ಬ್ಯಾಕ್​ ಟು ಬ್ಯಾಕ್​ ಪ್ಲಾಪ್​ ಚಿತ್ರಗಳು! ಸರಣಿ ವೈಫಲ್ಯದ ಮಧ್ಯೆಯೂ ಈ ನಟಿಗೆ ಇಲ್ಲ ಅವಕಾಶಗಳ ಕೊರತೆ

ಬೆಂಗಳೂರು: ಟಾಲಿವುಡ್​ನ ಹಾಟ್​ ಬ್ಯೂಟಿ ರಾಶಿ ಖನ್ನಾ ಅಭಿನಯದ ಮತ್ತೊಂದು ಸಿನಿಮಾ ಇದೀಗ ಸೋಲಿನ ಸರಣಿಗೆ ಸೇರ್ಪಡೆಗೊಂಡಿದೆ. ಈ ವರ್ಷ ನಟಿ ಅಭಿನಯದ ಹಲವು ಬಹುನಿರೀಕ್ಷಿತ ಚಿತ್ರಗಳು ಫ್ಲಾಪ್​ ಸಾಲಿಗೆ ಸೇರಿದ್ದು, ಆ ಪಟ್ಟಿಯಲ್ಲಿ ಅವರ ಇತ್ತೀಚಿನ '120 ಬಹುದ್ದೂರ್'​ ಕೂಡ ಒಂದು.

'ಪ್ರತಿ ರೋಜು ಪಾಂಡಗೆ' ಬಳಿಕ ಯಾವುದೇ ಹಿಟ್ ನೋಡದ ರಾಶಿ, ಬಾಲಿವುಡ್‌ನ ವೆಬ್ ಸರಣಿಗಳಲ್ಲಿಯೂ ಕಾಣಿಸಿಕೊಂಡಿದ್ದಾರೆ. ಇದನ್ನು ಹೊರತುಪಡಿಸಿದರೆ, ಅವರು ನಟಿಸಿದ ಬಹುತೇಕ ಸಿನಿಮಾಗಳು ಸೋಲಿನ ಹಾದಿಯನ್ನೇ ಹಿಡಿದಿದೆ. 'ಯೋಧ', 'ದಿ ಸಬರ್ಮತಿ ರಿಪೋರ್ಟ್', '120 ಬಹದ್ದೂರ್' ಫ್ಲಾಪ್​ ಆಗಿವೆ. ಆದಾಗ್ಯೂ, ತಮಿಳು ಚಿತ್ರರಂಗದಿಂದ ನಟಿಗೆ ಕರ್ಮಷಿಯಲ್​ ಹಿಟ್‌ಗಳು ಲಭಿಸಿವೆ. 'ಅರಮನೈ 4' ಚಿತ್ರದಲ್ಲಿ ತಮ್ಮ ಗ್ಲಾಮರ್ ಲುಕ್​ ಮೂಲಕ ಚಿತ್ರರಸಿಕರನ್ನು ರಂಜಿಸಿ, ಯಶಸ್ಸನ್ನು ಕಂಡಿದ್ದಾರೆ.

ಕಳೆದ ವರ್ಷ ಸಬರ್ಮತಿ ರಿಪೋರ್ಟ್‌ ಚಿತ್ರದಿಂದ ಶುರುವಾದ ಸರಣಿ ಸೋಲು 2025ರಲ್ಲೂ ಮುಂದುವರಿದಿದೆ​. ಈ ವರ್ಷ, ರಾಶಿ ಹ್ಯಾಟ್ರಿಕ್ ಫ್ಲಾಪ್‌ಗಳನ್ನು ಎದುರಿಸಿದ್ದಾರೆ. ಉತ್ತರದಿಂದ ದಕ್ಷಿಣಕ್ಕೆ ಹಲವು ಚಿತ್ರಗಳಲ್ಲಿ ನಟಿಸಿದರೂ, ಇಲ್ಲಿಯವರೆಗೆ ಒಂದೇ ಒಂದು ಹಿಟ್ ಸಿಕ್ಕಿಲ್ಲ. ತಮಿಳಿನಲ್ಲಿ 'ಆಗತ್ಯ', ತೆಲುಗಿನಲ್ಲಿ 'ಜಾನಾ', ಹಿಂದಿಯಲ್ಲಿ '120 ಬಹದ್ದೂರ್' ಚಿತ್ರಗಳು ಬಾಕ್ಸ್ ಆಫೀಸ್‌ನಲ್ಲಿ ಕಮಾಲ್​ ಮಾಡುವಲ್ಲಿ ವಿಫಲವಾಗಿವೆ. ಈ ಮೂರು ಚಿತ್ರಗಳೊಂದಿಗೆ ಬಾಲಿವುಡ್‌ನಲ್ಲಿ ಒಂದೇ ಒಂದು ಹಿಟ್ ಸಿಗದಿದ್ದರೂ, ರಾಶಿ ತನಗೆ ಬಂದಿರುವ ಆಫರ್‌ಗಳಿಂದ ಹಿಂದೆ ಸರಿದಿಲ್ಲ.

ಪ್ರಸ್ತುತ, 'ತಲಖೋ ಮೇ ಏಕ್' ಮತ್ತು 'ಬ್ರಿಡ್ಜ್' ಚಿತ್ರಗಳ ಜತೆಗೆ ವೆಬ್ ಸರಣಿ 'ಫರ್ಜಿ 2'ನಲ್ಲಿ ರಾಶಿ ಸಖತ್ ಬಿಜಿಯಾಗಿದ್ದಾರೆ. ತಮಿಳಿನಲ್ಲಿ ಸಿದ್ಧಾರ್ಥ್ ನಟಿಸುತ್ತಿರುವ 'ರೌಡಿ ಅಂಡ್ ಕೋ' ಚಿತ್ರಕ್ಕೆ ರಾಶಿ ಖನ್ನಾ ನಾಯಕಿಯಾಗಿ ಆಯ್ಕೆ ಆಗಿದ್ದಾರೆ. ಇದೆಲ್ಲವೂ, ಅವರಿಗೆ ಸೋಲಿನಿಂದ ಅವಕಾಶಗಳು ಕಡಿಮೆ ಆಗುವುದಿಲ್ಲ ಎಂಬ ಗಟ್ಟಿಯಾದ ಭರವಸೆಯನ್ನು ನೀಡಿರುವುದಂತು ಖಂಡಿತ,(ಏಜೆನ್ಸೀಸ್).