ರಾಜ್​ಪಾಲ್​ ಬೆಂಬಕ್ಕೆ ನಿಂತ ಬಾಲಿವುಡ್: ಸಲ್ಮಾನ್​, ಅಜಯ್​ ದೇವಗನ್​ ಸೇರಿ ಹಲವರಿಂದ ಧನ ಸಹಾಯ | Rajpal Yadav

ಮುಂಬೈ: ಬಾಲಿವುಡ್​ನ ಖ್ಯಾತ ಹಾಸ್ಯನಟ ರಾಜ್‌ಪಾಲ್ ಯಾದವ್ (Rajpal Yadav) ಚೆಕ್ ಬೌನ್ಸ್ ಪ್ರಕರಣಕ್ಕೆ ಸಂಬಂಧಸಿದಂತೆ ತಿಹಾರ್ ಜೈಲಿಗೆ ಸೇರಿರುವ ಘಟನೆ ಈಗ ದೇಶದಾದ್ಯಂತ ಸಂಚಲನವನ್ನು ಸೃಷ್ಟಿಸಿದ ಹಿನ್ನಲೆ ಬಾಲಿವುಡ್​ನ ಖ್ಯಾತನಾಮರು ಈಗ ರಾಜ್​ಪಾಲ್​ ಅವರ ಸಹಾಯಕ್ಕೆ ಧಾವಿಸಿದ್ದಾರೆ.

2010 ರಲ್ಲಿ ಬಿಡುಗಡೆಯಾಗಿದ್ದ ಅತಾ, ಪತಾ, ಲಾಪತಾ ಎಂಬ ಸಿನಿಮಾ ಯಶಸ್ಸನ್ನು ಕಾಣದ ಹಿನ್ನಲೆ ಸುಮಾರು 9 ಕೋಟಿ ರೂಪಾಯಿಗಳನ್ನು ರಾಜ್​ಪಾಲ್​ ಪಾವತಿಸಬೇಕಿತ್ತು. ಈ ಹಣವನ್ನು ಸರಿಯಾದ ಸಮಯಕ್ಕೆ ನೀಡದ ಹಿನ್ನಲೆ ಈಗ ಅವರು ಜೈಲು ಪಾಲಾಗಿದ್ದಾರೆ. ತಮ್ಮ ಜೊತೆಗೆ ಹಲವಾರು ಸಿನಿಮಾಗಳಲ್ಲಿ ನಟಿಸಿದ್ದ ನಟ ಈಗ ಕಷ್ಟದಲ್ಲಿರುವಾಗ ಸಹಾಯ ಮಾಡಲು ಹಲವಾರು ಬಾಲಿವುಡ್​ ತಾರಾಗಳು ಮುಂದಾಗಿರುವುದು ವರದಿಯಾಗಿದೆ.

ವರದಿಗಳ ಪ್ರಕಾರ, ಸೋನು ಸೂದ್, ಗುರ್ಮೀತ್ ಚೌಧರಿ ಮತ್ತು ಅನೀಸ್ ಬಾಜ್ಮಿ ಈ ಮೊದಲು ರಾಜ್​ಪಾಲ್​ ಅವರಿಗೆ ಬೆಂಬಲ ಸೂಚಿಸಿದ್ದರು. ಈಗ ನೂತನವಾಗಿ, ಸಲ್ಮಾನ್ ಖಾನ್, ಅಜಯ್ ದೇವಗನ್, ವರುಣ್ ಧವನ್ ಮತ್ತು ಇತರ ನಟರು ಸಹ ಯಾದವ್‌ಗೆ ಸಹಾಯ ಮಾಡಲು ಮುಂದೆ ಬಂದಿದ್ದಾರೆ ಎಂದು ಹೇಳಲಾಗುತ್ತಿದೆ.

ಖಾಸಗಿ ಮಾಧ್ಯಮವೊಂದರಲ್ಲಿ ಮಾತಾಡಿದ ರಾಜ್​ಪಾಲ್​ ಅವರ ಮ್ಯಾನೇಜರ್​ ಗೋಲ್ಡಿ, ಆರ್ಥಿಕ ಸಂಕಷ್ಟದಲ್ಲಿರುವ ರಾಜ್​ಪಾಲ್​ ಅವರಿಗೆ ಸಹಾಯ ಮಾಡಲು ಸೋನು ಸೂದ್, ಸಲ್ಮಾನ್ ಖಾನ್ ಮತ್ತು ಅಜಯ್ ದೇವಗನ್ ಅವರಂತಹ ನಟರು ತಮ್ಮ ಬೆಂಬಲವನ್ನು ಸೂಚಿಸಿದ್ದಾರೆ. ಡೇವಿಡ್ ಧವನ್ ಮತ್ತು ಅವರ ಪುತ್ರ ವರುಣ್​ ಧವನ್​ ಸಹ ರಾಜ್​ಪಾಲ್​ಗೆ ಸಹಾಯ ಮಾಡುವುದಾಗಿ ನನಗೆ ತಿಳಿಸಿದ್ದಾರೆ ಎಂದು ಗೋಲ್ಡಿ ಹೇಳಿದ್ದಾರೆ.

ಇವರೊಟ್ಟಿಗೆ ಸಿನಿಮಾ ವಿಮರ್ಶಕ ಕಮಲ್​ ಖಾನ್ 10 ಲಕ್ಷ ನೀಡುವುದಾಗಿ ಹೇಳಿದ್ದು, ರಾಜಕಾರಣಿ ಲಾಲು ಯಾದವ್​ ಪುತ್ರ ತೇಜ್​ ಪ್ರತಾಪ್​ ಯಾದವ್​ ಕೂಡ 11 ಲಕ್ಷ ಹಣವನ್ನು ನೀಡಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.

ಗುರುವಾರ (ಫೆ.12) ದಂದು ರಾಜ್​ಪಾಲ್​ ಅವರ ಜಾಮೀನು ಅರ್ಜಿಯ ನ್ಯಾಯಾಲಯ ವಿಚಾರಣೆ ನಡೆಸಲಿದ್ದು, ರಾಜ್​ಪಾಲ್​ ಅವರಿಗೆ ಜಾಮೀನು ದೊರೆಯುವ ಸಾಧ್ಯತೆ ಹೆಚ್ಚಿದೆ ಎಂದು ಮ್ಯಾನೇಜರ್​ ಗೋಲ್ಡಿ ಹೇಳಿದ್ದಾರೆ,(ಏಜನ್ಸೀಸ್​).