ಅವನು ನನ್ನ ತಂಗಿ ಮೇಲೆ ಕೈ ಹಾಕಲು ಬಂದಿದ್ದ...ಬಾಲ್ಯದ ಕಹಿ ಘಟನೆ ಹಂಚಿಕೊಂಡ ದಿವ್ಯಾ ದತ್ತಾ | Divya Dutta

ಮುಂಬೈ: ಚಿತ್ರರಂಗದಲ್ಲಿ ತಮ್ಮ ಅದ್ಭುತ ನಟನೆಯ ಮೂಲಕ ಗುರುತಿಸಿಕೊಂಡಿರುವ ದಿವ್ಯಾ ದತ್ತಾ (Divya Dutta), ತೆರೆಯ ಮೇಲೆ ಮಾತ್ರವಲ್ಲ ನಿಜ ಜೀವನದಲ್ಲೂ ಅನ್ಯಾಯದ ವಿರುದ್ಧ ಸಿಡಿದೆದ್ದ ಘಟನೆಯೊಂದನ್ನು ಹಂಚಿಕೊಂಡಿದ್ದಾರೆ. 

ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ತಮ್ಮ ಬಾಲ್ಯದ ದಿನಗಳಲ್ಲಿ ಸಹೋದರಿಯ ರಕ್ಷಣೆಗಾಗಿ ಕಾಮುಕನೊಬ್ಬನನ್ನು ನಡುರಸ್ತೆಯಲ್ಲೇ ಎದುರಿಸಿದ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ.

ಆ ಆಘಾತಕಾರಿ ಘಟನೆಯನ್ನು ನೆನಪಿಸಿಕೊಂಡ ದಿವ್ಯಾ ದತ್ತಾ, ಅದೊಂದು ಕ್ಷಣಾರ್ಧದಲ್ಲಿ ಸಂಭವಿಸಿದ ಘಟನೆ ಎಂದು ವಿವರಿಸಿದ್ದಾರೆ. ನನ್ನ ತಂಗಿಯೊಂದಿಗೆ ಒಬ್ಬ ವ್ಯಕ್ತಿ ಅತ್ಯಂತ ಕೆಟ್ಟದಾಗಿ ವರ್ತಿಸಲು ಪ್ರಯತ್ನಿಸುತ್ತಿದ್ದ. ಅವನು ಅವಳ ಎದೆಯನ್ನು ಹಿಸುಕಲು ಬಂದಾಗ ನನಗೆ ಎಲ್ಲಿಲ್ಲದ ಕೋಪ ಬಂತು.  ತಕ್ಷಣ ಅವನನ್ನು ಹಿಡಿದು ಸರಿಯಾಗಿ ಬುದ್ಧಿ ಕಲಿಸಿದೆ. ನಾನು ಗಟ್ಟಿಯಾಗಿ ಪ್ರತಿರೋಧ ತೋರಿದಾಗ ಸುತ್ತಮುತ್ತಲ ಜನರೆಲ್ಲ ಸಹಾಯಕ್ಕೆ ಬಂದರು. ಕೂಡಲೇ ಆ ಹುಡುಗ ಅಲ್ಲಿಂದ ಓಡಿಹೋದ ಎಂದು ನಟಿ ದಿವ್ಯಾ ದತ್ತಾ ಹೇಳಿದ್ದಾರೆ. 

ದಿವ್ಯಾ ದತ್ತಾ ಅವರ ಈ ಧೈರ್ಯಕ್ಕೆ ಅವರ ತಾಯಿಯೇ ಪ್ರೇರಣೆಯಂತೆ. ಶಾಲಾ ದಿನಗಳಲ್ಲಿ ದಿವ್ಯಾ ಅವರಿಗೆ ಕೆಲವು ಕಿಡಿಗೇಡಿಗಳು ನಿರಂತರವಾಗಿ ಕಿರುಕುಳ ನೀಡುತ್ತಿದ್ದರು. ಈ ವಿಷಯವನ್ನು ದಿವ್ಯಾ ಅವರು ತಮ್ಮ ತಾಯಿಗೆ ತಿಳಿಸಿದಾಗ, ಅವರು ಹೆದರಿ ಮನೆಯೊಳಗೆ ಕುಳಿತುಕೊಳ್ಳಲಿಲ್ಲ.

ಬದಲಾಗಿ, ಮರುದಿನವೇ ಒಂದು ಗುಂಪಿನೊಂದಿಗೆ ಅದೇ ರಸ್ತೆಯಲ್ಲಿ ಕಾಯುತ್ತಿದ್ದರು. ಕಿರುಕುಳ ನೀಡುವವರನ್ನು ನೇರವಾಗಿ ಎದುರಿಸಿದ ದಿವ್ಯಾ ತಾಯಿ, ಅನ್ಯಾಯದ ವಿರುದ್ಧ ಎದ್ದು ನಿಲ್ಲುವುದು ಹೇಗೆ ಮತ್ತು ಭಯವನ್ನು ಮಣಿಸುವುದು ಹೇಗೆ ಎಂಬುದನ್ನು ಮಗಳಿಗೆ ಪ್ರಾಯೋಗಿಕವಾಗಿ ಕಲಿಸಿಕೊಟ್ಟರು. ಆ ಘಟನೆಯು ಎದ್ದು ನಿಲ್ಲುವುದು ಮತ್ತು ಭಯವನ್ನು ನಮ್ಮ ಮೇಲೆ ಸವಾರಿ ಮಾಡಲು ಬಿಡದಿರುವ ಬಗ್ಗೆ ನನಗೆ ಬಹಳಷ್ಟು ಕಲಿಸಿತು ಎಂದು ದಿವ್ಯಾ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ಈ ಅನುಭವಗಳನ್ನು ಹಂಚಿಕೊಳ್ಳುತ್ತಾ, ಧೈರ್ಯ ಎನ್ನುವುದು ಒಬ್ಬರ ಪಾಲನೆ ಮತ್ತು ಕುಟುಂಬದ ಬೆಂಬಲದಿಂದ ಬರುತ್ತದೆ ಎಂದು ನಟಿ ಹೇಳಿದರು. ತಪ್ಪುಗಳನ್ನು ಎದುರಿಸುವ ಸಾಮರ್ಥ್ಯವು ನಮ್ಮ ಬೆಂಬಲ ವ್ಯವಸ್ಥೆಯನ್ನು ಅವಲಂಬಿಸಿರುತ್ತದೆ ಎಂಬುದು ಅವರ ಅಭಿಪ್ರಾಯವಾಗಿದೆ.

ಕೆಲಸದ ವಿಚಾರಕ್ಕೆ ಬಂದರೆ, ದಿವ್ಯಾ ದತ್ತಾ ಅವರು ಇತ್ತೀಚೆಗೆ ಚಿರೈಯಾ ವೆಬ್​ ಸರಣಿಯಲ್ಲಿ ಕಾಣಿಸಿಕೊಂಡಿದ್ದರು. ಈ ಸರಣಿಯಲ್ಲಿ ಸಂಜಯ್ ಮಿಶ್ರಾ, ಸಿದ್ಧಾರ್ಥ್ ಶಾ, ಪ್ರಸನ್ನ ಬಿಶ್ತ್, ಫೈಸಲ್ ರಶೀದ್, ತಿನ್ನು ಆನಂದ್ ಮತ್ತು ಸರಿತಾ ಜೋಶಿ ಸೇರಿದಂತೆ ದೊಡ್ಡ ತಾರಾಗಣವೇ ಇದೆ. ಈ ವೆಬ್​ ಸರಣಿಯಲ್ಲಿ ಕೌಟುಂಬಿಕ ಅತ್ಯಾಚಾರದಂತಹ ಸೂಕ್ಷ್ಮ ವಿಚಾರದ ಬಗ್ಗೆ ಜಾಗೃತಿ ಮೂಡಿಸಲಾಗಿದೆ,(ಏಜನ್ಸೀಸ್​).