VIDEO: ಹೆದ್ದಾರೀಲಿ ಕುದುರೆ ಸವಾರಿ ಮಾಡಿ ಜನಸಾಮಾನ್ಯರ ಕೆಂಗಣ್ಣಿಗೆ ಗುರಿಯಾದ ಬಿಜೆಪಿ ಎಂಎಲ್​ಎ ಪುತ್ರ...!

ಮೈಸೂರು: ಎಲ್ಲೆಲ್ಲೂ ಕರನಾ ವೈರಸ್​ ಆತಂಕವಿದೆ. ಮೂರನೇ ಹಂತದ ಲಾಕ್​ಡೌನ್​ ನಡೆಯುತ್ತಿದೆ. ಮನೆಯಿಂದ ಹೊರಬರುವುದನ್ನು ಆದಷ್ಟು ಕಡಿಮೆ ಮಾಡಿ ಎಂದು ಸರ್ಕಾರಗಳು ಹೇಳುತ್ತಲೇ ಇವೆ. ವಾಹನಗಳ ಸಂಚಾರಕ್ಕೂ ನಿರ್ಬಂಧ ಹೇರಲಾಗಿದೆ.

ಹಾಗೊಮ್ಮೆ ಹೊರಬರುವುದೇ ಆದರೆ ಕಡ್ಡಾಯವಾಗಿ ಮಾಸ್ಕ್​ ಧರಿಸಬೇಕು. ಸಾಮಾಜಿಕ ಅಂತರ ಪಾಲನೆ ಮಾಡಬೇಕು ಎಂಬಿತ್ಯಾದಿ ನಿಯಮಗಳನ್ನೂ ಹೇರಲಾಗಿದೆ. ಇದನ್ನೂ ಓದಿ: 24 ಗಂಟೆಯಲ್ಲಿ 63 ಕೊವಿಡ್​-19 ಪ್ರಕರಣಗಳು ಪತ್ತೆ; 1000ದತ್ತ ದಾಪುಗಾಲು ಹಾಕುತ್ತಿದೆ ಸೋಂಕಿತರ ಸಂಖ್ಯೆ

ಆದರೆ ಇಲ್ಲೋರ್ವ ಶಾಸಕನ ಪುತ್ರ ಇಂಥ ಸಮಯದಲ್ಲೂ ಕುದುರೆ ಸವಾರಿ ಮಾಡಿ ಮೋಜು ಮಾಡಿದ್ದಾರೆ. ವೈರಲ್​ ಆದ ವಿಡಿಯೋ ನೋಡಿ ಜನಸಾಮಾನ್ಯರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಚಾಮರಾಜನಗರದ ಗುಂಡ್ಲುಪೇಟೆಯ ಬಿಜೆಪಿ ಶಾಸಕ ನಿರಂಜನ್​ ಕುಮಾರ್​ ಅವರ ಪುತ್ರ ಪಟ್ಟಣದ ಐಟಿಐ ಕಾಲೇಜಿನ​ ಮೈಸೂರು-ಊಟಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕುದುರೆ ಸವಾರಿ ಮಾಡಿದ್ದಾರೆ.ಅದೂ ಮಾಸ್ಕ್​ ಕೂಡ ಧರಿಸಿದೆ ಸವಾರಿ ಮಾಡಿದ ಫೋಟೋ, ವಿಡಿಯೋಗಳು ವೈರಲ್​ ಆಗಿವೆ.

ಸೋಮವಾರ ವೈರಲ್​ ಆದ ಕುದುರೆ ಸವಾರಿಯ ವಿಡಿಯೋ ನೋಡಿದ ಜನರು, ಲಾಕ್ ಡೌನ್​ ನಿಯಮವನ್ನು ಮೀರಿದ ಶಾಸಕನ ಪುತ್ರನ ವಿರುದ್ಧ ಸರ್ಕಾರ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸುತ್ತಿದ್ದಾರೆ.

ಈ ಬಗ್ಗೆ ಶಾಸಕರು, ನಾನು ನಿನ್ನೆ ಬೆಂಗಳೂರಿನಲ್ಲಿ ಇರಲಿಲ್ಲ. ವಿಡಿಯೋದಲ್ಲಿ ಇರುವುದು ನನ್ನ ಮಗನೇ ಹೌದು. ಸರಿಯಾಗಿ ವಿಚಾರಿಸಿ ನಂತರ ಪ್ರತಿಕ್ರಿಯೆ ನೀಡುತ್ತೇನೆ. ಮಗನ ಬಳಿ ಕೇಳುತ್ತೇನೆ. ತಪ್ಪಿದ್ದರೆ ಖಂಡಿತ ಅವನಿಗೆ ಬುದ್ಧಿ ಹೇಳುತ್ತೇನೆ ಎಂದಿದ್ದಾರೆ. ಹಾಗೇ, ಲಾಕ್​ಡೌನ್​ ಸಮಯದಲ್ಲಿ ಕುದುರೆ ಸವಾರಿ ಮಾಡಬಾರದು ಎಂದು ಎಲ್ಲಿಯೂ ಹೇಳಿಲ್ಲ. ನಾನಿದನ್ನು ಸಮರ್ಥನೆ ಮಾಡಿಕೊಳ್ಳಲು ಹೇಳುತ್ತಿಲ್ಲ ಎಂದು ಶಾಸಕರು ಹೇಳಿದ್ದಾರೆ. ಇದನ್ನೂ ಓದಿ: ಪಾಸ್ ಸಿಕ್ಕಿದೆ.. ಮಾತನಾಡಲು ಮಗನೇ ಇಲ್ಲ

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಚಾಮರಾಜನಗರ ಎಸ್​ಪಿ, ಲಾಕ್​ಡೌನ್​ ಸಮಯದಲ್ಲಿ ಕುದುರೆ ಸವಾರಿ ಮಾಡುವುದರಿಂದ ನಿಯಮ ಉಲ್ಲಂಘನೆಯಾದಂತೆ ಆಗುತ್ತದೆಯೋ ಇಲ್ಲವೋ ಎಂಬುದನ್ನು ಪರಿಶೀಲನೆ ಮಾಡಲಾಗುವುದು. ಶಾಸಕರ ಪುತ್ರನ ಕುದುರೆ ಸವಾರಿ ಬಗ್ಗೆ ಇನ್ನೊಮ್ಮೆ ಪರಿಶೀಲಿಸಿ ಬಳಿಕ ಕ್ರಮ ಕೈಗೊಳ್ಳುತ್ತೇವೆ ಎಂದಿದ್ದಾರೆ.