ಗಲ್ಫ್​ ರಾಷ್ಟ್ರಗಳಲ್ಲಿ ಬ್ಯಾನ್​ ಆಗಿದ್ರೂ ನಿಲ್ಲದ 'ಧುರಂಧರ್' ಆರ್ಭಟ! ಅಷ್ಟಕ್ಕೂ ಅಂಥದ್ದೇನಿದೆ ಈ ಚಿತ್ರದಲ್ಲಿ? ಇಲ್ಲಿದೆ ಸತ್ಯ ಸಂಗತಿ | Dhurandhar

ಮುಂಬೈ: ಬಾಲಿವುಡ್​ ಸ್ಟಾರ್ ಹೀರೋ ರಣವೀರ್ ಸಿಂಗ್ ಅಭಿನಯದ ಆ್ಯಕ್ಷನ್-ಥ್ರಿಲ್ಲರ್ ಚಿತ್ರವಾದ 'ಧುರಂಧರ್' ಸದ್ಯ ಭಾರತೀಯ ಮಾತ್ರವಲ್ಲದೇ ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಗಳಿಕೆಯನ್ನು ಕಾಣುತ್ತಿದೆ. ತೆರೆಕಂಡ ಒಂದು ವಾರದೊಳಗೆ 180 ಕೋಟಿ ರೂ.ಗೂ ಹೆಚ್ಚು ಕಲೆಕ್ಷನ್ ಮಾಡಿರುವ ಈ ಚಿತ್ರ ಬಹುಬೇಗನೇ 500 ಕೋಟಿ ರೂ. ಕ್ಲಬ್‌ ಸೇರಿದೆ.

ಈಗಾಗಲೇ, ಬಹ್ರೇನ್, ಕುವೈತ್, ಓಮನ್, ಕತಾರ್, ಪಾಕಿಸ್ತಾನ, ಸೌದಿ ಅರೇಬಿಯಾ ಮತ್ತು ಯುಎಇ ರಾಷ್ಟ್ರಗಳಲ್ಲಿ ಈ ಸಿನಿಮಾವನ್ನು ಬ್ಯಾನ್ ಮಾಡಲಾಗಿದೆ. ಚಿತ್ರದಲ್ಲಿನ ಬಲವಾದ ಕಥೆ ಹಾಗೂ ನೈಜತೆಯನ್ನು ಹಾಗೆಯೇ ಬೆಳ್ಳಿಪರದೆಯ ಮೇಲಿಟ್ಟಿರುವ ನಿರ್ದೇಶಕರ ಪ್ರಯತ್ನಕ್ಕೆ ಸಿನಿಪ್ರಿಯರಿಂದ ವ್ಯಾಪಕ ಪ್ರಶಂಸೆ ಮತ್ತು ಮೆಚ್ಚುಗೆಗಳು ಹರಿದುಬರುತ್ತಿವೆ. ಪಾಕಿಸ್ತಾನಿ ಉಗ್ರರ ಕೈವಾಡ, ಪಾಪದ ಕೃತ್ಯಗಳನ್ನು ದೃಶ್ಯಗಳ ಮೂಲಕ ತೋರಿಸಿರುವ ಈ ಚಿತ್ರದ ಕಲೆಕ್ಷನ್ ಸದ್ಯ ಭಾರತೀಯ ಬಾಕ್ಸ್ ಆಫೀಸ್​ನಲ್ಲಿ ಹೊಸ ದಾಖಲೆಯನ್ನು ನಿರ್ಮಿಸುವತ್ತ ಸಾಗಿದೆ.

ಗಲ್ಫ್‌ ರಾಷ್ಟ್ರಗಳಲ್ಲಿ ನಿಷೇಧದ ಹೊರತಾಗಿಯೂ, 'ಧುರಂಧರ್' ಭಾರತೀಯ ಹಾಗೂ ಜಾಗತಿಕ ಬಾಕ್ಸ್ ಆಫೀಸ್​ನಲ್ಲಿ ಧೂಳೆಬ್ಬಿಸುತ್ತಿದೆ. ಆದಿತ್ಯ ಧಾರ್ ನಿರ್ದೇಶಿಸಿದ ಈ ಚಿತ್ರವು 10ನೇ ದಿನಕ್ಕೆ ಭಾರತೀಯ ಗಲ್ಲಾಪೆಟ್ಟಿಗೆಯಲ್ಲಿ ಒಟ್ಟು 420 ಕೋಟಿ ರೂ. ಕಂಡಿದೆ. ಇನ್ನು ವಿಶ್ವಾದ್ಯಂತ 110 ಕೋಟಿ ರೂ. ಗಳಿಸಿದೆ. ಅಲ್ಲಿಗೆ, ಕೇವಲ 10 ದಿನಕ್ಕೆ ಒಟ್ಟಾರೆ 530 ಕೋಟಿ ರೂ. ಕಲೆಕ್ಷನ್ ಕಾಣುವ ಮುಖೇನ ಚಿತ್ರವು ಶೀಘ್ರವೇ 1000 ಕೋಟಿ ಕ್ಲಬ್​ ಸೇರಲಿದೆ ಎಂಬುದರಲ್ಲಿ ಅನುಮಾನವಿಲ್ಲ.

ಹಿಂದಿಯ 'ಉರಿ' ಅಂತಹ ಸೂಪರ್​ಹಿಟ್ ಚಿತ್ರದ ನಂತರ, ಆದಿತ್ಯ ಧಾರ್​ ನಿರ್ದೇಶಿಸಿದ ಸಿನಿಮಾ 'ಧುರಂಧರ್'. ರಣವೀರ್ ಸಿಂಗ್​, ಸಂಜಯ್ ದತ್, ಅಕ್ಷಯ್ ಖನ್ನಾ, ಮಾಧವನ್ ಮತ್ತು ಅರ್ಜುನ್ ರಾಂಪಾಲ್ ಈ ಚಿತ್ರದಲ್ಲಿ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಒಬ್ಬ ಭಾರತೀಯ ಗೂಢಚಾರಿ ಕರಾಚಿಗೆ ಹೋಗಿ, ಅಲ್ಲಿನ ಭಾರತ ವಿರೋಧಿ ಗ್ಯಾಂಗ್‌ಗಳನ್ನು ಹೇಗೆ ಮಣಿಸುತ್ತಾನೆ ಎಂಬುದು ಕಥೆಯ ಜೀವಾಳ. ಪಾಕಿಸ್ತಾನಿ ರಾಜಕಾರಣಿಗಳು ಭಾರತದ ಮೇಲೆ ಉಗ್ರ ದಾಳಿಗೆ ಹೇಗೆ ಹಣಕಾಸು ಕೊಡುತ್ತಿದ್ದರು ಮತ್ತು ಶಸ್ತ್ರಾಸ್ತ್ರಗಳ ಪೂರೈಕೆ ಹೇಗಿತ್ತು ಎಂಬುದನ್ನು ಚಿತ್ರದಲ್ಲಿ ಇದ್ದದ್ದನ್ನು ಇದ್ದಂತೆ ತೋರಿಸಲಾಗಿದೆ.

'3 ಈಡಿಯಟ್ಸ್' ಮತ್ತು 'ತಾಲ್' ಚಿತ್ರಗಳಲ್ಲಿ ಭರ್ಜರಿ ಯಶಸ್ಸು​ ಕಂಡಿರುವ ನಟ ಅಕ್ಷಯ್ ಖನ್ನಾ, ಆರು ತಿಂಗಳ ಗ್ಯಾಪ್​ ನಂತರ ಮತ್ತೆ ತೆರೆಯ ಮೇಲೆ ಬಂದಿರುವುದು ಸಿನಿಪ್ರಿಯರ ಖುಷಿಗೆ ಕಾರಣವಾಗಿದೆ. ಇದರೊಟ್ಟಿಗೆ ರಣವೀರ್ ಸಿಂಗ್ ಅವರ ಅಭಿನಯಕ್ಕೆ ಫಿದಾ ಆಗಿರುವ ಸಿನಿರಸಿಕರು, ಸೋಷಿಯಲ್ ಮೀಡಿಯಾದಲ್ಲಿ ಚಿತ್ರಕ್ಕೆ ಉತ್ತಮ ವಿಮರ್ಶೆಗಳನ್ನೇ ನೀಡುತ್ತಿದ್ದಾರೆ,(ಏಜೆನ್ಸೀಸ್).