ಮಹಿಳೆಯರ ಟಿ20 ವಿಶ್ವಕಪ್​: ಮೊದಲ ಪಂದ್ಯದಲ್ಲೇ ಭಾರತಕ್ಕೆ ಬಿಗ್​ ಶಾಕ್​! ಸೆಮೀಸ್​ ಹಾದಿ ಜಟಿಲ...

ದುಬೈ: ಬ್ಯಾಟಿಂಗ್​ ಮತ್ತು ಬೌಲಿಂಗ್​ ವಿಭಾಗಗಳಲ್ಲಿ ನಿರೀಕ್ಷೆಗೆ ತಕ್ಕ ನಿರ್ವಹಣೆ ತೋರಲು ವಿಲವಾದ ಭಾರತ ತಂಡ 9ನೇ ಆವೃತ್ತಿಯ ಮಹಿಳೆಯರ ಟಿ20 ವಿಶ್ವಕಪ್​ ಟೂರ್ನಿಯ ತನ್ನ ಮೊದಲ ಪಂದ್ಯದಲ್ಲೇ ಮುಗ್ಗರಿಸಿದೆ. ನಾಯಕಿ ಸೋಫಿ ಡಿವೈನ್​ (57*ರನ್​, 36 ಎಸೆತ, 7 ಬೌಂಡರಿ) ದಿಟ್ಟ ಬ್ಯಾಟಿಂಗ್​ ಹಾಗೂ ಸಂಟಿತ ಬೌಲಿಂಗ್​ ದಾಳಿ ಎದುರು ಮಂಕಾದ ಹರ್ಮಾನ್​ಪ್ರೀತ್​ ಕೌರ್​ ಸಾರಥ್ಯದ ಭಾರತ ತಂಡ ನ್ಯೂಜಿಲೆಂಡ್​ ಎದುರು 58 ರನ್​ಗಳಿಂದ ಆಘಾತಕಾರಿ ಸೋಲು ಅನುಭವಿಸಿತು. ಇದರಿಂದ ಭಾರತದ ಸೆಮೀಸ್​ ಹಾದಿ ಜಟಿಲಗೊಂಡಿದೆ.

ದುಬೈ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಕಾದಾಟದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದುಕೊಂಡ ನ್ಯೂಜಿಲೆಂಡ್​, 4 ವಿಕೆಟ್​ಗೆ 160 ರನ್​ ಕಲೆಹಾಕಿತು. ಕಿವೀಸ್​ ಕೊನೇ 5 ಓವರ್​ಗಳಲ್ಲಿ 51 ರನ್​ ಕಸಿಯಿತು. ಪ್ರತಿಯಾಗಿ ಪವರ್​ಪ್ಲೇನಲ್ಲೇ ಪ್ರಮುಖ 3 ವಿಕೆಟ್​ ಕಳೆದುಕೊಂಡು ಪರದಾಡಿದ ಭಾರತ ನಂತರ ಗೆಲುವಿನ ಹಾದಿಗೆ ಮರಳಲೇ ಇಲ್ಲ. ಅಂತಿಮವಾಗಿ 19 ಓವರ್​ಗಳಲ್ಲಿ 102 ರನ್​ ಗಳಿಸಲಷ್ಟೇ ಶಕ್ತವಾಯಿತು.

ಭಾರತಕ್ಕೆ ಕೈಕೊಟ್ಟ ಬ್ಯಾಟಿಂಗ್​

ಪ್ರತಿ ಓವರ್​ಗೆ 8ಕ್ಕಿಂತ ಹೆಚ್ಚಿನ ರನ್​ ಪೇರಿಸಬೇಕಾದ ಸವಾಲಿಗೆ ಪ್ರತಿಯಾಗಿ ಭಾರತೀಯ ಬ್ಯಾಟಿಂಗ್​ ದಯನೀಯ ವೈಲ್ಯ ಕಂಡಿತು. ಸ್ಮೃತಿ ಮಂದನಾ (12), ಶೆಫಾಲಿ ವರ್ಮ (2) ಮತ್ತು ನಾಯಕಿ ಹರ್ಮಾನ್​ಪ್ರೀತ್​ ಕೌರ್​ (15) ಪವರ್​ಪ್ಲೇನಲ್ಲೇ ಡಗೌಟ್​ಗೆ ಮರಳಿದರೆ, ನಂತರದಲ್ಲಿ ಜೆಮೀಮಾ ರೋಡ್ರಿಗಸ್​ (13), ರಿಚಾ ಘೋಷ್​ (12), ದೀಪ್ತಿ ಶರ್ಮ (13) ತಂಡವನ್ನು ಗೆಲುವಿನ ಹಾದಿಗೆ ತರಲು ವಿಫಲರಾದರು. 11 ಓವರ್​ಗಳಲ್ಲಿ 70 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡಾಗಲೇ ಭಾರತದ ಸೋಲು ಬಹುತೇಕ ಖಚಿತವೆನಿಸಿತು.

ಕಿವೀಸ್​ ದಿಟ್ಟ ಆರಂಭ

ಸುಜಿ ಬೇಟ್ಸ್​ (27) ಮತ್ತು ಜಾರ್ಜಿಯಾ ಪ್ಲಿಮ್ಮರ್​ (34) ಮೊದಲ ವಿಕೆಟ್​ಗೆ 46 ಎಸೆತಗಳಲ್ಲಿ 67 ರನ್​ ಕಸಿದು ಭಾರತಕ್ಕೆ ತಲೆನೋವಾದರು. ಬೇಟ್ಸ್​ 18 ರನ್​ ಗಳಿಸಿದ್ದಾಗ ವಿಕೆಟ್​ ಕೀಪರ್​ ರಿಚಾ ಘೋಷ್​ ಕ್ಯಾಚ್​ ಕೈಚೆಲ್ಲಿ ಜೀವದಾನ ನೀಡಿದರು. ಪವರ್​ಪ್ಲೇನಲ್ಲಿ ಈ ಜೋಡಿ 55 ರನ್​ ಕಸಿಯಿತು. ನಂತರ ಪಂದ್ಯದ 8ನೇ ಓವರ್​ನಲ್ಲಿ ಬೇಟ್ಸ್​ರನ್ನು ಔಟ್​ ಮಾಡಿದ ಅರುಂಧತಿ ರೆಡ್ಡಿ ಈ ಜೋಡಿಯನ್ನು ಬೇರ್ಪಡಿಸಿದರು. ಮರುಓವರ್​ನಲ್ಲೇ ಆಶಾ ಶೋಭನಾ ಮತ್ತೋರ್ವ ಆರಂಭಿಕ ಆಟಗಾರ್ತಿ ಪ್ಲಿಮ್ಮರ್​ ವಿಕೆಟ್​ ಕಬಳಿಸಿದರು. ಆಗ ಕಣಕ್ಕಿಳಿದ ಸೋಫಿ ಡಿವೈನ್​ ನಂತರ ಕಿವೀಸ್​ಗೆ ಆಸರೆಯಾಗಿ ನಿಂತರು.

ಡಿವೈನ್​ ಬಿರುಸಿನಾಟ

ಸೋಫಿ ಡಿವೈನ್​ 9ನೇ ಓವರ್​ನಲ್ಲಿ ಕ್ರೀಸ್​ಗೆ ಇಳಿದು ಇನಿಂಗ್ಸ್​ನ ಕೊನೆಯವರೆಗೂ ಕಿವೀಸ್​ಗೆ ಆಧಾರವಾದರು. ಅವರಿಗೆ ಅಮೆಲಿಯಾ ಕೆರ್​ (13) ಮತ್ತು ಬ್ರೂಕ್​ ಹಾಲಿಡೇ (16) ಉತ್ತಮ ಬೆಂಬಲ ಒದಗಿಸಿದರು. 3ನೇ ವಿಕೆಟ್​ಗೆ ಕೆರ್​ ಜತೆ 32 ಮತ್ತು 4ನೇ ವಿಕೆಟ್​ಗೆ ಹಾಲಿಡೇ ಜತೆ 46 ರನ್​ ಪೇರಿಸಿದರು. ಭಾರತೀಯ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ಸವಾಲಾದ ಡಿವೈನ್​ 32 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. 35 ವರ್ಷದ ಡಿವೈನ್​ ಟಿ20 ಕ್ರಿಕೆಟ್​ನಲ್ಲಿ ಸಿಡಿಸಿದ 21ನೇ ಅರ್ಧಶತಕ ಇದಾಗಿದೆ. ದೀಪ್ತಿ ಶರ್ಮ ಎಸೆದ ಪಂದ್ಯದ 18ನೇ ಓವರ್​ನಲ್ಲಿ ಡಿವೈನ್​-ಹಾಲಿಡೇ ಜೋಡಿ 3 ಬೌಂಡರಿ ಸಹಿತ 16 ರನ್​ ಕಸಿಯುವ ಮೂಲಕ ಕಿವೀಸ್​ ತಂಡವನ್ನು 150ರ ಗಡಿ ದಾಟಿಸುವಲ್ಲಿ ಯಶಸ್ವಿಯಾಯಿತು.

ನ್ಯೂಜಿಲೆಂಡ್​: 4 ವಿಕೆಟ್​ಗೆ 160 (ಬೇಟ್ಸ್​ 27, ಪ್ಲಿಮ್ಮರ್​ 34, ಕೆರ್​ 13, ಡಿವೈನ್​ 57*, ಹಾಲಿಡೇ 16, ರೇಣುಕಾ ಸಿಂಗ್​ 27ಕ್ಕೆ 2, ಅರುಂಧತಿ 28ಕ್ಕೆ 1, ಆಶಾ ಶೋಭನಾ 22ಕ್ಕೆ 1). ಭಾರತ: 19 ಓವರ್​ಗಳಲ್ಲಿ 102 (ಸ್ಮೃತಿ 12, ಶೆಫಾಲಿ 2, ಹರ್ಮಾನ್​ಪ್ರೀತ್​ 15, ಜೆಮೀಮಾ 13, ರಿಚಾ 12, ದೀಪ್ತಿ 13, ಕರ್ಸನ್​ 34ಕ್ಕೆ 2, ರೋಸ್​ಮೇರಿ ಮೈರ್​ 19ಕ್ಕೆ 4, ತಹುಹು 15ಕ್ಕೆ 3).

ಇನ್ನು ಮಾಡು ಇಲ್ಲವೆ ಮಡಿ ಸವಾಲು

ಭಾರತದ ಮಹಿಳೆಯರು ಮೊದಲ ಪಂದ್ಯದಲ್ಲೇ ಸೋತಿರುವುದರಿಂದ, ಸೆಮಿಫೈನಲ್​ಗೇರಲು ಇನ್ನು ಉಳಿದ 3 ಲೀಗ್​ ಪಂದ್ಯಗಳಲ್ಲಿ ಮಾಡು ಇಲ್ಲವೆ ಮಡಿ ಹೋರಾಟ ನಡೆಸಬೇಕಾಗಿದೆ. ಪಾಕಿಸ್ತಾನ (ಅ.6), ಶ್ರೀಲಂಕಾ (ಅ.9) ಜತೆಗೆ ಭಾರತ ಇನ್ನು ಹಾಲಿ ಚಾಂಪಿಯನ್​ ಆಸ್ಟ್ರೆಲಿಯಾ (ಅ.13) ವಿರುದ್ಧದ ಕೊನೇ ಪಂದ್ಯದಲ್ಲೂ ಗೆಲ್ಲಬೇಕಾಗಿದೆ. ಕಿವೀಸ್​ ವಿರುದ್ಧದ ಬೃಹತ್​ ಸೋಲಿನಿಂದ ಭಾರತದ ರನ್​ರೇಟ್​ಗೂ (-1.550) ಭಾರಿ ಹೊಡೆತ ಬಿದ್ದಿದೆ.

https://www.vijayavani.net/wipro-bangalore-marathon-on-october-6-30-thousand-runners-are-expected-to-participate