45 ದಿನ ಬಿಕ್ಕಿ ಬಿಕ್ಕಿ ಕಣ್ಣೀರಿಟ್ಟಿದ್ದೀನಿ! 'ಸಿಐಡಿ' ಸೀರಿಯಲ್​ ತಂಡದ​ ಕರಾಳ ಸತ್ಯ ಬಿಚ್ಚಿಟ್ಟ ನಟಿ ಜಸ್ವೀರ್ ಕೌರ್ |

ಮುಂಬೈ: ಬಾಲಿವುಡ್​ನ ಜನಪ್ರಿಯ ಧಾರವಾಹಿ ನಟಿ ಜಸ್ವೀರ್​ ಕೌರ್​, ತಮ್ಮನ್ನು ಸಿಐಡಿ ಸೀರಿಯಲ್​ನಿಂದ ಹೊರ ಹಾಕಿದರೆ ವಿನಃ ನನ್ನಿಂದ ಅಗಲ್ಲ ಅಥವಾ ಬೇಡ ಎಂದು ಹೊರಗೆ ಬಂದವಳಲ್ಲ ಎಂದು ಸಂದರ್ಶನದಲ್ಲಿ ಅಚ್ಚರಿ ವಿಷಯವನ್ನು ಬಹಿರಂಗಪಡಿಸಿದ್ದಾರೆ.

ಹಲವು ವರ್ಷಗಳಿಂದ ನಡೆಯುತ್ತಿದ್ದ ಸಿಐಡಿ ಕ್ರೈಂ ಸೀರಿಯಲ್​ನಲ್ಲಿ ಇನ್ಸ್‌ಪೆಕ್ಟರ್ ಕಾಜಲ್ ಪಾತ್ರದಲ್ಲಿ ಅಭಿನಯಿಸಿ, ನೋಡುಗರ ಗಮನ ಸೆಳೆದಿದ್ದ ಜಸ್ವೀರ್ ಕೌರ್, ಕೆಲ ವರ್ಷಗಳ ಹಿಂದೆ ಈ ಸರಣಿಯಿಂದ ದಿಢೀರ್​ ಎಕ್ಸಿಟ್​ ಆದರು. ಈ ಕುರಿತು ಈಗ ಮೌನ ಮುರಿದಿರುವ ನಟಿ, ಇಲ್ಲಿಯವರೆಗೆ ನೀವು ಏನೆಲ್ಲ ಕೇಳಿದ್ದೀರೋ, ಅದು ಸುಳ್ಳು ಎಂದಿದ್ದಾರೆ.

ಒಂದು ದಿನ ನಿರ್ದೇಶಕರು ನನ್ನನ್ನು ಕರೆದು, ನೀವು ಈ ಧಾರವಾಹಿಯಿಂದ ಹೊರನಡೆಯಬೇಕು ಎಂದರು. ಏಕೆಂದು ಕೇಳಿದ್ದಕ್ಕೆ, ನಿಮ್ಮ ನಡವಳಿಕೆ ಸರಿಯಿಲ್ಲ. ಸ್ಕ್ರಿಪ್ಟ್​ನಲ್ಲಿ ಇರುವುದನ್ನು ಬಿಟ್ಟು ನಿಮ್ಮಿಷ್ಟದ ಪ್ರಕಾರ ಡೈಲಾಗ್​ ಹೇಳುತ್ತಿದ್ದೀರಿ. ನೀವು ಕೈಗೆ ಕೊಟ್ಟ ಸ್ಕ್ರಿಪ್ಟ್ ಎಸೆದು ಅಸಭ್ಯವಾಗಿ ವರ್ತಿಸುತ್ತಿದ್ದೀರಿ ಎಂದರು. ಆ ರೀತಿ ನಾನು ಯಾವಾಗ ನಡೆದುಕೊಂಡೆ ಎಂಬ ನೆನಪೇ ನನಗಿಲ್ಲ. ಹೀಗೆ ಹಲವು ಪ್ರಶ್ನೆಗಳಿಗೆ ಉತ್ತರ ಕೊಡಲಾಗದೆ ನಾನು ಸಿಐಡಿ ಧಾರವಾಹಿಯಿಂದ ಹೊರನಡೆದೆ ಎಂದು ಹೇಳಿದ್ದಾರೆ.

ಸುಭೋಜಿತ್​ ಘೋಷ್​ ಅವರ ಪಾಡ್​ಕಾಸ್ಟ್​ನಲ್ಲಿ ಮಾತು ಮುಂದುವರಿಸಿದ ನಟಿ, 2010 ಮತ್ತು 2012ರಲ್ಲಿ ಸಿಐಡಿ ಧಾರವಾಹಿ ಹಿಂದಿಯಲ್ಲಿ ಪ್ರಸಾರವಾಗುತ್ತಿತ್ತು. ಈ ಸೀರಿಯಲ್​ನಲ್ಲಿ ಮಹಿಳಾ ಇನ್​ಸ್ಪೆಕ್ಟರ್​ ಆಗಿ ನಾನು ಅಭಿನಯಿಸುತ್ತಿದ್ದೆ. ಒಮ್ಮೆ ನನ್ನ ಹೆಸರಲ್ಲಿ ಯಾರೋ ಮಾಟ-ಮಂತ್ರ ನಡೆದಿತ್ತು. ಕೂದಲನ್ನು ಯಾರೋ ನೆಲದಲ್ಲಿ ಹೂತು ಹಾಕಿರುವುದು ತಿಳಿಯಿತು. ಈ ಘಟನೆ ಬೆಳಕಿಗೆ ಬಂದ ಕೆಲವೇ ದಿನಕ್ಕೆ ಸೀರಿಯಲ್​ನಿಂದ ಎಕ್ಸಿಟ್​ ಆಗುವಂತೆ ಕರೆಬಂದಿತ್ತು ಎಂದು ಹೇಳಿಕೊಂಡಿದ್ದಾರೆ.

ಅವರಾಡಿದ ಮಾತುಗಳನ್ನು ಕೇಳಿದ ಬಳಿಕ 45 ದಿನ ನನ್ನ ಬದುಕಲ್ಲಿ ನರಕಯಾತನೆ ಉಂಟಾಯಿತು. ನಿತ್ಯವೂ ಕಣ್ಣೀರಿಡುತ್ತಿದ್ದೆ. 22 ತಿಂಗಳು ಆ ಧಾರವಾಹಿಯಲ್ಲಿ ಕೆಲಸ ಮಾಡಿದ್ದೆ. ನನ್ನಿಂದ ಆದ ತಪ್ಪು ಏನೆಂದು ನನಗೆ ಅರ್ಥವೇ ಆಗಲಿಲ್ಲ. ನಿರ್ಮಾಪಕರಿಗೆ ಈ ಬಗ್ಗೆ ಒಮ್ಮೆ ಪರಿಶೀಲನೆ ನಡೆಸುವಂತೆ ಕೇಳಿಕೊಂಡೆ. ನನ್ನದೇನು ತಪ್ಪಿಲ್ಲ ಎಂಬುದನ್ನು ಅರ್ಥ ಮಾಡಿಸಲು ಯತ್ನಿಸಿದೆ. ಎಲ್ಲರ ಜೊತೆ ಸಭೆ ನಡೆಯಿತು. ಆದರೆ, ಏನೂ ಪ್ರಯೋಜನವಾಗಲಿಲ್ಲ. ನನ್ನ ಸ್ಥಿತಿ ನೋಡಿ ನನ್ನಮ್ಮ ಕೂಡ ಅಳುತ್ತಿದ್ದರು. ಆಗ ನಾನು ಈ ಪರಿಸ್ಥಿತಿಯಿಂದ ಹೊರಬರಬೇಕೆಂದು ನಿರ್ಧರಿಸಿದೆ. ಬೇರೊಂದು ಕೆಲಸದ ಹುಡಕಾಟಕ್ಕೆ ಮುಗಿಬಿದ್ದೆ ಎಂದು ಕೌರ್ ಹೇಳಿದ್ದಾರೆ,(ಏಜೆನ್ಸೀಸ್).