ಧುರಂಧರ್ 2 ಪ್ರೊಪಗಾಂಡಾ ಸಿನಿಮಾ: ಪಾಕಿಸ್ತಾನ ಭಯೋತ್ಪಾದಕ ದೇಶ ಡೈಲಾಗ್‌ಗೆ ಕಮಾಲ್​ ಖಾನ್​ ಆಕ್ಷೇಪ! Dhurandhar 2

ಮುಂಬೈ: ಭಾರತೀಯ ಸಿನಿ ಪ್ರೇಕ್ಷಕರು ಬಹು ಕಾತುರದಿಂದ ಕಾಯುತ್ತಿದ್ದ, ಸಿನಿಮಾ ಎಂದರೆ ಅದು ಧುರಂಧರ್​ 2 (Dhurandhar 2). ಈಗ ಈ ಸಿನಿಮಾವು ಮಾರ್ಚ್​ 19 ರಂದು ಚಿತ್ರ ಮಂದಿರಗಳಲ್ಲಿ ಬಿಡುಗಡೆಯಾಗಲಿದ್ದು, ಬಾಕ್ಸ್​ ಆಫೀಸ್​ನ್ನು ಕೊಳ್ಳೆ ಹೊಡೆಯಲು ಸನ್ನದ್ಧವಾಗಿದೆ.

ಆದರೆ ಈ ಸಿನಿಮಾದ ಬಿಡುಗಡೆಗೂ ಮುನ್ನವೆ ಹಲವು ವಿವಾದಗಳು ಸಹ ಕೇಳಿಬರುತ್ತಿದ್ದು, ಈ ಸಿನಿಮಾ ಹಿಂಸೆಯನ್ನು ವಿಜೃಂಭಣೆ ಮಾಡುತ್ತಿದೆ ಎಂಬ ಅರೋಪದ ಜೊತೆಗೆ ಕೋಮು ಸೌಹಾರ್ದತೆಯನ್ನು ಸಹ ಹಾಳು ಮಾಡುವ ಶಕ್ತಿ ಈ ಸಿನಿಮಾಗೆ ಎಂಬ ಆರೋಪಗಳು ಕೇಳಿಬರುತ್ತಿದೆ.

ಈಗ ಈ ಸಿನಿಮಾದ ಬಗ್ಗೆ, ಸ್ವಯಂ ಘೋಷಿತ ಸಿನಿಮಾ ವಿಮರ್ಶಕ ಕಮಾಲ್​ ಆರ್​ ಖಾನ್​ (KRK) ನಾಲಿಗೆ ಹರಿಬಿಟ್ಟಿದ್ದು, ಈ ಸಿನಿಮಾ (ಧುರಂಧರ್​ 2) ಒಂದು ಪ್ರೊಪಗಾಂಡಾ ಸಿನಿಮಾ, ಈ ಸಿನಿಮಾ ಕೇವಲ ಪಾಕಿಸ್ತಾನವನ್ನು ಕೆಟ್ಟದಾಗಿ ತೋರಿಸುವ ಪ್ರಯತ್ನ ಮಾಡುತ್ತಿದೆ ಎಂದು ಹೇಳಿದ್ದಾರೆ.

ನಮ್ಮ ಜನರಿಗೆ ಒಂದು ಉತ್ತಮ ಸಿನಿಮಾದ ಬದಲಿಗೆ ಈ ರೀತಿಯ ಕಪೋಲ ಕಲ್ಪಿತ ಸಿನಿಮಾಗಳೇ ಇಷ್ಟವಾಗುವ ಕಾರಣ ನಿರ್ದೇಶಕರು ಸಹ ಇದೇ ರೀತಿಯ ಸಿನಿಮಾಗಳನ್ನು ನಿರ್ಮಿಸಲು ಮುಂದಾಗುತ್ತಿದ್ದಾರೆ. ಹಾಗೆಯೇ ಆದಿತ್ಯ ಧರ್​ನಿಗೆ ಈ ಪ್ರೊಪಗಾಂಡಾ ಸಿನಿಮಾ ಹೊರತು ಪಡಿಸಿ, ಒಂದು ಉತ್ತಮ ಸಿನಿಮಾವನ್ನು ಖಂಡಿತವಾಗಿ ನಿರ್ಮಿಸಲು ಸಾಧ್ಯವಿಲ್ಲ ಎಂದು ತಮ್ಮ ಅಭಿಪ್ರಾಯವನ್ನು ತಮ್ಮ ಎಕ್ಸ್​ (ಟ್ವಿಟರ್​) ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಮಾರ್ಚ್​ 19 ರಂದು ಬಿಡುಗಡೆಯಾಗಲಿರುವ ಧುರಂಧರ್​ 2 ಸಿನಿಮಾ, ಈಗಾಗಲೇ ಮುಂಗಡ ಟಿಕೆಟ್​ ಬುಕ್ಕಿಂಗ್​ನಲ್ಲಿ ನೂತನ ದಾಖಲೆ ನಿರ್ಮಿಸಿದೆ.

ಬಿಡುಗಡೆಗೆ ಮೊದಲೇ ಈ ಸಿನಿಮಾ ಸುಮಾರು 6 ಲಕ್ಷ ಟಿಕೆಟ್​ಗಳನ್ನು ಮಾರಾಟ ಮಾಡಿದ್ದು, ಇದರ ಮೊತ್ತ ಈಗಾಗಲೇ 37 ಕೋಟಿ ಎಂದು ಹೇಳಲಾಗುತ್ತಿದೆ. ಕೇವಲ ಭಾರತಕ್ಕೆ ಸೀಮಿತವಾಗಿರದ ಈ ಸಿನಿಮಾ ಕ್ರೇಜ್​ ವಿದೇಶದಲ್ಲಿ ಕೂಡ ಹಬ್ಬಿದ್ದು ಅಮೇರಿಕಾದಲ್ಲಿಯೇ ಸುಮಾರು 5 ಮಿಲಿಯನ್​ ಮೌಲ್ಯದ ಟಿಕೆಟ್​ಗಳನ್ನು ಮಾರಾಟ ಮಾಡುವ ಮೂಲಕ ಅತ್ಯಧಿಕ ಮುಂಗಡ ಬುಕ್ಕಿಂಗ್​ ಮಾಡಿದ ಸಿನಿಮಾವಾಗಿ ಹೊರಹೊಮ್ಮಿದೆ.

ಧುರಂಧರ್​ ಇದೊಂದು ಸ್ಪೈ-ಥ್ರಿಲ್ಲರ್​ ಸಿನಿಮಾವಾಗಿದ್ದು, ಪಾಕಿಸ್ತಾನದಲ್ಲಿ ಭಾರತೀಯ ಗೂಢಚರ ಹೇಗೆ ಕೆಲಸ ಮಾಡುತ್ತಾನೆ ಎನ್ನುವುದೇ ಈ ಸಿನಿಮಾದ ಕಥಾ ವಸ್ತುವಾಗಿದೆ. ಈ ಸಿನಿಮಾದ ಮೊದಲ ಭಾಗವು 2025 ರ ಡಿಸೆಂಬರ್​ನಲ್ಲಿ ತೆರೆಕಂಡು ಸುಮಾರು 1,000 ಕೋಟಿ ಕಲೆಕ್ಷನ್​ ಮಾಡಿತ್ತು. ಈಗ ಈ ಸಿನಿಮಾದ ಎರಡನೆ ಭಾಗ ಮಾರ್ಚ್​ 19 ರಂದು ಬಿಡುಗಡೆಯಾಗಲಿದೆ.

ಈ ಸಿನಿಮಾದಲ್ಲಿ ರಣವೀರ್ ಸಿಂಗ್​, ಅಕ್ಷನ್​ ಖನ್ನಾ,ಆರ್.ಮಾಧವನ್​, ಅರ್ಜುನ್​ ರಾಂಪಾಲ್​, ಸಂಜಯ್​ ದತ್ತ್, ಸಾರಾ ಅರ್ಜುನ್​ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರೆ, ಉರಿ ಖ್ಯಾತಿಯ ಆದಿತ್ಯ ಧರ್​ ಈ ಸಿನಿಮಾದ ನಿರ್ದೇಶನ ಮಾಡಿದ್ದಾರೆ,(ಏಜನ್ಸೀಸ್​).