ಬೇಸಿಗೆಯಲ್ಲಿ ಕೊಬ್ಬರಿ ಎಣ್ಣೆ, ಹರಳೆಣ್ಣೆ ಬದಲಾಗಿ ತಲೆಯ ಕೂದಲಿಗೆ ಯಾವ ಎಣ್ಣೆ ಹಚ್ಚೋದು ಬೆಸ್ಟ್​? ಇಲ್ಲಿದೆ ಉಪಯುಕ್ತ ಮಾಹಿತಿ... Hair Oil

Hair Oil : ಫೆಬ್ರವರಿಯಿಂದಲೇ ಸೂರ್ಯನ ಶಾಖ ನೆತ್ತಿಯನ್ನು ಸುಡುವಂತೆ ಮಾಡುತ್ತಿದೆ. ಬಿಸಲಿನಲ್ಲಿ  ಚರ್ಮ, ಕೂದಲು ಇಡೀ ದೇಹವನ್ನೇ ಆರೋಗ್ಯಕರವಾಗಿ ನೋಡಿಕೊಳ್ಳೋದು ಅವಶ್ಯಕ.  ಅದರಲ್ಲೂ, ಹೆಣ್ಣು ಮಕ್ಕಳು ಹೆಚ್ಚು ಒತ್ತು ಕೊಡೋದು ಕೂದಲಿಗೆ. ಹೀಗಾಗಿ ಅವುಗಳ ಪೋಷಣೆ ಅಗತ್ಯ.  ಕೂದಲನ್ನು ಪೋಷಿಸಿಕೊಳ್ಳಲು ರೀಲ್ಸ್, ಯೂಟ್ಯೂಬ್​ನಲ್ಲಿ ಕಾಣುವ ಎಲ್ಲ ಟಿಪ್ಸ್ ಪಡೆದುಕೊಂಡು ಇನ್ನಷ್ಟು ಕೂದಲು ಹಾಳು ಮಾಡಿಕೊಂಡು ಬಿಡುತ್ತಾರೆ. ಆದರೆ, ಈ ಬೇಸಿಗೆಯಲ್ಲಿ  ತಜ್ಱ ವೈದ್ಯರ ಸಲಹೆ ಮೇರೆಗೆ ರೋಸ್​ಮರಿ, ಭೃಂಗರಾಜ ಸೇರಿದಂತೆ ಯಾವ ಎಣ್ಣೆ ಬಳಕೆ ಒಳ್ಳೆಯದು ಯಾವುದು ಬೇಡ ಎಂಬ ಬಗ್ಗೆ ಮಾಹಿತಿ ಈ ಲೇಖನದಲ್ಲಿ ಇದೆ.

ಬೇಸಿಗೆಯ ತಾಪಕ್ಕೆ ಬೆವರುವುದು, ಕೂದಲ ತುದಿ ಸೀಳುವುದು, ಒಣಗುವುದು, ಕೂದಲಿನ ಮೇಲೆ ಕೂರುವ ಧೂಳು ತುರಿಕೆ ಸೇರಿ ಹಲವು ಸಮಸ್ಯೆಗೆ ಎಡೆ ಮಾಡಿಕೊಡುತ್ತದೆ. ಈ ಸಮಯದಲ್ಲಿ  ಕೂದಲಿಗೆ ಯಾವ್ಯಾವುದೋ ಎಣ್ಣೆಯನ್ನು ಹಚ್ಚಬಾರದು. ಅದರಲ್ಲು ಜಿಡ್ಡಿನಂತಹ ಎಣ್ಣೆಯೂ ಕೂದಲಿನ ಎಣ್ಣೆ ಅಂದ ಹಾಳು ಮಾಡುತ್ತವೆ. ಜೊತೆಗೆ   ಧೂಳನ್ನು ಹಿಡಿದಿಟ್ಟುಕೊಂಡು ತುರಿಕೆ, ಹೊಟ್ಟು, ಕೂದಲು ಉದುರುವಿಕೆ ಸಮಸ್ಯೆಗಳು ಉದ್ಭವಿಸುವಂತೆ ಮಾಡುತ್ತದೆ.

ಹರಳೆಣ್ಣೆ ಬೇಸಿಗೆಯಲ್ಲಿ ಬೆವರು ಮತ್ತು ಶಾಖವನ್ನು ಹಿಡಿದಿಟ್ಟುಕೊಳ್ಳುವುದರಿಂದ ಇದರ ಬಳಕೆ ಅಷ್ಟು ಸೂಕ್ತವಲ್ಲ. ಇದು ಅನಾದಿ ಕಾಲದಿಂದಲೂ ಬಳಕೆ ಮಾಡುತ್ತಿರುವುದಾದರೂ ಸಹ ಬೇಸಿಗೆಯಲ್ಲಿ ಕೂದಲು ಉದುರುವಿಕೆಯನ್ನು ಹೆಚ್ಚಿಸುತ್ತದೆ ಎನ್ನುತ್ತಾರೆ ವೈದ್ಯರು. ಇದರ ಜೊತೆಗೆ ಸಾಸಿವ್​ ಎಣ್ಣೆ, ಆಲಿವ್​ ಎಣ್ಣೆ, ತೆಂಗಿನ ಎಣ್ಣೆ, ಎಳ್ಳೆಣ್ಣೆಯನ್ನು ಬೇಸಿಗೆ ಮುಗಿಯೋ ತನಕ ಮುಟ್ಟಲೇ ಬೇಡಿ ಎನ್ನುತ್ತಾರೆ ವೈದ್ಯರು.

ರೋಸ್ಮೆರಿ ಕೂದಲ ಬೆಳವಣಿಗೆಗೆ ಬಲವಾದ ಬೆಂಬಲವನ್ನು ನೀಡುತ್ತದೆ. ಇದು ಕೂದಲನ್ನು ಆಳವಾಗಿ ಪೋಷಿಸುತ್ತದೆ. ಇದು ಭವಿಷ್ಯದಲ್ಲಿ ಕೂದಲ ಬೆಳವಣಿಗೆಗೆ ಸಹಕಾರಿ. ಆದರೆ ಈ ಎಣ್ಣೆಯನ್ನು ಎಂದಿಗೂ ನೇರವಾಗಿ ತಲೆಗೆ ಹಚ್ಚಿಕೊಳ್ಳಬಾರದು. ರೋಸ್ಮೆರಿ ಜೊತೆಗೆ ಹಗುರವಾದ ಎಣ್ಣೆ ಮಿಕ್ಸ್​ ಮಾಡಿ ಹಚ್ಚುವುದು ಸರಿಯಾದ ವಿಧಾನ ಎನ್ನುತ್ತಾರೆ ತಜ್ಱ ವೈದ್ಯರು.

ತಲೆಬುರುಡೆಯಲ್ಲಿ ರಕ್ತಪರಿಚಲನೆಗೆ ಭೃಂಗರಾಜ ರಾಮಬಾಣ. ಇದು ಕೂದಲನ್ನು ಬೇರಿನಿಂದ ಬಲಪಡಿಸುತ್ತದೆ.  ಕೂದಲು ಉದುರುವಿಕೆ ಕಡಿಮೆ ಮಾಡುತ್ತದೆ. ಇದನ್ನು ಗಿಡಮೂಲಿಕೆಗಳ ರಾಜ ಎಂತಲೂ ಕರೆಯಲಾಗುತ್ತದೆ. ತಲೆ ಹೊಟ್ಟು ಕಡಿಮೆ ಮಾಡುತ್ತದೆ. ಬಿಳಿ ಕೂದಲು ಹೆಚ್ಚಾಗುವುದನ್ನು ತಡೆ ಹಿಡಿಯುತ್ತದೆ.  ಭೃಂಗರಾಜ ತೈಲವು ಆಂಟಿ ಫಂಗಲ್​ ಎಂಬ ಗುಣವನ್ನು ಹೊಂದಿದೆ. 

ಇನ್ನು ನೆಲ್ಲಿಕಾಯಿ ಎಣ್ಣೆಯೂ ನೆತ್ತಿಯ ಆರೋಗ್ಯ ಮತ್ತು ಕೂದಲಿನ ಬೆಳವಣಿಗೆಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ.  ಇದರಲ್ಲಿ ವಿಟಮಿನ್​ ಸಿ ಮತ್ತು ಆಂಟಿ ಆಕ್ಸಿಡೆಂಟ್​ನಂತಹ ಅಂಶ ಇರುವ ಕಾರಣ ಇದು ಕೂದಲು ಕಂದು ಬಣ್ಣಕ್ಕೆ ತಿರುಗುವುದು, ಉದುರುವುದು, ಹೊಟ್ಟಿನ ಸಮಸ್ಯೆ ಬರದಂತೆ ಪೋಷಿಸುತ್ತದೆ. ಇದರ ಜೊತೆಗೆ ಜಜೋಬಾ ಮತ್ತು ಆರ್ಗಾನ್​ ಎಣ್ಣೆ ನೆತ್ತಿಯ ಚರ್ಮ ಆರೋಗ್ಯಕ್ಕೆ ಉಪಯುಕ್ತ, (ಏಜನ್ಸೀಸ್).