ಒಂದೇ ವರ್ಷದಲ್ಲಿ 6 ಚಿತ್ರಗಳು ಫ್ಲಾಫ್... ಆದರೂ ಪ್ರಿಯಾಂಕಾ​ ಚೋಪ್ರಾ ಜಾಗತಿಕ ತಾರೆಯಾಗಿದ್ದು ಹೇಗೆ..? Priyanka Chopra

ಮಂಗಳವಾರ (ಡಿ.09) ಅಬುಧಾಬಿಯಲ್ಲಿ ನಡೆದ ಬ್ರಿಡ್ಜ್ ಸಮಿತ್​ 2025 ರಲ್ಲಿ ಮಾತನಾಡಿದ ಪ್ರಿಯಾಂಕ, ಹಾಲಿವುಡ್‌ ರಂಗದಲ್ಲಿ ಮೊದಲು ಕೆಲವು ವರ್ಷಗಳು ಯಾವ ರೀತಿಯಾಗಿ ಕಷ್ಟ ಪಟ್ಟಿದ್ದಾರೆ ಎಂಬುದನ್ನು ವಿವರಿಸಿದ್ದಾರೆ. 

ನಾನು ಹಲವು ಬಾರಿ ವೃತ್ತಿ ಜೀವನದ ಮಾರ್ಗಗಳನ್ನು ಬದಲಾಯಿಸಬೇಕಾಯಿತು. ನನ್ನ ಜೀವನದಲ್ಲಿ, ವರ್ಷಕ್ಕೆ ಆರು ಚಲನಚಿತ್ರಗಳನ್ನು ಮಾಡುತ್ತಿದ್ದೆ. ಆದರೆ ಅವೆಲ್ಲವೂ ವಿಫಲವಾಗುತ್ತಿದ್ದವು. ಇದಾದ ನಂತರ ನಾನು ಮಾಡಬೇಕಾದ ಸಿನಿಮಾಗಳನ್ನು ಬೇರೆಯವರು ಮಾಡುತ್ತಿದ್ದರು. ಆ ಸಮಯದಲ್ಲಿ ನನ್ನ ನಿರ್ಧಾರಗಳು ಎಂದಿಗೂ ಆಯ್ಕೆಗಳಾಗಿರಲಿಲ್ಲ. ಬದಲಾಗಿ, ಮುಂದೆ ಏನು ಮಾಡಬೇಕು, ಹೇಗೆ ನಿರ್ವಹಿಸಬೇಕು ಎಂದು ನಾನು ಯೋಚಿಸುತ್ತಿದ್ದೆ ಎಂದರು.

ನನ್ನ ವೃತ್ತಿಜೀವನವನ್ನು ಪ್ರಾರಂಭಿಸಿದಾಗ, ಚಲನಚಿತ್ರ ನಿರ್ದೇಶಕರಿಗೆ ಈ ಸಿನಿಮಾವನ್ನು ಮಾಡುವುದಿಲ್ಲ ಎಂದು ಹೇಳುವಷ್ಟು ಶ್ರೀಮಂತಿಕೆ ನನಗಿರಲಿಲ್ಲ. ಆ ಸಮಯದಲ್ಲಿ ಕೆಲಸ ಹುಡುಕುವುದು ಬಹಳ ಕಷ್ಟಕರವಾಗಿತ್ತು. ನಾನು ಪ್ರತಿಯೊಂದು ಅವಕಾಶವನ್ನು ಪಡೆದುಕೊಂಡ ನಂತರ ಮತ್ತೆ ನಿರಂತರವಾಗಿ ಪ್ರಯಾಣಿಸುತ್ತಿದ್ದೆ ಎಂದರು.

ಆದಾಗ್ಯೂ, ಆ ಸಮಯದಲ್ಲಿ  ಕೆಲಸವನ್ನು ನಿರಾಕರಿಸುವ ಆಯ್ಕೆ ನನಗಿಲ್ಲದ ಕಾರಣ ನಾನು ಕುಟುಂಬದ ಕೆಲವು ಸಂತೋಷದ ಕ್ಷಣಗಳನ್ನು ಕಳೆದುಕೊಂಡೆ. ಆ ತ್ಯಾಗಗಳಿಗೆ ಇಂದು ಫಲ ಸಿಕ್ಕಿದೆ ಎಂದು ನಾನು ಭಾವಿಸುತ್ತೇನೆ. ಹಾಗಾಗಿ ಇಂದು ಆಯ್ಕೆ ಮಾಡಿಕೊಂಡ ಕೆಲಸವನ್ನು ನಾನು ಮಾಡುತ್ತೇನೆ. ಇಷ್ಟವಿಲ್ಲದಿದ್ದರೆ ನಿರಾಕರಿಸುತ್ತೇನೆ ಎಂದರು.

ಎಲ್ಲದಕ್ಕೂ ಒಂದು ಸಮಯವಿದೆ. ಆರಂಭದಲ್ಲಿ ನಾನು ಪ್ರತಿಯೊಂದು ಅವಕಾಶಗಳನ್ನು ಪಡೆದುಕೊಂಡೆ, ಆಗ ನನ್ನ ಸಾಮರ್ಥ್ಯ ಎಲ್ಲಿದೆ ಎಂದು ನನಗೆ ತಿಳಿದಿರಲಿಲ್ಲ. ಆದರಿಂದ ನಾನು ಎಲ್ಲವನ್ನೂ ಪ್ರಯತ್ನಿಸುತ್ತಿದ್ದೆ. ಆದರೆ, ಇಂದು ಸಾಧಕ-ಭಾದಕಗಳನ್ನು ಎಚ್ಚರಿಕೆಯಿಂದ ತೂಗಿದ ನಂತರ ನನ್ನ ಕುಟುಂಬ, ನನ್ನ ಮನಸ್ಥಿತಿ ಮತ್ತು ನನ್ನ ಗುರಿಗಳ ಮೇಲೆ ಬೀರುವ ಪರಿಣಾಮವನ್ನು ನಾನು ಪರಿಗಣಿಸುತ್ತೇನೆ. ಈ ರೀತಿಯಾಗಿ ನನ್ನ ನಿರ್ಧಾರಗಳನ್ನು ರಕ್ಷಿಸುತ್ತೇನೆ ಎಂದರು. 

ನಾನು ಅಮೆರಿಕಕ್ಕೆ ತೆರಳಿ ಪಾಪ್ ಸಂಗೀತ ಮತ್ತು ನಟನೆಯನ್ನು ಮಾಡಲು ಪ್ರಾರಂಭಿಸಿದಾಗ, ನನ್ನ ಪಾತ್ರಗಳು ಸಾಮಾನ್ಯವಾಗಿದ್ದವು. ಮೊದಲ ಅವಕಾಶವನ್ನು ಪಡೆಯಲು ನಾನು ಸುಮಾರು ಒಂದು ವರ್ಷಗಳ ಕಾಲ ಹೋರಾಟ ನಡೆಸಿದೆ. ಈ ಸಂದರ್ಭದಲ್ಲಿ ನನಗೆ ಅಮೇರಿಕನ್​ ಪಾತ್ರವನ್ನು ನಿರ್ವಹಿಸುವ ಪಾತ್ರ ಸಿಕ್ಕಿತು ಎಂದಿದ್ದಾರೆ (ಏಜೆನ್ಸೀಸ್​).