ಬೆಂಗಳೂರು: ಅಕ್ರಮ, ದಬ್ಬಾಳಿಕೆ, ಗೂಂಡಾಗಿರಿ ರಾಜಕಾರಣ ತಡೆಯುವುದಕ್ಕಾಗಿ ಕಾಂಗ್ರೆಸ್ ನ ಡಿ.ಕೆ.ಸೋದರರಿಗೆ ರಾಜರಾಜೇಶ್ವರಿ ನಗರ ವಿಧಾನಸಭೆ ಕ್ಷೇತ್ರ ಪ್ರವೇಶ, ಪ್ರಚಾರಕ್ಕೆ ನಿರ್ಬಂಧ ವಿಧಿಸಬೇಕು ಎಂದು ಬಿಜೆಪಿ ಸಂಸದೆ ಶೋಭಾ ಕರಂದ್ಲಾಜೆ ಆಗ್ರಹಿಸಿದ್ದಾರೆ.
ಬಿಜೆಪಿ ನಗರ ಕಚೇರಿಯಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಡಿ.ಕೆ. ಸೋದರರ ಅಕ್ರಮಗಳ ಕುರಿತು ವಿಡಿಯೋ, ಪುರಾವೆ ಸಹಿತ ಚುನಾವಣೆ ಆಯೋಗಕ್ಕೆ ದೂರು ಸಲ್ಲಿಸಲಿದ್ದೇವೆ. ಡಿ.ಕೆ.ಸುರೇಶ್ ಪ್ರತಿನಿಧಿಸುತ್ತಿರುವ ಬೆಂಗಳೂರು ಗ್ರಾಮಾಂತರ ಲೋಕಸಭಾ ಕ್ಷೇತ್ರದ ವ್ಯಾಪ್ತಿಗೆ ಬರುತ್ತಿದ್ದರೂ ಗೂಂಡಾಗಿರಿ, ಅಧಿಕಾರಿಗಳ ಮೇಲೆ ದಬ್ಬಾಳಿಕೆ ಕುರಿತು ದಾಖಲೆ ಸಹಿತ ದೂರುಗಳ ಆಧಾರದಲ್ಲಿ ನಿರ್ಬಂಧ ವಿಧಿಸಲು ಆಯೋಗಕ್ಕೆ ಹಕ್ಕಿದೆ ಎಂದು ಶೋಭಾ ಕರಂದ್ಲಾಜೆ ಸಮರ್ಥಿಸಿಕೊಂಡರು.
ಡಿ.ಕೆ.ಸೋದರರಿಗೆ ಅಸ್ತಿತ್ವದ ಪ್ರಶ್ನೆ ಎದುರಾಗಿರುವ ಕಾರಣ ಅಕ್ರಮದ ಷಡ್ಯಂತ್ರ ಹೂಡಿದ್ದು, ಕ್ರಮಕ್ಕೆ ಮುಂದಾಗುವ ಅಧಿಕಾರಿಗಳ ಮೇಲೆ ಮಾನಸಿಕ ಒತ್ತಡ, ಬೆದರಿಕೆ ಹಾಕುತ್ತಿದ್ದಾರೆ. ಮುಂದಿನ 2-3 ದಿನಗಳು ಅತ್ಯಂತ ಸೂಕ್ಷ್ಮ , ನಿರ್ಣಾಯಕವಾದ್ದರಿಂದ ಕಾನೂನು ರೀತ್ಯಾ ಕ್ರಮಕ್ಕಾಗಿ ಆಯೋಗದ ಮೊರೆ ಹೋಗುತ್ತಿದ್ದೇವೆ ಎಂದರು.
