'ಬದುಕಿಗೆ ಗೌರಿ ಬಂದಿದ್ದು ನನ್ನ ಪುಣ್ಯ, ಈಗ ಜೀವನ ಸಂಪೂರ್ಣ'; ಹೊಸ ಪ್ರೀತಿ ಬಗ್ಗೆ Aamir Khan​ ಮಾತು

ಬಾಲಿವುಡ್‌ನ 'ಮಿಸ್ಟರ್ ಪರ್ಫೆಕ್ಟ್​ ಎಂದೇ ಎನಿಸಿಕೊಂಡಿರುವ' ಅಮೀರ್​ ಖಾನ್, ಇತ್ತೀಚೆಗೆ ತಮ್ಮ ವೈಯಕ್ತಿಕ ಜೀವನ ಮತ್ತು ಹೊಸ ಸಂಬಂಧದ ಬಗ್ಗೆ ಮಾತನಾಡಿದ್ದಾರೆ. ತಮ್ಮ 61ನೇ ವಯಸ್ಸಿನಲ್ಲಿ ಬಾಳ ಸಂಗಾತಿಯಾಗಿ ಸಿಕ್ಕ ಗೌರಿ ಸ್ಪ್ರ್ಯಾಟ್​ ಜೊತೆಗೆ ಸಂತೋಷದ ಜೀವನ ನಡೆಸುತ್ತಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ..

ನವಭಾರತ್ ಟೈಮ್ಸ್‌ ಜೊತೆ ಮಾತನಾಡಿದ ಅವರು, ರೀನಾ ದತ್ತಾ ಮತ್ತು ಕಿರಣ್ ರಾವ್ ಅವರೊಂದಿಗಿನ ನನ್ನ ಸಂಬಂಧ ಆಳವಾಗಿತ್ತು. ಆದರೆ ಕೆಲವು ಕಾರಣಗಳಿಂದ ಹೆಚ್ಚು ದಿನ ಸಂಬಂಧ ಉಳಿಯಲಿಲ್ಲ. ಆದರೂ ನಾವೆಲ್ಲರೂ ಇಂದಿಗೂ ಒಂದು ಕುಟುಂಬದಂತೆಯೇ ಇದ್ದೇವೆ. ನನ್ನ ಈ ಪ್ರಯಾಣದಲ್ಲಿ ಅವರಿಬ್ಬರ ಪಾತ್ರವೂ ದೊಡ್ಡದಿದೆ," ಎಂದಿದ್ದಾರೆ.

ನಟನೆ, ನಿರ್ಮಾಣದ ಮಧ್ಯೆ ಕುಟುಂಬಕ್ಕೆ ಸಮಯ ನೀಡದ ಬಗ್ಗೆ ವಿಷಾದ ಅಮೀರ್​ ವಿಷಾದ ವ್ಯಕ್ತಪಡಿಸಿದ್ದಾರೆ. 30-35 ವರ್ಷಗಳ ಕಾಲ ನಾನು ಕೇವಲ ಸಿನಿಮಾ ಮತ್ತು ನಟನೆಯಲ್ಲಿ ಮುಳುಗಿದ್ದೆ. ಈ ಓಟದಲ್ಲಿ ನನ್ನ ಮಕ್ಕಳು ಹಾಗೂ ಪ್ರೀತಿಪಾತ್ರರ ಜೊತೆ ಸಮಯ ಕಳೆಯಲು ಸಾಧ್ಯವಾಗಲಿಲ್ಲ. ಇದು ನನ್ನ ಜೀವನದ ಅತಿದೊಡ್ಡ ತಪ್ಪು. ಕೋವಿಡ್​​ನಿಂದಾಗಿ ಮನೆಯಲ್ಲಿದ್ದಾಗ ಈ ವಿಚಾರ ನನಗರಿವಾಯಿತು. ಅಂದಿನಿಂದ ನನ್ನ ತಪ್ಪನ್ನು ಸರಿಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದೇನೆ ಎಂದರು.

ಗೌರಿ ಸ್ಪ್ರ್ಯಾಟ್ ಕಳೆದ ಕೆಲವು ವರ್ಷಗಳಿಂದ ಅಮೀರ್ ಖಾನ್ ಅವರೊಂದಿಗೆ ಗುರುತಿಸಿಕೊಂಡಿದ್ದಾರೆ. 2025ರಲ್ಲಿ ಆಮೀರ್ ಅವರ 60ನೇ ಜನ್ಮದಿನದಂದು ಈ ಜೋಡಿ ತಮ್ಮ ಸಂಬಂಧವನ್ನು ಅಧಿಕೃತಗೊಳಿಸಿತ್ತು. ಗೌರಿ ಅವರ ತಂದೆ ಬ್ರಿಟಿಷ್ ಮೂಲದವರಾದರೆ, ತಾಯಿ ಪಂಜಾಬಿ ಮೂಲದವರು. ಲಂಡನ್‌ನಲ್ಲಿ ಕಲೆ ಮತ್ತು ಫ್ಯಾಷನ್ ಶಿಕ್ಷಣ ಪಡೆದಿರುವ ಗೌರಿ, ಸದ್ಯ ಮುಂಬೈನಲ್ಲಿ ಆಮೀರ್ ಅವರೊಂದಿಗೆ ಹೊಸ ಜೀವನ ಆರಂಭಿಸಿದ್ದಾರೆ. ಈ ಜೋಡಿ ಶೀಘ್ರದಲ್ಲೇ ವಿವಾಹವಾಗಲಿದೆ ಎಂಬ ವದಂತಿಗಳೂ ಬಾಲಿವುಡ್ ಅಂಗಳದಲ್ಲಿ ಕೇಳಿಬರುತ್ತಿವೆ.

ಅಮೀರ್ 1986ರಲ್ಲಿ ರೀನಾ ದತ್ತಾ ಅವರನ್ನು ಮದುವೆಯಾಗಿ 2002ರಲ್ಲಿ ವಿಚ್ಛೇದನ ಪಡೆದಿದ್ದರು. ನಂತರ 2005ರಲ್ಲಿ ಕಿರಣ್ ರಾವ್ ಅವರನ್ನು ಕೈಹಿಡಿದು 2021ರಲ್ಲಿ ಬೇರೆಯಾಗಿದ್ದರು, (ಏಜೆನ್ಸೀಸ್​).