ಒಂದೇ ಒಂದು ಬ್ಲಾಕ್​ಬಸ್ಟರ್​ ಬದಲಿಸಿತು ಸಾರಾ ಸಿನಿ ಕರಿಯರ್​! ಅಲ್ಪ ಸಮಯದಲ್ಲೇ 'ಧುರಂಧರ್'​ ಬ್ಯೂಟಿ ಬೆನ್ನತ್ತಿದ ಜನಪ್ರಿಯತೆ

ಮುಂಬೈ: ಬಾಲಿವುಡ್ ಸ್ಟಾರ್ ಹೀರೋ ರಣವೀರ್ ಸಿಂಗ್ ನಟನೆಯ ಹಾಗೂ ಸೆನ್ಸೇಷನಲ್ ನಿರ್ದೇಶಕ ಆದಿತ್ಯ ಧರ್ ನಿರ್ದೇಶನದ 'ಧುರಂಧರ್' ಎರಡೂ ಭಾಗಗಳು ಇದೀಗ ಬ್ಲಾಕ್​ಬಸ್ಟರ್​ ಹಿಟ್​ ಸಾಲಿಗೆ ಸೇರ್ಪಡೆಯಾಗಿದ್ದು, ದೇಶಿಯ ಮತ್ತು ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಹೊಸ ಇತಿಹಾಸವನ್ನು ಸೃಷ್ಟಿಸಿದೆ. ಈ ಚಿತ್ರದ ಮೊದಲನೇ ಭಾಗದಲ್ಲಿ ರಣವೀರ್​ಗೆ ನಾಯಕಿಯಾಗಿ ಮಿಂಚಿದ ಯುವ ನಟಿ ಸಾರಾ ಅರ್ಜುನ್​, ಇದೀಗ ಅವಕಾಶಗಳನ್ನು ಕಬಳಿಸಿಕೊಳ್ಳುವಲ್ಲಿ ಸ್ಟಾರ್​ ನಟಿಯರನ್ನೇ ಹಿಂದಿಕ್ಕಿದ್ದಾರೆ.  

ಧುರಂಧರ್​ ಭರ್ಜರಿ ಯಶಸ್ಸಿನ ಬೆನ್ನಲ್ಲೇ ತಮ್ಮ ಸಿನಿ ಕರಿಯರ್​ನಲ್ಲಿ ಸಾರಾ​ ಉತ್ತುಂಗಕ್ಕೇರುತ್ತಿದ್ದಾರೆ. ಬಾಲಿವುಡ್‌ನ ಸ್ಟಾರ್​ ನಿರ್ದೇಶಕರು ಮತ್ತು ನಿರ್ಮಾಪಕರ ಗಮನ ಸೆಳೆದಿರುವ ಈ ಯುವತಿ, ಸದ್ಯ ಹಲವು ಬಿಗ್ ಬಜೆಟ್​ ಹಾಗೂ ಬ್ಯಾನರ್​ನ ಚಿತ್ರಗಳಲ್ಲಿ ನಟಿಸುವ ಅವಕಾಶಗಳನ್ನು ಬಹಳ ಕಡಿಮೆ ಸಮಯದಲ್ಲಿ ಗಿಟ್ಟಿಸಿಕೊಂಡಿದ್ದಾರೆ. ತೆಲುಗು ಚಿತ್ರ 'ಯುಫೋರಿಯಾ' ಮೂಲಕ ಒಂದಷ್ಟು ಪ್ರೇಕ್ಷಕರಿಗೆ ಮಾತ್ರ ಚಿರಪರಿಚಿತವಾಗಿದ್ದ ಸಾರಾ, ಈಗ ಭಾರತ ಮಾತ್ರವಲ್ಲದೇ, ವಿದೇಶಿ ಚಿತ್ರ ಪ್ರೇಮಿಗಳಿಗೂ ತಾವ್ಯಾರು ಎಂಬುದನ್ನು ಗೊತ್ತುಪಡಿಸಿದ್ದಾರೆ. 

ಹಲವಾರು ಅವಕಾಶಗಳ ನಡುವೆ ಚಿಕ್ಕ ವಯಸ್ಸಿಗೆ ದೊಡ್ಡ ಜವಾಬ್ದಾರಿಯೊಂದು ಸಾರಾ ಅರ್ಜುನ್​ರನ್ನು ಹುಡುಕಿಕೊಂಡು ಬಂದಿದೆ. ಅದು ಭಾರತೀಯ ಬೆಳ್ಳಿ ಪರದೆಯ ದಂತಕಥೆ, ಹಿರಿಯ ನಟಿ ಮಧುಬಾಲಾ ಅವರ ಜೀವನ ಚರಿತ್ರೆಯಲ್ಲಿ ನಟಿಸುವ ಅಪರೂಪದ ಅವಕಾಶ ಸಾರಾಗೆ ಸಿಕ್ಕಿರುವುದು ಸದ್ಯ ಅನೇಕರ ಹುಬ್ಬೇರಿಸಿದೆ. ಸಾಕಷ್ಟು ಟಾಪ್​ ಹಾಗೂ ಅನುಭವಿ ನಟಿಯರ ಮಧ್ಯೆ ಧುರಂಧರ್ ಬ್ಯೂಟಿಗೆ ಬಯೋಪಿಕ್​ ಒಲಿದು ಬಂದಿರುವುದು ನಿಜಕ್ಕೂ ಗಮನಾರ್ಹ.

ಜಸ್ಮೀತ್ ಕೆ. ರೀನ್ ಈ ಮಹತ್ವಾಕಾಂಕ್ಷೆಯ ಚಿತ್ರವನ್ನು ಸಂಜಯ್ ಲೀಲಾ ಬನ್ಸಾಲಿ ಅವರ ನಿರ್ಮಾಣದಲ್ಲಿ ನಿರ್ದೇಶಿಸುತ್ತಿದ್ದು, ಆರಂಭದಲ್ಲಿ ಹಲವಾರು ಸ್ಟಾರ್ ನಾಯಕಿಯರನ್ನು ಈ ಬಯೋಪಿಕ್​ಗೆ ಆಯ್ಕೆ ಮಾಡಲಾಗಿತ್ತು. ಆದರೆ, ಅಂತಿಮವಾಗಿ ಸಾರಾ ಅರ್ಜುನ್ ಮಾತ್ರ ಮಧುಬಾಲಾ ಪಾತ್ರಕ್ಕೆ ಸಂಪೂರ್ಣ ನ್ಯಾಯ ಒದಗಿಸಲು ಸಾಧ್ಯ ಎಂದು ಚಿತ್ರತಂಡಕ್ಕೆ ಓಕೆ ಆಗಿದ್ದೇ ತಡ, ಈ ವಿಷಯವನ್ನು ಸಾರಾಗೆ ತಲುಪಿಸಿದ್ದಾರೆ ಎನ್ನಲಾಗಿದೆ.

ಪ್ರಸ್ತುತ, ಚಿತ್ರದ ಪೂರ್ವ-ನಿರ್ಮಾಣ ಕಾರ್ಯಗಳು ವೇಗವಾಗಿ ನಡೆಯುತ್ತಿವೆ. ಎಲ್ಲವೂ ಅಂದುಕೊಂಡಂತೆ ಸಾಗಿದರೆ, ಈ ವರ್ಷದ ಅಂತ್ಯದ ವೇಳೆಗೆ ಚಿತ್ರದ ಚಿತ್ರೀಕರಣ ಪ್ರಾರಂಭವಾಗುವ ಮುನ್ಸೂಚನೆಯಿದೆ. 'ಧುರಂಧರ್' ಚಿತ್ರದಲ್ಲಿ ತನ್ನ ಅಭಿನಯದ ಮೂಲಕ ನೋಡುಗರ ಗಮನನವನ್ನು ತನ್ನತ್ತ ಸೆಳೆದ ಸಾರಾ, ಈಗ ಮಧುಬಾಲಾ ಅವರಂತಹ ಐಕಾನಿಕ್ ನಟಿಯ ಪಾತ್ರದಲ್ಲಿ ಕಾಣಿಸಿಕೊಂಡರೆ, ಬೆಳ್ಳಿ ಪರದೆಯ ಮೇಲೆ ಹೇಗಿರಬಹುದು ಎಂಬ ಕುತೂಹಲ ಸದ್ಯ ಸಿನಿಪ್ರಿಯರಲ್ಲಿ ಕೆರಳಿದೆ. ಈ ಕುರಿತು ಚಿತ್ರತಂಡದಿಂದ ಶೀಘ್ರದಲ್ಲೇ ಅಧಿಕೃತ ಘೋಷಣೆ ಹೊರಬೀಳುವ ಸಾಧ್ಯತೆಯಿದೆ,(ಏಜೆನ್ಸೀಸ್).