ಕಂಗನಾ-ಚಿರಾಗ್ 'ರೋಮ್ಯಾನ್ಸ್' ವದಂತಿ: ಒಂದೊಮ್ಮೆ ಅದು ನಿಜವಾಗಿದ್ರೆ ನಮಗೆ ಇಷ್ಟೊತ್ತಿಗೆ ಮಕ್ಕಳಿರಬೇಕಿತ್ತು ಎಂದ ಕಂಗನಾ! | Kangana Chirag

ಕಂಗನಾ ಮತ್ತು ಚಿರಾಗ್ ಮೊದಲು ಭೇಟಿಯಾಗಿದ್ದು ಬಾಲಿವುಡ್‌ನ ‘ಮಿಲೇ ನಾ ಮಿಲೇ ಹಮ್’ (2011) ಚಿತ್ರದ ಸೆಟ್‌ನಲ್ಲಿ. ಅಂದು ನಾಯಕ-ನಾಯಕಿಯಾಗಿ ನಟಿಸಿದ್ದ ಇವರು, ಇಂದು ಸಂಸದರಾಗಿ ಮತ್ತೆ ಒಂದಾಗಿದ್ದಾರೆ. ಸಂಸತ್ ಭವನದ ಹೊರಗೆ ಇವರಿಬ್ಬರೂ ಹಸ್ತಲಾಘವ ಮಾಡುವುದು, ನಗುತ್ತಾ ಮಾತನಾಡುತ್ತಿರುವ ವಿಡಿಯೋಗಳು ವೈರಲ್ ಆಗುತ್ತಿದ್ದಂತೆ, ಇಬ್ಬರ ನಡುವೆ ಪ್ರೇಮಾಂಕುರವಾಗಿದೆ ಎಂಬ ಸುದ್ದಿಗಳು ಹರಿದಾಡಿದ್ದವು.

ಇತ್ತೀಚಿನ ಸಂದರ್ಶನವೊಂದರಲ್ಲಿ ಈ ವದಂತಿಗಳ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಕಂಗನಾ, "ಜನರು ಬಹಳಷ್ಟು ಮಾತನಾಡುತ್ತಾರೆ. ಆದರೆ ನನಗೂ ಮತ್ತು ಚಿರಾಗ್ ಪಾಸ್ವಾನ್ ಅವರಿಗೂ ಯಾವುದೇ ರೋಮ್ಯಾಂಟಿಕ್ ಸಂಬಂಧವಿಲ್ಲ. ನಾವು ಕೇವಲ ಒಳ್ಳೆಯ ಗೆಳೆಯರು," ಎಂದು ಸ್ಪಷ್ಟಪಡಿಸಿದ್ದಾರೆ.

ಮುಂದುವರಿದು ಮಾತನಾಡಿದ ಅವರು ಹಾಸ್ಯದ ಚಟಾಕಿ ಹಾರಿಸುತ್ತಾ, "ನೋಡಿ, ನಾವಿಬ್ಬರೂ ಹಳೆಯ ಪರಿಚಯಸ್ಥರು. ನಮ್ಮ ನಡುವೆ ಏನಾದರೂ ಪ್ರೇಮ ಸಂಬಂಧವಿದ್ದಿದ್ದರೆ ಅಥವಾ ಅಂತಹ ಮನಸ್ಥಿತಿ ನಮಗಿದ್ದಿದ್ದರೆ, ಅದು ಎಷ್ಟೋ ವರ್ಷಗಳ ಹಿಂದೆಯೇ ಆಗಬೇಕಿತ್ತು. ಒಂದು ವೇಳೆ ನಾವಿಬ್ಬರೂ ಪ್ರೀತಿಸಿದ್ದರೆ ಅಥವಾ ಮದುವೆಯಾಗಿದ್ದರೆ ನಮಗೆ ಇಷ್ಟೊತ್ತಿಗೆ ಮಕ್ಕಳೂ ಇರುತ್ತಿದ್ದರು," ಎಂದು ಹೇಳಿದ್ದಾರೆ. ಈ ಮೂಲಕ ತಮ್ಮಿಬ್ಬರ ನಡುವೆ ಸ್ನೇಹದ ಹೊರತಾಗಿ ಬೇರೇನೂ ಇಲ್ಲ ಎಂದು ಅವರು ಸಾರಿದ್ದಾರೆ.

ಚಿರಾಗ್ ಪಾಸ್ವಾನ್ ಅವರ ಬಗ್ಗೆ ಮಾತನಾಡಿದ ಕಂಗನಾ, "ಚಿರಾಗ್ ನನ್ನ ಆಪ್ತ ಸ್ನೇಹಿತ. ನಾವು ದೀರ್ಘಕಾಲದ ನಂತರ ಭೇಟಿಯಾಗುತ್ತಿದ್ದೇವೆ. ಅವರು ರಾಜಕೀಯದಲ್ಲಿ ಅದ್ಭುತವಾಗಿ ಕೆಲಸ ಮಾಡುತ್ತಿದ್ದಾರೆ ಮತ್ತು ಜನಪ್ರಿಯರಾಗಿದ್ದಾರೆ. ನಾವಿಬ್ಬರೂ ಒಂದೇ ವೃತ್ತಿಯಿಂದ (ಸಿನಿಮಾ) ರಾಜಕೀಯಕ್ಕೆ ಬಂದಿರುವುದು ನಮ್ಮ ನಡುವಿನ ಸಾಮಾನ್ಯ ಕೊಂಡಿ," ಎಂದು ತಿಳಿಸಿದ್ದಾರೆ.

ಈ ಹಿಂದೆ ಚಿರಾಗ್ ಪಾಸ್ವಾನ್ ಕೂಡ ಕಂಗನಾ ಅವರ ಬಗ್ಗೆ ಮಾತನಾಡುತ್ತಾ, "ನಾವು ಹಳೆಯ ಸ್ನೇಹಿತರು ಮತ್ತು ಸಹೋದ್ಯೋಗಿಗಳು. ಸಂಸತ್ತಿನಲ್ಲಿ ಅವರನ್ನು ಭೇಟಿಯಾದಾಗ ಸಹಜವಾಗಿ ಹರಟೆ ಹೊಡೆಯುತ್ತೇವೆ," ಎಂದು ಹೇಳಿದ್ದರು.

ಸದ್ಯ ಕಂಗನಾ ರಣಾವತ್ ಅವರು ಹಿಮಾಚಲ ಪ್ರದೇಶದ ಮಂಡಿ ಕ್ಷೇತ್ರದ ಸಂಸದೆಯಾಗಿ ಮತ್ತು ಚಿರಾಗ್ ಪಾಸ್ವಾನ್ ಅವರು ಕೇಂದ್ರ ಸಚಿವರಾಗಿ ತಮ್ಮ ಜವಾಬ್ದಾರಿಗಳಲ್ಲಿ ಬ್ಯುಸಿಯಾಗಿದ್ದಾರೆ. ಕಂಗನಾ ಅವರ ಮುಂದಿನ ಚಿತ್ರ 'ಎಮರ್ಜೆನ್ಸಿ' ಬಿಡುಗಡೆಗೆ ಸಿದ್ಧವಾಗುತ್ತಿದ್ದು, ಅದಕ್ಕೆ ಸಂಬಂಧಿಸಿದ ಕೆಲಸಗಳಲ್ಲಿ ಅವರು ತೊಡಗಿಸಿಕೊಂಡಿದ್ದಾರೆ,(ಏಜೆನ್ಸೀಸ್​).