ರಣವೀರ್ ಸಿಂಗ್ ನನ್ನ ಪಾಲಿನ 'ಲಕ್ಕಿ ಚಾರ್ಮ್': ಬಾಲಿವುಡ್ ಬ್ರೇಕ್ ಹಿಂದಿನ ರಹಸ್ಯ ಬಿಚ್ಚಿಟ್ಟ ಮೃಣಾಲ್! Mrunal Thakur

ರಣವೀರ್ ಅಲ್ಲಾಹಬಾಡಿಯಾ ಅವರ ಜನಪ್ರಿಯ ಪಾಡ್‌ಕ್ಯಾಸ್ಟ್‌ನಲ್ಲಿ ಅವರೊಂದಿಗೆ ಮಾತನಾಡಿದ ಮೃಣಾಲ್ , ತಮ್ಮ ವೃತ್ತಿ ಜೀವನದ ಆರಂಭಿಕ ದಿನಗಳಲ್ಲಿ ರಣವೀರ್​ ಅವರೊಂದಿಗೆ ಒಂದು ಜಾಹಿರಾತಿನಲ್ಲಿ ಕಾಣಿಸಿಕೊಂಡಿರುವುದಾಗಿ ಹಂಚಿಕೊಂಡರು. ಆಶ್ಚರ್ಯಕರ ವಿಷಯವೆಂದರೆ, ಆ ಜಾಹೀರಾತು ಪ್ರಸಾರವಾದ ನಂತರವೇ ಮೃಣಾಲ್ ಅವರಿಗೆ ಚಿತ್ರರಂಗದಲ್ಲಿ ದೊಡ್ಡ ಮಟ್ಟದ ಬ್ರೇಕ್‌ಗಳು ಮತ್ತು ಸಿನಿಮಾ ಅವಕಾಶಗಳು ಹುಡುಕಿಕೊಂಡು ಬಂದವು ಎಂದರು.

ಮೃಣಾಲ್​ ಪ್ರಕಾರ, ರಣವೀರ್ ಅವರು ನನ್ನ ಅದೃಷ್ಟ ಮೋಡಿ. ನಾನು ಈ ಉದ್ಯಮದಲ್ಲಿ ಅಸ್ತಿತ್ವದಲ್ಲಿರಲು ಅವರೇ ಕಾರಣ. ಒಂದು ಜಾಹಿರಾತಿನಲ್ಲಿ ನಾನು ಅವರೊಂದಿಗೆ ಮಾಡೆಲ್​ ಆಗಿ ಕಾರ್ಯನಿರ್ವಹಿಸಿದ್ದೆ. ಆ ಜಾಹಿರಾತು ತೆರೆ ಮೇಲೆ ಬಂದ ನಂತರ ನನ್ನನ್ನು ನಿರ್ಮಾಪಕರು ಗುರುತಿಸಲು ಪ್ರಾರಂಭಿಸಿದರು ಎಂದರು. ಈ ಎಲ್ಲಾ ಕಾರಣದಿಂದಲೇ ನಾನು ಅವರಿಗೆ ಕ್ರೆಡಿಟ್​ ಕೊಡುತ್ತೇನೆ ಎಂದು ಅಭಿಪ್ರಾಯ ಹಂಚಿಕೊಂಡರು.

ಧುರಂಧರ್​ ಚಿತ್ರದ ನಟನಾ ಸಾಮರ್ಥ್ಯವನ್ನು ಶ್ಲಾಘಿಸಿದ ಮೃಣಾಲ್​, ನಟನೆಯ ಮೇಲ್ಮೈ ಮಟ್ಟದಲ್ಲಿರಲಿಲ್ಲ. ಅದರಲ್ಲಿ ಆಳ ಮತ್ತು ಪದರಗಳಿದ್ದವು. ನಾನು ಅವರನ್ನು ರಣವೀರ್​ ಸಿಂಗ್​ ಆಗಿ ನೋಡಲಿಲ್ಲ. ಅವರನ್ನು ಹಮ್ಜಾ ಆಗಿ ಮಾತ್ರ ನೋಡಿದೆ. ಅದು ನಾಯಕನಿಗಿಂತ ಹೆಚ್ಚಾಗಿ ಒಂದು ಪಾತ್ರವಾಗಿತ್ತು. ರಣವೀರ್ ತುಂಬಾ ಶ್ರಮಜೀವಿ ಆಗಿರುವುದರಿಂದ ನನಗೆ ನಂಬಲಾಗದಷ್ಟು ಹೆಮ್ಮೆ ಅವರ ಮೇಲೆ ಇದೆ. ಅವರ ಎಲ್ಲಾ ಚಿತ್ರವೂ ಬ್ಲಾಕ್​ಬಸ್ಟರ್​ ಆಗಲಿ ಎಂದು ನಾನು ಆ ದೇವರಲ್ಲಿ ಪ್ರಾರ್ಥಿಸುತ್ತೇನೆ ಎಂದರು.

ಮೃಣಾಲ್ ಠಾಕೂರ್ ಕಿರುತೆರೆ ಕುಂಕುಮ ಭಾಗ್ಯ ಧಾರವಾಹಿ ಮೂಲಕ ಜನಪ್ರಿಯತೆಯನ್ನು ಗಳಸಿದರು. ಲವ್ ಸೋನಿಯಾ ಚಿತ್ರದ ಮೂಲಕ ಬಾಲಿವುಡ್​ಗೆ ಪಾದಾರ್ಪಣೆ ಮಾಡಿದ ನಟಿ, ಸೂಪರ್ 30 , ಬಾಟ್ಲಾ ಹೌಸ್ , ಘೋಸ್ಟ್ ಸ್ಟೋರೀಸ್ , ತೂಫಾನ್ , ಸೀತಾ ರಾಮಮ್ , ಲಸ್ಟ್ ಸ್ಟೋರೀಸ್ 2 , ಮತ್ತು ಸನ್ ಆಫ್ ಸರ್ದಾರ್ 2 ನಂತಹ ಚಿತ್ರಗಳಲ್ಲಿ ನಟಿಸಿದ್ದಾರೆ.

ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ 'ಧುರಂಧರ್' ಒಂದು ಹೊಸ ಮೈಲಿಗಲ್ಲನ್ನು ಸ್ಥಾಪಿಸಿದೆ. ಡಿಸೆಂಬರ್ 2025 ರಲ್ಲಿ ತೆರೆಕಂಡ ಈ ಚಿತ್ರವು ಕೇವಲ ಒಂದು ವರ್ಷದ ಅತಿ ಹೆಚ್ಚು ಗಳಿಕೆ ಮಾಡಿದ ಚಿತ್ರವಾಗಿ ಮಾತ್ರವಲ್ಲದೆ, ಭಾರತೀಯ ಸಿನಿಮಾ ಇತಿಹಾಸದಲ್ಲೇ ಒಂದೇ ಭಾಷೆಯಲ್ಲಿ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಹೆಗ್ಗಳಿಕೆಗೆ ಪಾತ್ರವಾಯಿತು (ಏಜೆನ್ಸೀಸ್​).