Dhurandhar Movie: ಮಾಸ್ಕ್ ಹಾಕಿಕೊಂಡು ಗುಟ್ಟಾಗಿ ಸಿನಿಮಾ ನೋಡಲು ಹೋದ ಸ್ಟಾರ್ ಹೀರೋ: ವಿಡಿಯೋ ವೈರಲ್!

ಹೌದು, ನಾವು ಮಾತನಾಡುತ್ತಿರುವುದು ಬಹುಭಾಷಾ ನಟ, ಮಹಿಳಾ ಅಭಿಮಾನಿಗಳ ಫೇವರಿಟ್ ನಟ ಆರ್. ಮಾಧವನ್ ಅವರ ಬಗ್ಗೆ. ಒಂದು ಕಾಲದಲ್ಲಿ 'ಲವರ್ ಬಾಯ್' ಆಗಿ ಮಿಂಚಿದ್ದ ಮಾಧವನ್, ಈಗ ವಿಭಿನ್ನ ಪಾತ್ರಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸುತ್ತಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾದ 'ಧುರಂಧರ್-2' (Dhurandhar-2) ಚಿತ್ರದ ಯಶಸ್ಸನ್ನು ಸವಿಯಲು ಮಾಧವನ್ ಅವರು ರಹಸ್ಯವಾಗಿ ಥಿಯೇಟರ್‌ಗೆ ಭೇಟಿ ನೀಡಿದ್ದಾರೆ.

ಸಾಮಾನ್ಯವಾಗಿ ಸೂಪರ್‌ಸ್ಟಾರ್ ರಜನಿಕಾಂತ್ ಅಥವಾ ದಳಪತಿ ವಿಜಯ್ ಅವರು ಇಂತಹ 'ಸೀಕ್ರೆಟ್ ವಿಸಿಟ್'ಗಳಿಗೆ ಹೆಸರುವಾಸಿ. ಈಗ ಮಾಧವನ್ ಕೂಡ ಅದೇ ಹಾದಿ ಹಿಡಿದಿದ್ದಾರೆ. ಮುಖಕ್ಕೆ ಮಾಸ್ಕ್ ಧರಿಸಿ, ಪ್ರೇಕ್ಷಕರ ನಡುವೆ ಯಾರಿಗೂ ಗುರುತು ಸಿಗದಂತೆ ಕುಳಿತು ಅವರು ಸಿನಿಮಾ ವೀಕ್ಷಿಸಿದ್ದಾರೆ.

'ಧುರಂಧರ್' ಚಿತ್ರದಲ್ಲಿ ಮಾಧವನ್ ಅವರು ಅಜಯ್ ಸನ್ಯಾಲ್ ಎಂಬ ಪ್ರಬಲ ಪಾತ್ರವನ್ನು ನಿರ್ವಹಿಸಿದ್ದಾರೆ. ಚಿತ್ರಮಂದಿರದಲ್ಲಿ ಪ್ರೇಕ್ಷಕರು ತಮ್ಮ ಪಾತ್ರಕ್ಕೆ ಮತ್ತು ಸಿನಿಮಾದ ಸಾಹಸ ದೃಶ್ಯಗಳಿಗೆ ಸಿಳ್ಳೆ-ಚಪ್ಪಾಳೆ ತಟ್ಟುತ್ತಿರುವುದನ್ನು ಕಂಡು ಮಾಧವನ್ ಮನಸಾರೆ ಆನಂದಿಸಿದ್ದಾರೆ. ಈ ಸುಂದರ ಕ್ಷಣಗಳನ್ನು ಅವರು ತಮ್ಮ ಮೊಬೈಲ್‌ನಲ್ಲಿ ಸೆರೆಹಿಡಿದು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.

ವಿಡಿಯೋ ಹಂಚಿಕೊಂಡಿರುವ ಮಾಧವನ್ ಅವರು ಬರೆದುಕೊಂಡಿರುವ ಸಾಲುಗಳು ಈಗ ಅಭಿಮಾನಿಗಳ ಗಮನ ಸೆಳೆಯುತ್ತಿವೆ. "ಐಎಸ್‌ಐ (ISI) ಯಾವುದೇ ಪ್ಲಾನ್ ಮಾಡಿರಬಹುದು. ಆದರೆ ಅವರು ಒಂದು ವಿಷಯ ತಿಳಿದುಕೊಳ್ಳಬೇಕು, ಅಜಯ್ ಸನ್ಯಾಲ್ ಯಾವಾಗಲೂ ಅವರ ಮೇಲೆ ಕಣ್ಣಿಟ್ಟಿರುತ್ತಾರೆ" ಎಂದು ಸಿನಿಮಾದ ಡೈಲಾಗ್ ಸ್ಟೈಲ್‌ನಲ್ಲೇ ಕ್ಯಾಪ್ಶನ್ ನೀಡಿದ್ದಾರೆ.

ಕೇವಲ ಹೀರೋ ಆಗಿ ಮಾತ್ರವಲ್ಲದೆ, ಕ್ಯಾರೆಕ್ಟರ್ ಆರ್ಟಿಸ್ಟ್ ಆಗಿಯೂ ಮಾಧವನ್ ಬಾಲಿವುಡ್ ಮತ್ತು ಸೌತ್ ಸಿನಿಮಾಗಳಲ್ಲಿ ಮಿಂಚುತ್ತಿದ್ದಾರೆ. 'ರಾಕೆಟ್ರಿ' ಅಂತಹ ಸಿನಿಮಾದ ಮೂಲಕ ರಾಷ್ಟ್ರಪ್ರಶಸ್ತಿ ಗೆದ್ದಿರುವ ಅವರು, ಈಗ 'ಧುರಂಧರ್' ಮೂಲಕ ಆಕ್ಷನ್ ಅವತಾರದಲ್ಲೂ ಅಬ್ಬರಿಸುತ್ತಿದ್ದಾರೆ. ಸದ್ಯ ವೈರಲ್ ಆಗಿರುವ ವಿಡಿಯೋ ನೋಡಿ ಅಭಿಮಾನಿಗಳು "ನಿಮ್ಮ ಸಿಂಪ್ಲಿಸಿಟಿಗೆ ನಾವು ಫ್ಯಾನ್" ಎಂದು ಕಾಮೆಂಟ್ ಮಾಡುತ್ತಿದ್ದಾರೆ,(ಏಜೆನ್ಸೀಸ್).