ಪ್ರತಿಷ್ಠಿತ ಬ್ರಿಟಿಷ್ ಆಕಾಡೆಮಿ ಫಿಲಂ ಆ್ಯಂಡ್ ಟೆಲಿವಿಷನ್ ಅವಾರ್ಡ್ಸ್ನ (ಬಾಫ್ಟಾ) 79ನೇ ಸಾಲಿನ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಭಾರತ ಸಾಧನೆ ಮೆರೆದಿದೆ. ಅತ್ಯುತ್ತಮ ಮಕ್ಕಳು ಮತ್ತು ಕುಟುಂಬ ವಿಭಾಗದಲ್ಲಿ ಸ್ಪರ್ಧಿಸಿದ್ದ ಮಣಿಪುರಿ ಚಿತ್ರ ‘ಬೂಂಗ್’ ಪ್ರಥಮ ಸ್ಥಾನ ಪಡೆದಿದೆ. ಆ ಮೂಲಕ ಈಶಾನ್ಯ ಭಾರತದ ಚಿತ್ರವೊಂದು ವಿಶ್ವಮಟ್ಟದಲ್ಲಿ ಛಾಪು ಮೂಡಿಸಿದೆ. ಲಕ್ಷ್ಮೀಪ್ರಿಯ ದೇವಿ ನಿರ್ದೇಶನದ ಚೊಚ್ಚಲ ಚಿತ್ರ ಇದಾಗಿದ್ದು, ಬಾಲಿವುಡ್ ನಟ ರ್ಹಾನ್ ಅಖ್ತರ್ ಸೇರಿ ಹಲವರು ಬಂಡವಾಳ ಹೂಡಿದ್ದಾರೆ. ಬಾಲನಟರಾದ ಗುಗುನ್ ಕಿಪ್ಗೆನ್, ಬಾಲಾ ಹಿಜಾಮ್ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ. ಈ ವಿಭಾಗದಲ್ಲಿ ಹಾಲಿವುಡ್ನ ‘ಜೂಟೊಪಿಯಾ -2’, ‘ಲಿಲೊ ಆ್ಯಂಡ್ ಸ್ಟಿಚ್’ ಹಾಗೂ ್ರೆಂಚ್ನ ‘ಆರ್ಕೋ’ ಚಿತ್ರಗಳ ಜತೆ ‘ಬೂಂಗ್’ ಸ್ಪರ್ಧಿಸಿ ಈ ಸಾಧನೆ ಮಾಡಿರುವುದು ವಿಶೇಷ. ಈಗಾಗಲೇ ‘ಟೊರೆಂಟೊ’, ‘ವಾರ್ಸಾ’, ‘ಇಂಟರ್ನ್ಯಾಷನಲ್ ಫಿಲಂ ಫೆಸ್ಟಿವಲ್’ ಸೇರಿ ಹಲವು ಅಂತಾರಾಷ್ಟ್ರೀಯ ಮತ್ತು ದೇಶೀಯ ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿರುವ ‘ಬೂಂಗ್’ಗೆ ಇದೀಗ ಮತ್ತೊಂದು ವಿಶ್ವ ಹೆಗ್ಗಳಿಕೆ ಸಂದಿದೆ. ಪ್ರಧಾನಿ ನರೇಂದ್ರ ಮೋದಿ, ಮಣಿಪುರ ಸಿಎಂ ಖೇಮ್ಚಂದ್ ಸಿಂಗ್, ತಾರೆಯರಾದ ಪ್ರಿಯಾಂಕಾ ಚೋಪ್ರಾ, ಕಂಗನಾ ರಣಾವತ್ ಸೇರಿ ಹಲವರು ಚಿತ್ರತಂಡಕ್ಕೆ ಅಭಿನಂದಿಸಿದ್ದಾರೆ. ‘‘ಬೂಂಗ್’ ಚಿತ್ರದೊಂದಿಗೆ ಕೆಲಸ ಮಾಡಿದ ಎಲ್ಲರಿಗೂ ಅಭಿನಂದನೆಗಳು. ಇದು ನಿಜಕ್ಕೂ ಅಪಾರ ಸಂತೋಷದ ಕ್ಷಣ. ವಿಶೇಷವಾಗಿ ಮಣಿಪುರಕ್ಕೆ ವಿಶೇಷ ಕ್ಷಣ. ಇದು ನಮ್ಮ ದೇಶದ ಸೃಜನಶೀಲ ಪ್ರತಿಭೆನ್ನು ಜಾಗತಿಕ ಮಟ್ಟದಲ್ಲಿ ಎತ್ತಿ ತೋರಿಸುತ್ತದೆ’ ಎಂದು ಪ್ರಧಾನಿ ಮೋದಿ ಚಿತ್ರತಂಡವನ್ನು ಅಭಿನಂದಿಸಿದ್ದಾರೆ. -ಏಜೆನ್ಸೀಸ್
