ಹರೆಯದಲ್ಲೇ ಹೇರ್ ಫಾಲ್ ಶಾಕ್ : Gen Z ಯುವಕರಲ್ಲಿ ಕೂದಲು ಉದುರಲು ಅಸಲಿ ಕಾರಣಗಳಿವು!

'ಟ್ರೆ ಯಾ ಹೆಲ್ತ್' (Traya Health) ನಡೆಸಿದ ಸುಮಾರು 5 ಲಕ್ಷ ಪುರುಷರ ಬೃಹತ್ ಸಮೀಕ್ಷೆಯಲ್ಲಿ ಒಂದು ಆಘಾತಕಾರಿ ಸತ್ಯ ಹೊರಬಂದಿದೆ. ಕೂದಲು ಉದುರುವಿಕೆ ಸಮಸ್ಯೆಯನ್ನು ಎದುರಿಸುತ್ತಿರುವ ಪುರುಷರಲ್ಲಿ ಅರ್ಧದಷ್ಟು ಅಂದರೆ ಶೇ. 50ರಷ್ಟು ಮಂದಿ 25 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು. "ಇದು ಕೇವಲ ಸೌಂದರ್ಯದ ಪ್ರಶ್ನೆಯಲ್ಲ, ಇದು ಯುವಕರ ಆತ್ಮವಿಶ್ವಾಸ ಮತ್ತು ಮಾನಸಿಕ ಆರೋಗ್ಯದ ಮೇಲೆ ದೊಡ್ಡ ಮಟ್ಟದ ಪೆಟ್ಟು ನೀಡುತ್ತಿದೆ" ಎಂದು ಕಳವಳ ವ್ಯಕ್ತಪಡಿಸಿದೆ.

ಚರ್ಮರೋಗ ತಜ್ಞರಾದ ಡಾ. ದಿವ್ಯಾ ಪೌಲೋಸ್ ಅವರ ಪ್ರಕಾರ, ಅಕಾಲಿಕ ಕೂದಲು ಉದುರುವಿಕೆಗೆ ಈ ಕೆಳಗಿನ ಅಂಶಗಳು ಪ್ರಮುಖ ಪ್ರಚೋದಕಗಳಾಗಿವೆ:

ಅತಿಯಾದ ಒತ್ತಡ ಮತ್ತು ನಿದ್ರೆಯ ಕೊರತೆ: ರಾತ್ರಿ ತಡವಾಗಿ ಮಲಗುವುದು ಮತ್ತು ನಿರಂತರ ಮಾನಸಿಕ ಒತ್ತಡವು ಕೂದಲಿನ ನೈಸರ್ಗಿಕ ಬೆಳವಣಿಗೆಯ ಚಕ್ರವನ್ನು (Hair Cycle) ಏರುಪೇರು ಮಾಡುತ್ತದೆ. ಇದು ಕೂದಲನ್ನು ಅವಧಿಗಿಂತ ಮುನ್ನವೇ 'ಶೆಡ್ಡಿಂಗ್ ಫೇಸ್' (ಉದುರುವ ಹಂತ) ಗೆ ತಳ್ಳುತ್ತದೆ.

ತಪ್ಪು ಆಹಾರ ಪದ್ಧತಿ (Crash Dieting): ತೂಕ ಇಳಿಸಿಕೊಳ್ಳುವ ಭರದಲ್ಲಿ ಪೌಷ್ಟಿಕಾಂಶವಿಲ್ಲದ ಆಹಾರ ಸೇವನೆ ಮಾಡುವುದರಿಂದ ಕಬ್ಬಿಣಾಂಶ (Iron), ವಿಟಮಿನ್ ಡಿ ಮತ್ತು ಬಿ12 ಕೊರತೆ ಉಂಟಾಗುತ್ತದೆ. ಇದು ಕೂದಲಿನ ಬೇರುಗಳನ್ನು ದುರ್ಬಲಗೊಳಿಸುತ್ತದೆ.

ಜಿಮ್ ಸಪ್ಲಿಮೆಂಟ್‌ಗಳು ಮತ್ತು ಪ್ರೋಟೀನ್ ಕೊರತೆ: ನೈಸರ್ಗಿಕವಲ್ಲದ ಪ್ರೋಟೀನ್ ಪೌಡರ್ ಅಥವಾ ಸರಿಯಾದ ಪೌಷ್ಟಿಕಾಂಶದ ಸಮತೋಲನವಿಲ್ಲದ ಕಠಿಣ ವ್ಯಾಯಾಮಗಳು ದೇಹದ ಮೇಲೆ ಒತ್ತಡ ಹೇರಿ ಕೂದಲು ಉದುರುವಂತೆ ಮಾಡುತ್ತವೆ.

ಧೂಮಪಾನ ಮತ್ತು ಅತಿಯಾದ ಕೆಫೀನ್: ಸಿಗರೇಟ್ ಸೇವನೆ ಮತ್ತು ದಿನಕ್ಕೆ ಹಲವಾರು ಬಾರಿ ಕಾಫಿ ಕುಡಿಯುವ ಅಭ್ಯಾಸವು ಕೂದಲಿನ ಬುಡಕ್ಕೆ ರಕ್ತ ಪರಿಚಲನೆಯನ್ನು ಕುಂಠಿತಗೊಳಿಸುತ್ತದೆ.

ರಾಸಾಯನಿಕಗಳ ಬಳಕೆ: ಪದೇ ಪದೇ ಹೇರ್ ಸ್ಟೈಲಿಂಗ್ ಮಾಡುವುದು, ಕೆಮಿಕಲ್ ಯುಕ್ತ ಜೆಲ್ ಬಳಕೆ ಮತ್ತು ಕೃತಕ ಉತ್ಪನ್ನಗಳ ಅತಿಯಾದ ಬಳಕೆಯಿಂದ ನೆತ್ತಿಯ (Scalp) ಆರೋಗ್ಯ ಹದಗೆಡುತ್ತಿದೆ.

"ನಮ್ಮ ದೇಹದ ಒಳಗೆ ಏನೋ ತಪ್ಪಾಗುತ್ತಿದೆ ಎಂಬುದಕ್ಕೆ ಕೂದಲು ಮೊದಲ ಸಂಕೇತ ನೀಡುತ್ತದೆ" ಎನ್ನುತ್ತಾರೆ ತಜ್ಞರು. ಆದರೆ ಯುವಕರು ಆರಂಭಿಕ ಹಂತದಲ್ಲಿ ಇದನ್ನು ನಿರ್ಲಕ್ಷಿಸುತ್ತಾರೆ. ಕೂದಲು ವಿಪರೀತವಾಗಿ ಉದುರಿ ತಲೆ ಕಾಣಿಸತೊಡಗಿದಾಗ ಮಾತ್ರ ಪರಿಹಾರ ಹುಡುಕಲು ಹೋಗುತ್ತಾರೆ. ಈ ವಿಳಂಬದಿಂದಾಗಿ ಕೂದಲನ್ನು ಮತ್ತೆ ಪಡೆಯುವುದು (Reversal) ಕಷ್ಟವಾಗುತ್ತದೆ.

ಅದೃಷ್ಟವಶಾತ್, ಜೀವನಶೈಲಿಯಿಂದ ಉಂಟಾಗುವ ಕೂದಲು ಉದುರುವಿಕೆಯನ್ನು ಸರಿಪಡಿಸಲು ಸಾಧ್ಯವಿದೆ. ತಜ್ಞರು ಸೂಚಿಸುವ ಸರಳ ಕ್ರಮಗಳು ಇಲ್ಲಿವೆ.

ಸರಿಯಾದ ನಿದ್ರೆ: ದಿನಕ್ಕೆ ಕನಿಷ್ಠ 7-8 ಗಂಟೆಗಳ ಕಾಲ ಗುಣಮಟ್ಟದ ನಿದ್ರೆ ಅಗತ್ಯ.

ಸಮತೋಲಿತ ಆಹಾರ: ಹಸಿರು ಸೊಪ್ಪು, ಮೊಳಕೆ ಕಾಳುಗಳು ಮತ್ತು ಪ್ರೋಟೀನ್ ಯುಕ್ತ ಆಹಾರ ಸೇವಿಸಿ.

ಒತ್ತಡ ನಿರ್ವಹಣೆ: ಯೋಗ ಅಥವಾ ಧ್ಯಾನದ ಮೂಲಕ ಮಾನಸಿಕ ಶಾಂತಿ ಕಾಪಾಡಿಕೊಳ್ಳಿ.

ವೈದ್ಯರ ಸಲಹೆ: ಮನೆಯಲ್ಲೇ ಸಿಗುವ ಶಾಂಪೂ ಅಥವಾ ಎಣ್ಣೆಗಳ ಮೇಲೆ ಅವಲಂಬಿತರಾಗುವ ಬದಲು, ಆರಂಭಿಕ ಹಂತದಲ್ಲೇ ತಜ್ಞ ವೈದ್ಯರನ್ನು (Dermatologist) ಭೇಟಿ ಮಾಡಿ.

ನೆನಪಿಡಿ: ಕೂದಲು ಉದುರುವಿಕೆ ಕೇವಲ ಶಾಂಪೂ ಅಥವಾ ಎಣ್ಣೆಯಿಂದ ನಿಲ್ಲುವ ಸಮಸ್ಯೆಯಲ್ಲ, ಅದು ನಿಮ್ಮ ಜೀವನಶೈಲಿಯ ಕನ್ನಡಿ. ನೀವು ಸರಿಯಾಗಿ ಬದುಕಿದರೆ, ನಿಮ್ಮ ಕೂದಲು ಕೂಡ ಆರೋಗ್ಯವಾಗಿರುತ್ತದೆ,(ಏಜೆನ್ಸೀಸ್​).