ಸೆಲೆಬ್ರಿಟಿಗಳಿಗೆ ವಿಶೇಷ ಆದ್ಯತೆ ಇಲ್ಲ: ರಣವೀರ್ ಸಿಂಗ್ ಅರ್ಜಿಯ ವಿಚಾರದಲ್ಲಿ ಹೈಕೋರ್ಟ್ ಕಠಿಣ ನಿಲುವು! Ranveer Singh

Ranveer Singh: ಕಾಂತಾರ- ಎ ಲೆಜೆಂಡ್ ಅಧ್ಯಾಯ 1 ಚಿತ್ರದ ಪಾತ್ರವನ್ನು ಅನುಕರಣೆ ಮಾಡುವ ಭರದಲ್ಲಿ ದೈವದ ಆಚರಣೆಯನ್ನು ಅಣಕಿಸಿದ ಆರೋಪದ ಮೇಲೆ ದಾಖಲಾಗಿರುವ​ ಪ್ರಕರಣವನ್ನು ರದ್ದುಗೊಳಿಸುವಂತೆ ಬಾಲಿವುಡ್​ ನಟ ರಣವೀರ್​ ಸಿಂಗ್​ ಕರ್ನಾಟಕ ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ.

ಈ ವರ್ಷದ ಆರಂಭದಲ್ಲಿ ಬೆಂಗಳೂರಿನ ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯಲ್ಲಿ ರಣವೀರ್ ಸಿಂಗ್ ವಿರುದ್ಧ ದೂರು ದಾಖಲಾಗಿತ್ತು. ಸಾರ್ವಜನಿಕ ಸಮಾರಂಭವೊಂದರಲ್ಲಿ ರಣವೀರ್ ಸಿಂಗ್ ಅವರು ಮಾಡಿದ ಕೆಲವು ಸನ್ನೆಳು, ನೃತ್ಯದ ಶೈಲಿ ಮತ್ತು ಹೇಳಿಕೆಗಳು ಕರಾವಳಿ ಕರ್ನಾಟಕದ ಚಾವುಂಡಿ ದೈವ ಸಂಪ್ರದಾಯಕ್ಕೆ ಸಂಬಂಧಿಸಿದ ಧಾರ್ಮಿಕ ಭಾವನೆಗಳಿಗೆ ಅವಮಾನಿಸಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿತ್ತು. ಆದಾಗ್ಯೂ, ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದ ಆರೋಪದ ಹಿನ್ನಲೆ ನಟನ ವಿರುದ್ಧ ಕ್ರಿಮಿನಲ್​ ಮೊಕದ್ದಮೆಯನ್ನು ದಾಖಲಿಸಿಕೊಳ್ಳಲಾಗಿತ್ತು.

ವರದಿಗಳ ಪ್ರಕಾರ, ನವೆಂಬರ್​ 2025 ರಲ್ಲಿ ಗೋವಾದಲ್ಲಿ ನಡೆದ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವದ ( IFFI ) ಸಮಾರೋಪ ಸಮಾರಂಭದಲ್ಲಿ ರಣವೀರ್​ ವೇದಿಕೆ ಮೇಲೆ ಕಾಣಿಸಿಕೊಂಡರು. ಈ ವೇಳೆ ಅವರು ಕಾಂತಾರ ಯಶಸ್ಸನ್ನು ಸ್ಮರಿಸುತ್ತಾ, ದೈವ ನರ್ತನ ಮತ್ತು ದೈವದ ವಿಶಿಷ್ಟ ಕೂಗನ್ನು ಅನುಕರಿಸಿದರು. ಇದಾದ ಬಳಿಕ ಬೆಂಗಳೂರು ಮೂಲದ ವಕೀಲರೊಬ್ಬರು ಈ ಕೃತ್ಯವು ಈ ಪ್ರದೇಶದಲ್ಲಿ ಆಚರಿಸಲಾಗುವ ಪವಿತ್ರ ಆಚರಣೆಯನ್ನು ಅವಮಾನಿಸಿದೆ ಎಂದು ಆರೋಪಿಸಿ ದೂರು ದಾಖಲಿಸಿದರು.

ಹೈಕೋರ್ಟ್‌ನಲ್ಲಿ ಸಲ್ಲಿಸಿದ ಅರ್ಜಿಯಲ್ಲಿ ನಟನ ವಕೀಲರು ವಾದಿಸಿರುವಂತೆ, ರಣವೀರ್ ಸಿಂಗ್ ದೈವದ ಸನ್ನೆಗಳನ್ನು ಮಾಡಿದ್ದು ಯಾರನ್ನೂ ಟೀಕಿಸುವುದಕ್ಕಲ್ಲ. ಬದಲಾಗಿ ರಿಷಬ್​ ಶೆಟ್ಟಿ ಅವರು ಕಾಂತಾರ ಚಿತ್ರದ ಮೂಲಕ ಸೃಷ್ಟಿಸಿದ ಅದ್ಭುತ ಕಲೆಯಿಂದಾಗಿ. ಆದರೆ, ಇದನ್ನು ಆಕ್ರಮಣಕಾರಿ ಎಂದು ತಪ್ಪಾಗಿ ಅರ್ಥೈಸಲಾಗಿದೆ. ಸಿಂಗ್​ಗೆ ದೈವ ಸಾಂಪ್ರದಾಯವನ್ನು ಅವಮಾನಿಸುವ ಯಾವುದೇ ದುರದ್ದೇಶ ಇರಲಿಲ್ಲ ಎಂದು ವಕೀಲರು ಹೇಳಿದ್ದಾರೆ.

ಆದಾಗ್ಯೂ, ರಣವೀರ್ ಸಿಂಗ್ ಪರ ವಕೀಲರು ಕೋರಿದ ತುರ್ತು ವಿಚಾರಣೆಯ ಮನವಿಯನ್ನು ಹೈಕೋರ್ಟ್​ ತಿರಸ್ಕರಿಸುವ ಮೂಲಕ ಮಹತ್ವದ ಪೀಠಿಕೆ ಹಾಕಿದೆ. ಸೆಲೆಬ್ರಿಟಿಗಳು ಎಂಬ ಕಾರಣಕ್ಕೆ ನ್ಯಾಯಾಲಯದ ಪಟ್ಟಿಯಲ್ಲಿ ವಿಶೇಷ ಅಥವಾ ಆದ್ಯತೆಯ ಪರಿಗಣನೆಯನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. 

ಸಾಮಾಜಿಕ ಜಾಲತಾಣದಲ್ಲಿ ಸಿಂಗ್​ ವಿರುದ್ಧ ಟೀಕೆಗಳು ವ್ಯಕ್ತವಾದ ನಂತರ ನಟ ಕ್ಷಮೆಯಾಚಿಸಿದರು. ಎಲ್ಲಾ ಸಂಸ್ಕೃತಿಗಳ ಬಗ್ಗೆ ನನಗೆ ಆಳವಾದ ಗೌರವವಿದೆ ಮತ್ತು ಅಪರಾಧ ಮಾಡುವ ಉದ್ದೇಶವಿಲ್ಲ ಎಂದು ಹೇಳಿದರು (ಏಜೆನ್ಸೀಸ್​).