ಅದೊಂದು ಪಾತ್ರಕ್ಕೆ ಬರೋಬ್ಬರಿ 1300 ಮಂದಿಯ ಆಡಿಷನ್​! ಅಷ್ಟಕ್ಕೂ ನಿರ್ದೇಶಕರು​ ಆಯ್ಕೆ ಮಾಡಿದ್ದು ಮಾತ್ರ... | Dhurandhar

ಮುಂಬೈ: ಬಾಲಿವುಡ್ ಸ್ಟಾರ್ ಹೀರೋ ರಣವೀರ್ ಸಿಂಗ್ ನಟನೆಯ ಹಾಗೂ ಸೆನ್ಸೇಷನಲ್ ನಿರ್ದೇಶಕ ಆದಿತ್ಯ ಧರ್ ನಿರ್ದೇಶನದ 'ಧುರಂಧರ್' ಎರಡೂ ಭಾಗಗಳು ಇದೀಗ ಬ್ಲಾಕ್​ಬಸ್ಟರ್​ ಹಿಟ್​ ಸಾಲಿಗೆ ಸೇರ್ಪಡೆಯಾಗಿದ್ದು, ದೇಶಿಯ ಮತ್ತು ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಹೊಸ ಇತಿಹಾಸವನ್ನು ಸೃಷ್ಟಿಸಿದೆ.

ಬಿಗ್ ಬಜೆಟ್‌ನಲ್ಲಿ ನಿರ್ಮಿಸಲಾದ ಈ ಚಿತ್ರವನ್ನು, ನೈಜ ಘಟನೆಗಳ ಒಂದಷ್ಟು ತುಣುಕುಗಳು ಮತ್ತು ಕಾಲ್ಪನಿಕ ದೃಶ್ಯಗಳನ್ನು ಸೇರಿಸಿ ಹೆಣೆದ ಧುರಂಧರ್​ ಕಥೆಗೆ ಸಿನಿಪ್ರೇಮಿಗಳು ಫಿದಾ ಆಗಿದ್ದಾರೆ. ರಕ್ತಸಿಕ್ತ ದೃಶ್ಯಗಳು, ಜಬರ್ದಸ್ತ್​ ಆ್ಯಕ್ಷನ್​ ಸೀನ್​ಗಳಿಂದ ಕೂಡಿರುವ ಧುರಂಧರ್ ಚಿತ್ರವನ್ನು ನೋಡುಗರು ಮೆಚ್ಚಿಕೊಂಡಿದ್ದಾರೆ. ರಾಜಕೀಯ ನಾಯಕರನ್ನು ತೋರಿಸಿರುವ ನಿರ್ದೇಶಕರು, ಒಂದು ಪಕ್ಷಕ್ಕೆ ಮಾತ್ರ ಸೀಮಿತ ಎನ್ನುವಂತೆ ಬಿಂಬಿತವಾಗಿದ್ದು ಭಾರೀ ಟೀಕೆಗೂ ಗುರಿಯಾಯಿತು.

ಮೊದಲ ಭಾಗ ಒಟ್ಟಾರೆ 1400 ಕೋಟಿ ರೂ.ಗಳನ್ನು ಸಂಗ್ರಹಿಸಿದರೆ, ಎರಡನೇ ಭಾಗವು ಇಲ್ಲಿಯವರೆಗೆ 1500 ಕೋಟಿ ರೂ.ಗಳನ್ನು ದಾಟಿ ಇನ್ನೂ ಚಿತ್ರಮಂದಿರ ಮತ್ತು ಮಲ್ಟಿಪ್ಲೆಕ್ಸ್​ಗಳಲ್ಲಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಇದು ಕಲೆಕ್ಷನ್‌ಗಳ ಸುನಾಮಿ ಸೃಷ್ಟಿಸಿದ್ದು, ಈ ಭರ್ಜರಿ ಯಶಸ್ಸಿನೊಂದಿಗೆ, ನಿರ್ದೇಶಕ ಆದಿತ್ಯ ಧರ್ ಮತ್ತು ರಣವೀರ್ ಸಿಂಗ್ ಅವರ ಕ್ರೇಜ್ ವಿಶ್ವಾದ್ಯಂತ ದುಪ್ಪಟ್ಟಾಗಿದೆ.

ಈ ಮಧ್ಯೆ ರಣವೀರ್​ ಸಿಂಗ್​ಗೆ ನಾಯಕಿಯಾಗಿ ಯಾರನ್ನು ಕರೆತರಬೇಕು ಎಂಬುದು ನಿರ್ದೇಶಕರಿಗೆ ದೊಡ್ಡ ತಲೆಬಿಸಿ ಆಗಿತ್ತಂತೆ. ಕಾರಣ, ಸ್ಟಾರ್​ ನಟಿಯರನ್ನು ಕರೆತರುವ ಪ್ಲ್ಯಾನ್​ ಧರ್​ಗೆ ಇರಲಿಲ್ಲವಂತೆ. ಹೀಗಾಗಿ, ರಣವೀರ್​ಗೆ ಸೂಕ್ತ ಜೋಡಿಯಾಗಿ ಹಾಗೂ ಪಾತ್ರಕ್ಕೆ ತಕ್ಕಂತೆ ಹೋಲುವ ನಾಯಕಿಯನ್ನು ಆಯ್ಕೆ ಮಾಡಲು ಚಿತ್ರತಂಡ ಬರೋಬ್ಬರಿ 1300ಕ್ಕೂ ಅಧಿಕ ಯುವತಿಯರನ್ನು ಆಡಿಷನ್​ ಮಾಡಿತ್ತು ಎಂದು ಸಿನಿ ವರದಿ ತಿಳಿಸಿದೆ.

1300 ಮಂದಿಯ ಆಡಿಷನ್​ ಬಳಿಕ, ಬಾಲನಟಿಯಾಗಿ ಜನಪ್ರಿಯತೆ ಗಿಟ್ಟಿಸಿಕೊಂಡಿದ್ದ ಸಾರಾ ಅರ್ಜುನ್ ನಮ್ಮ ಗಮನಕ್ಕೆ ಬಂದರು ಎಂದು ಕಾಸ್ಟಿಂಗ್ ತಂಡದ ನಿರ್ದೇಶಕರು ತಿಳಿಸಿದ್ದಾರೆ. ಈ ಮೆಗಾ ಪ್ರಾಜೆಕ್ಟ್‌ಗೆ ಕೊನೆಗೆ ಅವರನ್ನೇ ನಾವು ಫೈನಲ್ ಮಾಡಿದೆವು. ಆಡಿಷನ್ ಸಮಯದಲ್ಲಿ ಅವರ ಪ್ರತಿಭೆ ಮತ್ತು ಸ್ಕ್ರೀನ್​ನಲ್ಲಿ ನಟಿಸಿದ ರೀತಿ, ತಯಾರಕರನ್ನು ಮೆಚ್ಚಿಸಿತು. ಹೀಗಾಗಿ, ರಣವೀರ್ ಸಿಂಗ್ ಅವರಿಗೆ ನಾಯಕಿಯಾಗುವ ಅವಕಾಶ ಅವರ ಪಾಲಾಯಿತು ಎಂದಿದ್ದಾರೆ,(ಏಜೆನ್ಸೀಸ್).