ಧುರಂಧರ್ ಬೆನ್ನಲ್ಲೇ ಬಾರ್ಡರ್ 2 ಬಿಡುಗಡೆಯನ್ನು ನಿಷೇಧಿಸಿದ ಗಲ್ಫ್​ ದೇಶಗಳು! ಕಾರಣವೇನು ಗೊತ್ತೆ? Border 2

ಬಾಲಿವುಡ್​: ಪಾಕಿಸ್ತಾನವನ್ನು ಭಯೋತ್ಪಾದಕ ದೇಶವೆಂದು ತೋರಿಸಿದ ಹಿನ್ನಲೆಯಲ್ಲಿ ಆದಿತ್ಯ ಧರ್​ ನಿರ್ದೇಶನದ ಧುರಂಧರ್ ಸಿನಿಮಾವನ್ನು ಗಲ್ಫ್​ ಅಥವಾ ಮಧ್ಯಪ್ರಾಚ್ಚ್ಯ ದೇಶಗಳು ನಿಷೇಧವನ್ನು ಹೇರಿದ್ದವು. ಈಗ ಇದೇ ರೀತಿಯ ಬ್ಯಾನ್​ನನ್ನು ಸನ್ನಿ ಡಿಯೋನ್​ ನಟನೆಯ ಬಾರ್ಡರ್​ 2 (Border 2) ಸಿನಿಮಾ ಸಹ ಎದುರಿಸಲಿದೆ.

ವರದಿಗಳ ಪ್ರಕಾರ, ಬಹ್ರೇನ್, ಕುವೈತ್, ಓಮನ್, ಕತಾರ್, ಸೌದಿ ಅರೇಬಿಯಾ ಮತ್ತು ಯುಎಇಗಳು ಬಾರ್ಡರ್ 2 ಅನ್ನು ತಮ್ಮ ದೇಶದಲ್ಲಿ ಬಿಡುಗಡೆ ಮಾಡುವುದಿಲ್ಲ ಎಂದು ತಿಳಿಸಿದೆ. ಈ ಸಿನಿಮಾದಲ್ಲಿ ಪಾಕಿಸ್ತಾನ ವಿರೋಧಿ ವಿಷಯವನ್ನು ಹೊಂದಿರುವ ಯಾವುದೇ ಸಿನಿಮಾಗಳನ್ನು ನಮ್ಮಲ್ಲಿ ಬಿಡುಗಡೆ ಮಾಡುವುದಿಲ್ಲ ಎಂಬ ಸ್ಪಷ್ಟ ಸಂದೇಶವನ್ನು ಗಲ್ಫ್​ ದೇಶಗಳು ರವಾನಿಸಿವೆ.

ಆದರೂ ಬಾರ್ಡರ್ 2 ತಂಡ ಮಧ್ಯಪ್ರಾಚ್ಚ್ಯ ದೇಶಗಳೊಂದಿಗೆ ಚಿತ್ರ ಬಿಡುಗಡೆಗಾಗಿ ಮಾತುಕತೆ ನಡೆಸುತ್ತಿದ್ದು, ಮುಂದೆ ಏನಾಗಲಿದೆ ಎಂದು ಕಾದು ನೋಡಬೇಕಾಗಿದೆ. ಬಾರ್ಡರ್ 2 ಸಿನಿಮಾವು 1971 ರ ಭಾರತ ಹಾಗೂ ಪಾಕಿಸ್ತಾನದ ನಡುವೆ ನಡೆದಿದ್ದ ಯುದ್ಧದ ಆಧಾರಿತ ಸಿನಿಮಾವಾಗಿದ್ದು, ಈ ಯುದ್ಧದಲ್ಲಿ ಪಾಕಿಸ್ತಾನದ 93,000 ಸಾವಿರ ಸೈನಿಕರು ಭಾರತಕ್ಕೆ ಶರಣಾಗಿದ್ದರು.

ಬಾರ್ಡರ್ 2 ಸಿನಿಮಾವು 2026 ರಲ್ಲಿ ಬಿಡುಗಡೆಯಾಗಲಿರುವ ಸಿನಿಮಾಗಳಲ್ಲಿ ಬಹುನೀರಿಕ್ಷಿತ ಸಿನಿಮಾಗಳಲ್ಲಿ ಒಂದಾಗಿದ್ದು, ಈ ಸಿನಿಮಾದಲ್ಲಿ ಸನ್ನಿ ಡಿಯೋಲ್​, ವರುಣ ಧವನ್​, ದಿಲ್​ಜೀತ್​ ದೋಸಾಂಜ್​, ಆಹಾನ್​ ಶೆಟ್ಟಿ, ಸೋನಮ್​ ಬಾಜ್ವಾ ಮುಖ್ಯ ಭೂಮಿಕೆಯಲ್ಲಿ ನಟಿಸಲಿದ್ದಾರೆ.

ಇತ್ತೀಚೆಗೆ ಬಿಡುಗಡೆಯಾಗಿದ್ದ ಧುರಂಧರ್‌ ಸಿನಿಮಾಗೆ ಸಹ ಇಂತಹದ್ದೇ ಬ್ಯಾನ್​ನನ್ನು ಹೇರಲಾಗಿದ್ದರೂ ಸಹ ಭಾರತದ ಮಾರುಕಟ್ಟೆಯಲ್ಲಿ ಧೂಳೆಬ್ಬಿಸಿದ ಕಾರಣ ಗಲ್ಫ್​ ದೇಶಗಳ ನಿಷೇಧ ಸಿನಿಮಾದ ಮೇಲೆ ಯಾವುದೇ ಪರಿಣಾಮ ಬೀರಲಿಲ್ಲ. ಆದರೆ ವಾಣಿಜ್ಯ ದೃಷ್ಟಿಕೋನದಿಂದ ನೋಡಿದರೆ ಈ ನಿಷೇಧದಿಂದಾಗಿ ಸಿನಿಮಾ ತಂಡಕ್ಕೆ ಹೆಚ್ಚುವರಿಯಾಗಿ ದೊರೆಯಲಿದ್ದ 90 ಕೋಟಿ ರೂಪಾಯಿ ನಷ್ಟವಾಯಿತು.

ರಣವೀರ್ ಸಿಂಗ್ ಅಭಿನಯದ ಧುರಂಧರ್ ಚಿತ್ರವು ಜಾಗತಿಕವಾಗಿ ಭಾರಿ ಯಶಸ್ಸನ್ನು ಸಾಧಿಸಿ, 2025 ರಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ಭಾರತೀಯ ಚಿತ್ರವಾಗಿ ಹೊರಹೊಮ್ಮಿತು. ಆದಿತ್ಯ ಧಾರ್ ನಿರ್ದೇಶನದ ಈ ಸ್ಪೈ ಥ್ರಿಲ್ಲರ್ ಎರಡು ಭಾಗಗಳ ಸರಣಿಯಾಗಿದ್ದು, ಭಯೋತ್ಪಾದನಾ ವಿರೋಧಿ ಕಾರ್ಯಾಚರಣೆಗಳು ಮತ್ತು ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳ ಚಿತ್ರಣಕ್ಕಾಗಿ ಮಿಶ್ರ ವಿಮರ್ಶೆಗಳನ್ನು ಪಡೆದಿದೆ.