ಅನೂಪ್ ಸ್ಮಾರಕ ನಿರ್ಮಾಣಕ್ಕೆ ಬೀಜಾಡಿ ಗ್ರಾಪಂ ನಿರ್ಣಯ

ವಿಜಯವಾಣಿ ಸುದ್ದಿಜಾಲ ಗಂಗೊಳ್ಳಿ

ಬೀಜಾಡಿ ಗ್ರಾಮ ಪಂಚಾಯಿತಿ ವತಿಯಿಂದ ಅಧ್ಯಕ್ಷ ಪ್ರಕಾಶ್ ಪೂಜಾರಿ ಬೀಜಾಡಿ ಅಧ್ಯಕ್ಷತೆಯಲ್ಲಿ ಸೋಮವಾರ ಮಿತ್ರಸೌಧದಲ್ಲಿ ಜರುಗಿದ ಗ್ರಾಮ ಪಂಚಾಯಿತಿ ಸಾಮಾನ್ಯ ಸಭೆಯಲ್ಲಿ ಹುತಾತ್ಮರಾದ ಗ್ರಾಮದ ವೀರಯೋಧ ಅನೂಪ್ ಪೂಜಾರಿ ಅವರ ಸ್ಮಾರಕವನ್ನು ಸರ್ಕಾರಿ ಸ್ಥಳದಲ್ಲಿಯೇ ನಿರ್ಮಾಣ ಮಾಡುವುದೆಂದು ಸದ್ಯಸರು ತೀರ್ಮಾನಿಸಿ ನಿರ್ಣಯಿಸಿದರು. ಈ ಸಂದರ್ಭ ಆಗಲಿದ ವೀರ ಯೋಧನಿಗೆ ಸ್ಥಳೀಯಾಡಳಿತದಿಂದ ನುಡಿನಮನ ಸಲ್ಲಿಸಲಾಯಿತು.

ಜಮ್ಮು ಕಾಶ್ಮೀರದ ಪೂಂಚ್ ಜಿಲ್ಲೆಯ ಮೆಂಧರ್ ಪ್ರದೇಶದ ಬಲ್ನೋಯಿನಲ್ಲಿ ಸೇನಾ ವಾಹನ ಉರುಳಿ ಬಿದ್ದ ಅಪಘಾತದಲ್ಲಿ ಹುತಾತ್ಮರಾದ ಕುಂದಾಪುರ ತಾಲೂಕಿನ ಬೀಜಾಡಿ ಗ್ರಾಮದ ಕೆರೆಮನೆ ನಿವಾಸಿ ಲ್ಯಾನ್ಸ್ ಹವಾಲ್ದಾರ್ ಅನೂಪ್ ಪೂಜಾರಿ ಅವರ ಉತ್ತರ ಕ್ರಿಯೆ 5ನೇ ದಿನವಾದ ಸೋಮವಾರ ಬೀಜಾಡಿ ಕಡಲ ತೀರದ ಅನೂಪ್ ಅವರ ಅಂತ್ಯಸಂಸ್ಕಾರ ನಡೆಸಿದ ಸ್ಥಳದಲ್ಲಿ ಕುಟುಂಬಿಕರು ಆರಂಭಿಸಿದ್ದಾರೆ.

ಬಿಲ್ಲವ ಸಾಮುದಾಯದ ಪದ್ಧತಿಯಂತೆ ಗುರಿಕಾರ ರಾಮ ಪೂಜಾರಿ ನೇತೃತ್ವದಲ್ಲಿ ಅನೂಪ್ ಸಹೋದರ ಸಂಬಂಧಿ ತಿಲಕ್ ಮತ್ತು ಶಿವರಾಮ್ ನೇತೃತ್ವದಲ್ಲಿ ಉತ್ತರ ಕ್ರಿಯೆ ಪದ್ಧತಿಗಳನ್ನು ಆರಂಭಿಸಲಾಗಿದೆ.

ಸೇನಾ ಮೇಜರ್ ಭೇಟಿ

11-ಮರಾಠ ಲೈಟ್ ಇನ್ಫೆಂಟ್ರಿ ರೆಜೆಮೆಂಟ್ ಯೂನಿಟ್ ಮೇಜರ್ ನಿಖಿಲ್ ಹಾಗೂ ನಾಯಬ್ ಸುಬೇದರ್ ಶಂಕರ ಗೌಡ ಪಾಟೀಲ್ ಅನೂಪ್ ಮನೆಗೆ ಭೇಟಿ ನೀಡಿ ಕುಟುಂಬಿಕರಿಗೆ ಸಾಂತ್ವನ ಹೇಳಿದರು. ನಿವೃತ್ತ ಸೈನಿಕ ರವಿ ಶೆಟ್ಟಿ ತೆಕ್ಕಟ್ಟೆ ಮೊದಲಾದವರಿದ್ದರು.