ನಟಿಸಿದ್ದು ಒಂದೇ ಒಂದು ಸಿನಿಮಾ! ಅಂದೇ ಬದಲಾಯಿತು ಈ ನಟಿಯ ಹಣೆಬರಹ | Gayatri Joshi

ಮುಂಬೈ: ಬಣ್ಣದ ಬದುಕೇ ಹಾಗೆ ಕಣ್ರೀ. ಒಂದು ಸಿನಿಮಾದಲ್ಲಿ ಅವಕಾಶ ಸಿಕ್ಕರೆ ಸಾಕಪ್ಪ. ದೊಡ್ಡ ಪಾತ್ರವಿರಲಿ ಅಥವಾ ಚಿಕ್ಕದ್ದೇ ಇರಲಿ ಒಟ್ಟಿನಲ್ಲಿ ಆಫರ್​ ಗಿಟ್ಟಿಸಿಕೊಂಡ್ರೆ ಸಾಕು ಎಂಬ ಮಹಾದಾಸೆ ಹಲವರದ್ದು. ಕೆಲವರಿಗೆ ಚಾನ್ಸ್ ಸಿಕ್ಕರೂ ಯಶಸ್ಸು ಮಾತ್ರ ಸಿಗುವುದಿಲ್ಲ. ಆದರೆ, ಇನ್ನೂ ಕೆಲವರಿಗೆ ಕೇವಲ ಒಂದೇ ಒಂದು ಚಿತ್ರದಲ್ಲಿ ಅವಕಾಶ ಸಿಕ್ಕಿ, ಅದರಿಂದ ಸರಣಿ ಬಂಪರ್ ಆಫರ್​ಗಳು ಲಭಿಸುವುದು ಅದೃಷ್ಟವೇ ಸರಿ. ಇಲ್ಲೊಬ್ಬರು ನಟಿ, ತಮ್ಮ ಸಿನಿವೃತ್ತಿಯಲ್ಲಿ ಅಭಿನಯಿಸಿದ್ದು ಒಂದು ಚಿತ್ರದಲ್ಲಿ. ಅದೇ ಇಂದು ಅವರನ್ನು ಕೋಟ್ಯಂತರ ರೂ. ಮೌಲ್ಯದ ಆಸ್ತಿಗೆ ಒಡತಿಯಾಗುವಂತೆ ಮಾಡಿರುವುದು ನಿಜಕ್ಕೂ ಹುಬ್ಬೇರಿಸುವ ಸಂಗತಿಯೇ.

ಇಂದಿನ ಸ್ಟಾರ್​ ಕಲಾವಿದರು ಒಮ್ಮೆ ತೆರೆ ಮೇಲೆ ಕಾಣಿಸಿಕೊಂಡರೆ ಸಾಕು, ಅವರಿಗೆ ಹಣ ಗಳಿಸುವ ಹಲವಾರು ಆಫರ್‌ಗಳು ಕಣ್ಮುಂದೆ ಇರುತ್ತವೆ. ಮಾಲ್ ಓಪನಿಂಗ್‌, ಈವೆಂಟ್‌ಗಳು ಮತ್ತು ಜಾಹೀರಾತುಗಳಿಂದ ಸಾಕಷ್ಟು ಹಣವನ್ನು ಗಳಿಸುವ ಅವಕಾಶಗಳು ಲಭಿಸುತ್ತವೆ. ಅದರಲ್ಲೂ ನಟಿಮಣಿಯರಿಗೆ ಈ ಆಫರ್​ಗಳು ಹೆಚ್ಚು. ಇಂತಹ ಅವಕಾಶಗಳನ್ನು ಗಿಟ್ಟಿಸಿಕೊಳ್ಳಲು ಹೆಚ್ಚು ಜನಪ್ರಿಯತೆ ಗಳಿಸಬೇಕು. ಆ ಖ್ಯಾತಿ ಬೇಕೆಂದರೆ ಅದಕ್ಕೆ ಒಂದಷ್ಟು ಸಿನಿಮಾ, ಧಾರವಾಹಿ ಅಥವಾ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿರಬೇಕು. ಆದರೆ, ಈ ಬಾಲಿವುಡ್​ ನಟಿ ಮಾತ್ರ ಎಲ್ಲರಿಗಿಂತ ಭಿನ್ನ ಎಂದೇ ಹೇಳಬಹುದು.

ಅಂದು ನಟಿಸಿದ ಆ ಒಂದು ಚಿತ್ರದಿಂದ ಇವರ ಜೀವನವೇ ಸಂಪೂರ್ಣವಾಗಿ ಬದಲಾಯಿತು. ಹಾಗಿದ್ದರೆ, ಯಾರು ಅವರು? ಎಂಬ ಪ್ರಶ್ನೆ ನಿಮ್ಮಲ್ಲಿ ಕಾಡುತ್ತಿರಬಹುದು. ಶಾರುಖ್ ಖಾನ್ ಅವರ ವೃತ್ತಿಜೀವನದಲ್ಲಿ ವಿಶೇಷ ಚಿತ್ರವಾಗಿ ಹೊರಹೊಮ್ಮಿದ 'ಸ್ವದೇಶ್' ಸಿನಿಮಾದ ನಾಯಕಿ ಗಾಯತ್ರಿ ಜೋಶಿ. ನಿರೂಪಕಿಯಾಗಿ ತಮ್ಮ ಕರಿಯರ್​ ಪ್ರಾರಂಭಿಸಿದ ಈಕೆ, ನಂತರದಲ್ಲಿ ಮಾಡೆಲ್ ಆಗಿ ಬದಲಾದರು. ಅನೇಕ ಫ್ಯಾಷನ್ ಶೋಗಳಲ್ಲಿ ಭಾಗವಹಿಸಿ, ಹಲವಾರು ಜಾಹೀರಾತುಗಳಲ್ಲಿ ನಟಿಸಿದ್ದಾರೆ.

2004ರಲ್ಲಿ, ಶಾರುಖ್ ಖಾನ್ ಜತೆ ಸ್ವದೇಶ್ ಚಿತ್ರದಲ್ಲಿ ನಾಯಕಿಯಾಗಿ ಅಭಿನಯಿಸಿದ ಗಾಯತ್ರಿ ಜೋಶಿ, ತಮ್ಮ ಪಾತ್ರಕ್ಕೆ ಮೆಚ್ಚುಗೆ, ಪ್ರಶಂಸೆಯ ಜತೆಗೆ ಅಪಾರ ಯಶಸ್ಸನ್ನು ಗಳಿಸಿದರು. ಇನ್ನೇನು ಹಲವಾರು ಬಿಗ್ ಬಜೆಟ್​ ಚಿತ್ರಗಳಿಗೆ ನಟಿ ಸಹಿ ಹಾಕುತ್ತಾರೆ ಎನ್ನುವಷ್ಟರಲ್ಲೇ ಅವರು ಚಿತ್ರರಂಗಕ್ಕೆ ಗುಡ್​ಬೈ ಹೇಳಿದರು. ಕಾರಣ, ಆ ಸಮಯಕ್ಕೆ ಅವರಿಗೆ ಒಲಿದು ಬಂದ ಮದುವೆ ಆಫರ್​.

ಸ್ವದೇಶ್​ ಸಿನಿಮಾವನ್ನು ನೋಡಿದ ಉದ್ಯಮಿ ವಿಕಾಸ್ ಒಬೆರಾಯ್ ಅವರು, ನಟಿ ಗಾಯತ್ರಿ ಅವರ ಶೈಲಿಯನ್ನು ಮೆಚ್ಚಿದರು. ಇದಲ್ಲದೆ, ಅವರು ತಮ್ಮ ಸಂಪರ್ಕಗಳನ್ನು ಬಳಸಿಕೊಂಡು ಗಾಯತ್ರಿ ಅವರೊಂದಿಗೆ ಮಾತನಾಡಿ, ಪ್ರೀತಿ ನಿವೇದನೆ ಕೂಡ ಮಾಡಿಕೊಂಡರು. 2004ರಲ್ಲಿ ಸ್ವದೇಶ್ ಸಿನಿಮಾ ತೆರೆಕಂಡ ಬೆನ್ನಲ್ಲೇ 2005ರಲ್ಲಿ ವಿಕಾಸ್ ಒಬೆರಾಯ್ ಅವರೊಂದಿಗೆ ಗಾಯತ್ರಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು.

ವಿಕಾಸ್ ಒಬೆರಾಯ್ ಅವರ ತಂದೆ ಮಹಾರಾಷ್ಟ್ರದಲ್ಲಿ ರಿಯಲ್ ಎಸ್ಟೇಟ್ ಉದ್ಯಮಿ. ವಿಕಾಸ್ ಅವರ ಕಂಪನಿಯು ಮುಂಬೈನಲ್ಲಿ ಐಷಾರಾಮಿ ಮನೆಗಳು ಮತ್ತು ಪ್ಲಾಟ್‌ಗಳನ್ನು ನಿರ್ಮಿಸುವುದಕ್ಕೆ ಹೆಸರುವಾಸಿಯಾಗಿದೆ. ವಿಕಾಸ್ ಒಬೆರಾಯ್ ಮದುವೆಯ ನಂತರ ರಿಯಲ್ ಎಸ್ಟೇಟ್ ಕ್ಷೇತ್ರದಲ್ಲಿ ಯಶಸ್ವಿಯಾಗಿ ಬೆಳೆದಿದ್ದಾರೆ. ವಿಕಾಸ್ ಅವರನ್ನು ಮದುವೆಯಾದ ನಂತರ, ಗಾಯತ್ರಿ ಕೂಡ ತಮ್ಮ ಪತಿಯೊಂದಿಗೆ ವ್ಯವಹಾರವನ್ನು ನೋಡಿಕೊಳ್ಳುತ್ತಿದ್ದಾರೆ.

ಮೂಲಗಳ ಪ್ರಕಾರ, ಗಾಯತ್ರಿ ಮತ್ತು ವಿಕಾಸ್ ಒಟ್ಟು 60,000 ಕೋಟಿ ರೂ. ನಿವ್ವಳ ಮೌಲ್ಯವನ್ನು ಹೊಂದಿದ್ದಾರೆ ಎನ್ನಲಾಗಿದೆ. ವಿಕಾಸ್ ಕಳೆದ ವರ್ಷ ಫೋರ್ಬ್ಸ್ ಇಂಡಿಯಾದಲ್ಲಿ ಅಗ್ರ 100 ಶ್ರೀಮಂತ ವ್ಯಕ್ತಿಗಳಲ್ಲಿ ಒಬ್ಬರೆಂದು ಪಟ್ಟಿಮಾಡಲಾಗಿತ್ತು. ಈ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ವಿಕಾಸ್​, ಗಾಯತ್ರಿ ಜತೆ ಮದುವೆಯಾಗಿದ್ದೇ ಇಂದು ಈ ಎಲ್ಲ ಖುಷಿಗೂ ಕಾರಣ ಎಂದು ಹೇಳುತ್ತಾರೆ. ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ,(ಏಜೆನ್ಸೀಸ್).