವೈರಲ್

ತಮ್ಮ ಕೆಲಸಗಳಿಗಾಗಿ ಕಚೇರಿಗೆ ಆಗಮಿಸಿದ ಗ್ರಾಮಸ್ಥರ ಪರದಾಟ ಹಾಗೂ ಬಂದ್ ಇರುವುದನ್ನು ಾರ್ವಜನಿಕರೊಬ್ಬರು ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ಮಾಡಿ ಹರಿಬಿಟ್ಟಿದ್ದರಿಂದ ಇಒ ಗ್ರಾಪಂ ಕಚೇರಿ ಬಾಗಿಲು ತೆರೆದು ಗ್ರಾಮಸ್ಥರಿಗೆ ಅನುಕೂಲವಾಗುವಂತೆ ಕ್ರಮ ವಹಿಸಿದರು. ಆದರೆ ಸಿಬ್ಬಂದಿ ಗೈರಿನಿಂದ ಸೇವೆ ಇಲ್ಲದೆ ನಿರಾಸೆ ಉಂಟಾಯಿತು.