ಆಲಿಯಾ, ದೀಪಿಕಾ ನನಗೆ ಸ್ಫೂರ್ತಿ: 'ಧುರಂಧರ್' ಬ್ಯೂಟಿಯ 9 ವರ್ಷದ ಹಳೆಯ ವಿಡಿಯೋ ಕಾಲ್​ ವೈರಲ್​! | Sara Arjun

Sara Arjun: ತಮಿಳು ಚಿತ್ರರಂಗದಲ್ಲಿ ಬಾಲನಟಿಯಾಗಿ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟು, ಅಭಿಮಾನಿಗಳ ಹೃದಯದಲ್ಲಿ ಅಳಿಸಲಾಗದ ಛಾಪು ಮೂಡಿಸಿರುವ ನಟಿ ಸಾರಾ ಅರ್ಜುನ್, ಇತ್ತೀಚೆಗಷ್ಟೇ ರಣವೀರ್ ಸಿಂಗ್ ಅಭಿನಯದ ಬ್ಲಾಕ್​ಬಸ್ಟರ್​ ಹಿಟ್​ 'ಧುರಂಧರ್'​ ಚಿತ್ರದಲ್ಲಿ ನಾಯಕಿಯಾಗಿ ಮಿಂಚಿದರು. ಈ ಸಿನಿಮಾದಲ್ಲಿ ಸಿಕ್ಕ ಅಭೂತಪೂರ್ವ ಯಶಸ್ಸಿನಿಂದ ಸದ್ಯ ಸಾರಾ ಅದೃಷ್ಟವೇ ಬದಲಾಗಿದೆ. ಒಂದಷ್ಟು ಬಿಗ್ ಬಜೆಟ್​ನ ಚಿತ್ರಗಳಲ್ಲಿ ನಟಿಸುವ ಅವಕಾಶಗಳು ಯುವ ನಟಿಯನ್ನು ಹುಡುಕಿಕೊಂಡು ಬರುತ್ತಿವೆ. ಈ ಮಧ್ಯೆ, ಯುವ ನಟಿಯ 9 ವರ್ಷಗಳ ಹಳೆಯ ವಿಡಿಯೋವೊಂದು ಇದೀಗ ಮುನ್ನೆಲೆಗೆ ಬಂದಿದೆ. 

ರಣವೀರ್ ಸಿಂಗ್​ ಜೊತೆ ಧುರಂಧರ್​ ಚಿತ್ರದಲ್ಲಿ ಮುಖ್ಯಭೂಮಿಕೆಯಲ್ಲಿ ನಟಿಸಿದ ಸಾರಾ, ತಮ್ಮ ಪಾತ್ರದ ಮೂಲಕ ನೋಡುಗರ ಗಮನ ಸೆಳೆದಿದ್ದು ವಿಶೇಷ. ಇದೊಂದು ಸಿನಿಮಾದಿಂದಲೇ ಅಪಾರ ಯಶಸ್ಸು ಗಳಿಸಿರುವ ಬ್ಯೂಟಿಯನ್ನು ಸಾಕಷ್ಟು ಹೊಸ ಹೊಸ ಆಫರ್​ಗಳು ಹುಡುಕಿಕೊಂಡು ಬರುತ್ತಿವೆ. ಬಾಲನಟಿಯಾಗಿ ಮಿಂಚಿದ್ದರೂ, ಸಾರಾಗೆ ಈ ಮಟ್ಟಿಗಿನ ಪ್ರಶಂಸೆ, ಮೆಚ್ಚುಗೆಗಳು ಸಿಕ್ಕಿರಲಿಲ್ಲ. ಆದರೆ, ಒಂದೇ ಒಂದು 'ಧುರಂಧರ್' ಯಶಸ್ಸು​ ನಟಿಗೆ ಅಪಾರ ಯಶಸ್ಸು ಮತ್ತು ಜನಪ್ರಿಯತೆಯನ್ನು ತಂದುಕೊಟ್ಟಿದೆ.  

ಪ್ರಸ್ತುತ, ಬಾಲಿವುಡ್​ ತುಂಬೆಲ್ಲ ಸಾರಾ ಅರ್ಜುನ್​ ಹೆಚ್ಚು ಓಡಾಡುತ್ತಿದ್ದು, 9ನೇ ವಯಸ್ಸಿನಲ್ಲಿ ಬಾಲಿವುಡ್​ ಸ್ಟಾರ್​ ನಟಿಯರಾದ ದೀಪಿಕಾ ಪಡುಕೋಣೆ ಮತ್ತು ಆಲಿಯಾ ಭಟ್​ ಅವರಿಗೆ ವಿಡಿಯೋ ಕಾಲ್​ನಲ್ಲಿ ಮಾತಾಡಿದ್ದ ಕ್ಲಿಪ್​ ಒಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ನೀವಿಬ್ಬರು ನನಗೆ ರೋಲ್​ ಮಾಡೆಲ್​ಗಳು ಎಂದಿದ್ದ ಸಾರಾ, ನಾನು ಭವಿಷ್ಯದಲ್ಲಿ ಇನ್ನೊಬ್ಬರ ಹಾದಿಯನ್ನು ಫಾಲೋ ಮಾಡುವ ಬದಲು ನನ್ನದೇ ಮಾರ್ಗದಲ್ಲಿ ಸಾಗಬೇಕು ಎಂದು ಹೇಳಿಕೊಂಡಿದ್ದಾಗಿ ವರದಿಯಾಗಿದೆ. 

ವೈರಲ್ ವಿಡಿಯೋದಲ್ಲಿ, "ಆಲಿಯಾ ಭಟ್ ಕಾಣುವ ರೀತಿ ಮತ್ತು ನಟಿಸುವ ಶೈಲಿ ನನಗೆ ಇಷ್ಟ. ನಾನು ಆಲಿಯಾ ಮತ್ತು ದೀಪಿಕಾ ಪಡುಕೋಣೆ ಅವರನ್ನು ತುಂಬಾ ಇಷ್ಟಪಡುತ್ತೇನೆ. ಹೀಗಾಗಿ, ಇವರಿಬ್ಬರು ನನ್ನ ರೋಲ್ ಮಾಡೆಲ್‌ಗಳು. ಇವರಿಬ್ಬರೇ ನನಗೆ ಸ್ಫೂರ್ತಿ. ನಾನು ಸಾರಾ ಅರ್ಜುನ್ ಆಗಿಯೇ ಉಳಿಯಲು ಬಯಸುತ್ತೇನೆ. ನಾನು ಬೇರೆಯವರಂತೆ ಇರಲು ಸಾಧ್ಯವಿಲ್ಲ" ಎಂದು ಹೇಳಿಕೊಂಡಿದ್ದಾರೆ,(ಏಜೆನ್ಸೀಸ್).