ಕೋಲಾರ: ನಿಮ್ಮ ಮನೆಯಲ್ಲಿ 70 ದಶಕದ ಕಪ್ಪು-ಬಿಳುಪು ಟಿವಿ, ರೇಡಿಯೊ, ಟೇಪ್ ರೆಕಾರ್ಡರ್ ಇದ್ಯಾ? ಹಾಗಿದ್ದಲ್ಲಿ ನೀವು ಕುಬೇರ ಆಗ್ತೀರಿ!
ಹೌದು, ಹಳೇ ಟಿವಿ, ರೇಡಿಯೋ, ಟೇಪ್ ರೆಕಾರ್ಡರ್ಗೆ ಭಾರೀ ಡಿಮಾಂಡ್ ಇದೆ. ಅವುಗಳನ್ನು ನೀವು ಮಾರಾಟ ಮಾಡಿದರೆ ಲಕ್ಷ ಲಕ್ಷ ಹಣ ಸಿಗುತ್ತದೆ. ಇವುಗಳಲ್ಲಿ ಅಳವಡಿಸಿರುವ ಕೆಂಪು ಬಣ್ಣದ ಮಕ್ಯುರ್ರಿ (ಪಾದರಸ) ಬಲ್ಬ್ ಕೋಟಿ ರೂ. ಬೆಲೆ ಬಾಳುತ್ತದೆ. ಹೈದರಾಬಾದ್ ಇನ್ನಿತರ ಕಡೆಗಳಿಂದ ವ್ಯಾಪಾರಿಗಳು ಬಂದು ಲಕ್ಷಾಂತರ ಹಣ ನೀಡಿ ಇಂತಹ ವಸ್ತು ಖರೀದಿಸುತ್ತಾರೆ… ಎಂಬ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಅಂದಹಾಗೆ ಇದರ ಅಸಲಿಯತ್ತು ಏನು ಗೊತ್ತಾ? ಇದನ್ನೂ ಓದಿರಿ ಜನರ ಕೈಗೆ ಹಣ ಕೊಟ್ಟು ಮತ್ತೊಮ್ಮೆ ಲಾಕ್ಡೌನ್?
ಹಳೇ ಟಿವಿಗಳನ್ನು ಲಕ್ಷಾಂತರ ರೂ.ಗೆ ಖರೀದಿಸಲಾಗುತ್ತಿದೆ ಎಂಬುದು ಸುಳ್ಳು. ಅನಾಮಿಕನೊಬ್ಬ ವದಂತಿ ಹರಿಯಬಿಟ್ಟಿದ್ದು, ಹಲವರು ಇದನ್ನು ನಿಜವೆಂದೇ ಭಾವಿಸಿದ್ದಾರೆ. ಈ ಬಗ್ಗೆ ಜನತೆ ಎಚ್ಚೆತ್ತುಕೊಳ್ಳಬೇಕಿದೆ.
ಹಳೇ ಟಿವಿ, ರೇಡಿಯೋ, ಟೇಪ್ ರೆಕಾರ್ಡರ್ನಲ್ಲಿ ಅಳವಡಿಸಿರುವ ಕೆಂಪು ಬಣ್ಣದ ಮಕ್ಯುರ್ರಿ ಬಲ್ಬ್ ಕೋಟಿ ರೂ. ಬೆಲೆ ಬಾಳುತ್ತದೆ, ಒಂದು ವೇಳೆ ಯಾರ ಬಳಿಯಾದರೂ ಇದ್ದಲ್ಲಿ ಅದೃಷ್ಟ ಲಕ್ಷ್ಮೀ ನಿಮ್ಮ ಮನೆಗೆ ಒಲಿದು ಬರುತ್ತಾಳೆ. ಒಂದು ವೇಳೆ ಡೋರ್ ಇರುವ ಹಳೇ ಟಿವಿ ಚೆನ್ನಾಗಿದ್ದಲ್ಲಿ ಹೆಚ್ಚು ಹಣ ನೀಡಿ ಕೊಳ್ಳಲಿದ್ದಾರೆ. ಮಕ್ಯುರ್ರಿ ಬಲ್ಬ್ ಸಂಗ್ರಹಿಸಿ ಅಣು ವಸ್ತು ತಯಾರಿಸುವ ವ್ಯಾಪಾರಿಗಳಿಗೆ ಮಾರಾಟ ಮಾಡಿದಲ್ಲಿ ಕಣ್ಣು ಮುಚ್ಚಿ ಕಣ್ಣು ತೆರೆಯುವುದಲ್ಲಿ ಕುಬೇರ ಆಗಬಹುದು ಎಂದು ಮಾಹಿತಿ ಹಬ್ಬಿಸಲಾಗಿದೆ.
ಈ ವಿಷಯ ತಿಳಿದ ಕೆಲವರು ಕಪ್ಪು-ಬಿಳುಪು ಟಿವಿ, ಟೇಪ್ ರೆಕಾರ್ಡರ್ ಹಿಂದೆ ಬಿದ್ದಿದ್ದಾರೆ. ಅನೇಕರು ಹಳ್ಳಿಗಳಿಗೆ ತೆರಳಿ ಹಳೇ ಟಿವಿ ರಿಪೇರಿ ಮಾಡುವವರಿಗಾಗಿ ಶೋಧ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ. ಜನರನ್ನು ವಂಚಿಸಲು ಯತ್ನಿಸುತ್ತಿರುವ ದುಷ್ಕರ್ಮಿಗಳನ್ನು ಪೊಲೀಸರು ಪತ್ತೆ ಮಾಡಬೇಕು. ಇದೊಂದು ವದಂತಿ- ವಂಚನೆಯ ಜಾಲ, ಜಾಗೃತರಾಗಿರಿ ಎಂದು ಜನರಲ್ಲಿ ಅರಿವು ಮೂಡಿಸಬೇಕು ಎಂದು ಪ್ರಜ್ಞಾವಂತರು ಒತ್ತಾಯಿಸಿದ್ದಾರೆ.