ರಾಜೀನಾಮೆ ಕೊಡ್ತೇನೆ ಅನ್ನೋದು ಈಸಿ, ಕರೆದು ಮಾತಾಡುವೆ; ಎಂ.ಪಿ ಕುಮಾರಸ್ವಾಮಿ ವಿರುದ್ಧ ಬಿಎಸ್ ವೈ ಗರಂ

ಬೆಂಗಳೂರು: ಪಕ್ಷ ಅವನಿಗೇನು ಕಡಿಮೆ ಮಾಡಿದೆ. ಎಲ್ಲ ಕೊಟ್ಟ ಮೇಲೂ ರಾಜೀನಾಮೆ ಕೊಡುತ್ತೇನೆ ಅನ್ನೋದು ಈಸಿ. ಅವನಿಗೆ ಕರೆದು ಮಾತನಾಡುವೆ, ಸರಿಪಡಿಸುವೆ ಎಂದು ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಗರಂ ಆಗಿ ಹೇಳಿದರು.

ಟಿಕೆಟ್ ವಂಚಿತ, ಅಸಮಾಧಾನಿತರನ್ನು ಕರೆಯಿಸಿಕೊಂಡು ಮಾತುಕತೆಯಾಡಿ ಮನವೊಲಿಕೆ ಕಾರ್ಯದಲ್ಲಿ ಬಿಎಸ್ ವೈ ತೊಡಗಿಕೊಂಡಿದ್ದು, ಸುದ್ದಿಗಾರರಿಗೆ ಗುರುವಾರ ಪ್ರತಿಕ್ರಿಯಿಸಿದರು.

ಮೂಡಿಗೆರೆ ಶಾಸಕ ಎಂ.ಪಿ.ಕುಮಾರಸ್ವಾಮಿ ಟಿಕೆಟ್ ಸಿಗದ ಕಾರಣ ಬೇಸರಗೊಂಡು ರಾಜೀನಾಮೆ ನಿರ್ಧರಿಸಿರುವ ಬಗ್ಗೆ ಸಿಡಿಮಿಡಿಗೊಂಡ ಅಸಮಾಧಾನಿತರ ಜತೆಗೆ ಚರ್ಚಿಸಿ ಮನವೊಲಿಸಲಾಗುತ್ತದೆ. ಪಕ್ಷದಿಂದ ಎಲ್ಲ ಪಡೆದ ಕುಮಾರಸ್ವಾಮಿಗೂ ಕರೆದು ಮಾತನಾಡುವೆ.

ಮಾಜಿ ಡಿಸಿಎಂ ಲಕ್ಷ್ಮಣ ಸವದಿಗೂ ಬರಲು ಹೇಳಿರುವೆ. ಮೂರ್ನಾಲ್ಕು ಜನರ ಜತೆಗೆ ಮಾತನಾಡಿರುವೆ. ಶೀಘ್ರವೇ ಸಹಜ ಸ್ಥಿತಿಗೆ ಬರಲಿದೆ. ಎಲ್ಲರೂ ಪಕ್ಷದ ಅಧಿಕೃತ ಅಭ್ಯರ್ಥಿಗಳ ಗೆಲುವಿಗೆ ಶ್ರಮಿಸಲಿದ್ದಾರೆ ಎಂದು ಬಿಎಸ್ ವೈ ವಿಶ್ವಾಸ ವ್ಯಕ್ತಪಡಿಸಿದರು.

ಕಾಂತೇಶ್ ಭೇಟಿ

ಮಾಜಿ ಡಿಸಿಎಂ ಕೆ.ಎಸ್.ಈಶ್ವರಪ್ಪ ಅವರ ಪುತ್ರ ಕೆ.ಇ.ಕಾಂತೇಶ್ 'ಕಾವೇರಿ ನಿವಾಸದಲ್ಲಿ ಬಿಎಸ್ ವೈ ಅವರನ್ನು ಭೇಟಿಯಾದರು. ನಂತರ ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿ, ಆರ್ ಎಸ್ ಎಸ್, ಬಿಜೆಪಿ ನನ್ನ ತಂದೆ ಮತ್ತು ನನಗೆ ಒಳ್ಳೆಯ ಸಂಸ್ಕಾರ ನೀಡಿದೆ. ನನ್ನ ತಂದೆ ಸಾವಿರಾರು ಕಾರ್ಯಕರ್ತರಿಗೆ ಮೇಲ್ಪಂಕ್ತಿಯಾಗಿದ್ದಾರೆ. ಪಕ ನಮ್ಮನ್ನು ಕೈಬಿಡುವುದಿಲ್ಲ ಎಂಬ ವಿಶ್ವಾಸವಿದ್ದು, ನಾಯಕರು ತೆಗೆದುಕೊಳ್ಳುವ ನಿರ್ಧಾರಕ್ಕೆ ಬದ್ಧವೆಂದು ಕಾಂತೇಶ್ ಹೇಳಿದರು.

ಮುಂದುವರಿದ ಪ್ರತಿಭಟನೆ

ಈ ಮಧ್ಯೆ ಬ್ಯಾಟರಾಯನಪುರದಲ್ಲಿ ಬಿಜೆಪಿ ಟಿಕೆಟ್ ವಂಚಿತರ ಪರವಾಗಿ ಪ್ರತಿಭಟನೆ ಗುರುವಾರವೂ ಮುಂದುವರಿದಿದ್ದು, ಪಕ್ಷ ಹಾಗೂ ನಾಯಕರ ವಿರುದ್ಧ ಧಿಕ್ಕಾರ ಮೊಳಗಿಸಿದರು. ಮುನೀಂದ್ರಕುಮಾರ್ ಅವರ ನೂರಾರು ಬೆಂಬಲಿಗರು ರಸ್ತೆಯಲ್ಲಿ ಟೈರ್ ಗೆ ಬೆಂಕಿ ಹಚ್ಚಿ ಆಕ್ರೋಶ ವ್ಯಕ್ತಪಡಿಸಿದರು.

https://www.vijayavani.net/bar-fight-leads-kidnap-and-attack-in-cinematic-style/

https://www.vijayavani.net/sogadu-shivanna-resigns-bjp/

https://www.vijayavani.net/national-award-winner-actress-no-more/