ಆಗೋದೆಲ್ಲ ಒಳ್ಳೇದಕ್ಕೆ... ಕ್ರಿಕೆಟರ್​ ಆಗ್ಬೇಕಿದ್ದ ಆದಿತ್ಯ ಧರ್​ ಡೈರೆಕ್ಟರ್​ ಆಗಿದ್ಹೇಗೆ? ಏನಿದು ಸ್ಟುವರ್ಟ್​ ಬಿನ್ನಿ ಕನೆಕ್ಷನ್​? Aditya Dhar

Aditya Dhar : ಬಾಲಿವುಡ್​ ಸೂಪರ್​ಸ್ಟಾರ್​ ರಣವೀರ್​ ಸಿಂಗ್​ ನಟನೆಯ ಧುರಂಧರ್​-2 ಸಿನಿಮಾ ಬಾಕ್ಸ್​ ಆಫೀಸ್​ನಲ್ಲಿ ಧೂಳೆಬ್ಬಿಸುತ್ತಿದೆ. ಹಿಂದಿನ ಎಲ್ಲ ಸಿನಿಮಾಗಳ ದಾಖಲೆಯನ್ನು ಮುರಿದು, ಬಾಲಿವುಡ್​ನಲ್ಲಿ ಹೊಸ ಇತಿಹಾಸ ಬರೆಯುತ್ತಿದೆ. ಈ ಸಿನಿಮಾದ ಭರ್ಜರಿ ಯಶಸ್ಸಿನ ನಡುವೆ ನಿರ್ದೇಶಕ ಆದಿತ್ಯ ಧರ್​ ಹೆಸರು ಹೆಚ್ಚು ಸುದ್ದಿಯಲ್ಲಿದೆ. ಅನೇಕ ಗಣ್ಯರು ಆದಿತ್ಯರನ್ನು ಕೊಂಡಾಡುತ್ತಿದ್ದಾರೆ. ಅಲ್ಲದೆ, ಆದಿತ್ಯ ಕುರಿತಾದ ಅನೇಕ ಅಚ್ಚರಿಯ ಸಂಗತಿಗಳು ಬೆಳಕಿಗೆ ಬರುತ್ತಿವೆ. ನಿರ್ದೇಶಕನಾಗುವ ಮುಂಚೆ ಆದಿತ್ಯ ಓರ್ವ ಕ್ರಿಕೆಟರ್​ ಆಗಲು ಬಯಸಿದ್ದರು ಅನ್ನೋ ಆಸಕ್ತಿದಾಯಕ ಸಂಗತಿ ಕೂಡ ಹೊರಬಿದ್ದಿದೆ. 

ಇತ್ತೀಚೆಗೆ ಮಾಷಬಲ್ ( Mashable ) ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ, ಬಾಲಿವುಡ್​ನ ಖ್ಯಾತ ನಿರ್ದೇಶಕ ಪ್ರಿಯದರ್ಶನ್ ಅವರು ಆದಿತ್ಯ ಧರ್ ಕುರಿತು ಮನಬಿಚ್ಚಿ ಮಾತನಾಡಿದ್ದಾರೆ. ತಾನೊಬ್ಬ ಕ್ರಿಕೆಟರ್​ ಆಗಬೇಕೆಂಬ ಕನಸನ್ನು ಬಿಟ್ಟು  ಚಲನಚಿತ್ರ ಜಗತ್ತಿಗೆ ಪ್ರವೇಶಿಸಿ, ಇಂದು ಯಶಸ್ಸಿನ ಅಲೆಯಲ್ಲಿ ತೇಲುತ್ತಿದ್ದಾರೆ ಎಂದು ತಮ್ಮ ಶಿಷ್ಯನ ಬಗ್ಗೆ ಪ್ರಿಯದರ್ಶನ್​ ಹೆಮ್ಮೆಯಿಂದ ಹೇಳಿದ್ದಾರೆ. ಸಿನಿಮಾದ ಗಂಧ-ಗಾಳಿ ಗೊತ್ತಿರದ ಆದಿತ್ಯಗೆ ಸಿನಿಮಾದ ಪ್ರತಿಯೊಂದು ಅಂಶಗಳನ್ನು ಕಲಿಸಿದ್ದು, ಇದೇ ಪ್ರಿಯದರ್ಶನ್​. ಹೀಗಾಗಿ ಇತ್ತೀಚೆಗೆ ಆದಿತ್ಯ ಅವರು ತನ್ನ ಯಶಸ್ಸಿನ ಕ್ರೆಡಿಟ್​ ಅನ್ನು ಪ್ರಿಯದರ್ಶನ್​ ಅವರಿಗೆ ನೀಡಿದರು. 

ಆದಿತ್ಯ ಅವರು 2010 ರಲ್ಲಿ ನನ್ನ ಜೊತೆ ಸೇರಿಕೊಂಡರು. ಅವರು ತುಂಬಾ ವಿಶೇಷ ವ್ಯಕ್ತಿಯಾಗಿದ್ದರು. ನನ್ನ ಜತೆ ಇದ್ದಂತಹ ಸಮಯದಲ್ಲಿ ಸಂಭಾಷಣೆ ಬರೆಯುತ್ತಿದ್ದರು. ಭಾಷೆಯೇ ಅವರ ಶಕ್ತಿಯಾಗಿತ್ತು. ಹೇಳಬೇಕೆಂದರೆ, ಅವರ ಭಾಷೆ ತುಂಬಾ ಅದ್ಭುತವಾಗಿತ್ತು. ಆದಿತ್ಯ ಅವರು ಸುಂದರವಾದ ದೃಶ್ಯಗಳನ್ನು ಹೆಣೆಯಬಲ್ಲರು. ಸಿನಿಮಾಗೂ ಮುಂಚೆ ಕ್ರಿಕೆಟ್​ ಮೇಲೆ ತುಂಬಾ ಆಸಕ್ತಿ ಹೊಂದಿದ್ದರು. ಆದರೆ, ಕೆಲ ರಾಜಕೀಯ ಪ್ರಭಾವದಿಂದಾಗಿ 19 ವರ್ಷದೊಳಗಿನವರ ತಂಡಕ್ಕೆ ಸೇರಲು ವಿಫಲರಾದರು. ಆ ಬಳಿಕ ಅವರು ಸಿನಿಮಾ ರಂಗವನ್ನು ಪ್ರವೇಶಿಸಿದರು ಎಂದು ಪ್ರಿಯದರ್ಶನ್​ ಅವರು ಮಾಷಬಲ್ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ. 

ಭಾರತದ ತಂಡಕ್ಕೆ ಸ್ಥಾನ ಸಿಗದಿದ್ದಾಗ ಆದಿತ್ಯ ತಮ್ಮ ಮನೆಯಲ್ಲೇ ಉಳಿದರು. ಆ ಸಮಯದಲ್ಲಿ ಗರ್ದಿಶ್ ಸಿನಿಮಾ ನೋಡುವ ಅವಕಾಶ ಅವರಿಗೆ ಸಿಕ್ಕಿತು. ಆ ಸಿನಿಮಾ ಅವರ ಜೀವನವನ್ನೇ ಬದಲಾಯಿಸಿತು. ಗರ್ದಿಶ್​ ಸಿನಿಮಾ ನೋಡಿದ ತಕ್ಷಣವೇ ತಮ್ಮ ವೃತ್ತಿಜೀವನವನ್ನಾಗಿ ಸಿನಿಮಾ ರಂಗವನ್ನು ಆಯ್ದುಕೊಂಡರು ಎಂದು ಪ್ರಿಯದರ್ಶನ್ ಹೇಳಿದರು.

ಅಂದಹಾಗೆ, ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಕೆಲವು ವದಂತಿಗಳ ಪ್ರಕಾರ, ಆದಿತ್ಯ ಅವರು ದೆಹಲಿ ವಿಶ್ವವಿದ್ಯಾಲಯದ ಸ್ಪಿನ್ನರ್ ಆಗಿದ್ದರು ಮತ್ತು 2002ರ ಅಂಡರ್-19 ವಿಶ್ವಕಪ್‌ನಲ್ಲಿ ಸ್ಥಾನ ಪಡೆಯುವ ಗುರಿ ಹೊಂದಿದ್ದರು. ಆದರೆ, ಆದಿತ್ಯ ಅವರು ಉತ್ತಮ ಫಾರ್ಮ್​ನಲ್ಲಿದ್ದರೂ, ರೋಜರ್ ಬಿನ್ನಿ ಅವರ ಮಗ ಸ್ಟುವರ್ಟ್ ಬಿನ್ನಿ ಅವರನ್ನು ಆಯ್ಕೆ ಮಾಡಲಾಯಿತು ಎನ್ನಲಾಗಿದೆ.

ಈ ಒಂದು ಘಟನೆಯು ಆದಿತ್ಯ ಅವರು ಇನ್ನು ಮುಂದೆ ಕ್ರಿಕೆಟ್ ಆಡದಿರಲು ಮತ್ತು ಚಲನಚಿತ್ರ ನಿರ್ಮಾಣದತ್ತ ತಮ್ಮ ಗಮನ ಹರಿಸಲು ಕಾರಣವಾಯಿತು ಎಂದು ಹೇಳಲಾಗುತ್ತದೆ. ಆದರೆ, ಇದು ಕೇವಲ ವದಂತಿ ಮಾತ್ರ. ಈ ಬಗ್ಗೆ ಆದಿತ್ಯ ಆಗಲಿ ಅಥವಾ ಪ್ರಿಯದರ್ಶನ್​ ಅವರಾಗಲಿ ಹೇಳಿಕೆ ನೀಡಿಲ್ಲ, (ಏಜೆನ್ಸೀಸ್​).