ಮಹಿಳೆಯೊಂದಿಗೆ ಮಾಜಿ ಶಾಸಕನ ಫೋಟೋ-ವಿಡಿಯೋ ವೈರಲ್​

ಹೈದರಾಬಾದ್​: ವರ್ಷಾಂತ್ಯದಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿರುವ ತೆಲಂಗಾಣದಲ್ಲಿ ರಾಜಕೀಯ ಚಟುವಟಿಕೆಗಳು ಗರಿಗೆದರಿದ್ದು, ಅಡಳಿತರೂಢ ಭಾರತ ರಾಷ್ಟ್ರ ಸಮಿತಿ(BRS) ಪಕ್ಷದಲ್ಲಿ ತುಸು ಹೆಚ್ಚು ಎಂದು ಹೇಳಬಹುದು.

ಪಕ್ಷದಲ್ಲಿ ದಿನದಿಂದ ದಿನಕ್ಕೆ ಟಿಕೆಟ್​ ಆಕಾಂಕ್ಷಿಗಳ ನಡುವೆ ಪೈಪೋಟಿ ಹೆಚ್ಚಾಗುತ್ತಿದ್ದು, ಖಮ್ಮಂ ಜಿಲ್ಲೆಯ ವೈರಾ ವಿಧಾನಸಭೆ ಕ್ಷೇತ್ರದಲ್ಲಿ ಮಾಜಿ ಹಾಗೂ ಹಾಲಿ ಶಾಸಕರ ನಡುವಿನ ಕಿತ್ತಾಟ ತೀವ್ರ ಸ್ವರೂಪ ಪಡೆದುಕೊಂಡಿದೆ.

ವೈರಾ ವಿಧಾನಸಭಾ ಕ್ಷೇತ್ರದ ಟಿಕೆಟ್​ ಮತ್ತೊಮ್ಮೆ ತಮಗೆ ಸಿಗಲಿದ್ದು, ಯಾರು ತಮ್ಮ ಗೆಲುವಿಗೆ ಅಡ್ಡಿಪಡಿಸಲು ಸಾಧ್ಯವಿಲ್ಲ ಎಂದು ಹಾಲಿ ಶಾಸಕ ರಾಮುಲು ನಾಯಕ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಇತ್ತ ಮಾಜಿ ಶಾಸಕರಾದ ಮದನ್​ಲಾಲ್​ ಮತ್ತು ಬಾನೋತ್​ ಚಂದ್ರವತಿ ಕೂಡ ಈ ಬಾರಿ ಟಿಕೆಟ್​ ತಮಗೆ ಸಿಗಲಿದ್ದು, ಕ್ಷೇತ್ರದಲ್ಲಿ ಪ್ರಚಾರ ಕಾರ್ಯ ಆರಂಭಿಸುವಂತೆ ತಮ್ಮ ಬೆಂಬಲಿಗರಿಗೆ ಸೂಚಿಸಿದ್ದಾರೆ.

ಇದನ್ನೂ ಓದಿ: ಇನ್ಮುಂದೆ ಇಂದಿರಾ ಕ್ಯಾಂಟಿನ್​ನಲ್ಲಿ ಊಟ ದುಬಾರಿ; ದರ ಹೆಚ್ಚಳಕ್ಕೆ ಸಂಪುಟ ಸಭೆಯಲ್ಲಿ ನಿರ್ಧಾರ

ಆದರೆ, ಮಹತ್ವದ ಬೆಳವಣಿಗೆಯೊಂದರಲ್ಲಿ ಪ್ರಮುಖ ಟಿಕೆಟ್​ ಆಕಾಂಕ್ಷಿ ಮದನ್​ಲಾಲ್​ ಮಹಿಳೆಯೊಂದಿಗೆ ಇರುವ ಫೋಟೋ ಹಾಗೂ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಮಾಡಲಾಗಿದೆ. ಇಂತಹ ವ್ಯಕ್ತಿಗಳಿಗೆ ಯಾವುದೇ ಕಾರಣಕ್ಕೂ ಟಿಕೆಟ್​ ಕೊಡಬಾರದು ಎಂದು ಪ್ರತಿಸ್ಪರ್ಧಿಗಳು ಹೈಕಮಾಂಡ್​ಗೆ ಆಗ್ರಹಿಸಿದ್ದಾರೆ.

ಇತ್ತ ವೈರಲ್​​ ಆಗಿರುವ ಫೋಟೋ-ವಿಡಿಯೋ ಕುರಿತು ಪ್ರತಿಕ್ರಿಯಿಸಿರುವ ಮದನ್​ಲಾಲ್​ ಬೆಂಬಲಿಗರು ಪಕ್ಷದ ಟಿಕೆಟ್ ಎಲ್ಲಿ ತಮ್ಮ ಕೈತಪ್ಪುತ್ತದೆ ಎಂಬ ಭೀತಿಯಿಂದ ಕಿಡಿಗೇಡಿಗಳು ಈ ರೀತಿ ಮಾಡಿದ್ದಾರೆ. ಮದನ್​ಲಾಲ್​ ಅವರಿಗೆ ಈಗಾಗಲೇ ಬಿಆರ್​ಎಸ್​ ನಾಯಕರು ವೈರಾ ವಿಧಾನಸಭಾ ಕ್ಷೇತ್ರದ ಟಿಕೆಟ್​ ಖಾತ್ರಿಪಡಿಸಿದ್ದು, ಎದುರಾಳಿ ಬಣದವರು ಫೋಟೋಗಳನ್ನು ಮಾರ್ಫ್ ಮಾಡಿ ಅವರ ತೇಜೋವಧೆ ನಾಡುತ್ತಿದ್ದಾರೆ ಎಂದು ಕಿಡಿಕಾರಿದ್ದಾರೆ.

https://www.vijayavani.net/rajinikanth-meets-akhilesh-yadav

https://www.vijayavani.net/drdo-drone-crashes-during-trial-in-karnatakas-chitradurga