ಇನ್​ಸ್ಟಾಗ್ರಾಮ್​ನಲ್ಲಿ ವೈರಲ್​ ಆಗುತ್ತಿರುವ ಹೆಡ್​ ಮಸಾಜ್​ ಕೂದಲಿಗೆ ಒಳ್ಳೆಯದೇ..? ಚರ್ಮರೋಗ ತಜ್ಞರು ಹೇಳೋದೇನು..? Scalp massage

Scalp massage: ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಜಾಲತಾಣದಲ್ಲಿ 2 ಗಂಟೆಗಳ ಕಾಲ ನೆತ್ತಿಯನ್ನು ಎಣ್ಣೆಯಿಂದ ಮಸಾಜ್ ಮಾಡುವುದರಿಂದ ನರಮಂಡಲವನ್ನು ಶಾಂತಗೊಳಿಸುವ ಮೂಲಕ ಕೂದಲುಗಳನ್ನು ಹೇರಳವಾಗಿ ಬೆಳೆಯಲು ಸಹಾಯ ಮಾಡುತ್ತದೆ ಎಂಬ ಸಂದೇಶಗಳು ರವಾನೆಯಾಗುತ್ತಲೇ ಇವೆ. ಇದು ಒಂದು ನಿರ್ದಿಷ್ಟ ಸ್ವಯಂ-ಆರೈಕೆ ಆಚರಣೆಯಾಗಿ ಪ್ರಾರಂಭವಾದದ್ದು, ಆದರೆ, ಇದೀಗ ಸಾಮಾಜಿಕ ಮಾಧ್ಯಮದ ಅತಿದೊಡ್ಡ ಕೂದಲಿನ ಪ್ರವೃತ್ತಿಗಳಲ್ಲಿ ಒಂದಾಗಿದೆ.

ನಿಮ್ಮ ನೆತ್ತಿಯನ್ನು ಮಸಾಜ್ ಮಾಡುತ್ತಾ ಗಂಟೆಗಟ್ಟಲೆ ಕಳೆಯುವುದರಿಂದ ನಿಜವಾಗಿಯೂ ಫಲಿತಾಂಶವನ್ನು ಕಾಣಬಹುದೇ? ಎಂಬ ಪ್ರಶ್ನೆಗೆ ಮುಂಬೈನ ಎಸ್‌ಎಲ್ ರಹೇಜಾ ಆಸ್ಪತ್ರೆಯ ಕನ್ಸಲ್ಟೆಂಟ್ ಡರ್ಮಟಾಲಜಿಸ್ಟ್ ಡಾ. ಶಂಕರ್ ಸಾವಂತ್ ಅವರು ಉಪಯುಕ್ತ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ವರ್ಷಗಳಿಂದ, ಕೂದಲಿನ ಆರೈಕೆಯು ಶಾಂಪೂಗಳು, ಕಂಡಿಷನರ್‌ಗಳು ಮತ್ತು ಸ್ಟೈಲಿಂಗ್ ಉತ್ಪನ್ನಗಳ ಮೇಲೆ ಸಂಪೂರ್ಣವಾಗಿ ಕೇಂದ್ರೀಕರಿಸಿದೆ. ಆದರೆ, ಚರ್ಮದ ಆರೋಗ್ಯವು ಮುಖದಿಂದ ಪ್ರಾರಂಭವಾಗುತ್ತದೆ ಎಂದು ಹಲವಾರು ಜನರು ನಂಬಿರುತ್ತಾರೆ. ಆದರೆ, ನೆತ್ತಿಯೂ ಚರ್ಮವೇ ಆದರೆ, ಇದನ್ನು ಹೆಚ್ಚಾಗಿ ನಿರ್ಲಕ್ಷಿಸಲಾಗುತ್ತದೆ. ನೆತ್ತಿ ಸ್ವಚ್ಛವಾಗಿಲ್ಲದಿದ್ದರೆ, ತಲೆಹೊಟ್ಟು, ತುರಿಕೆ, ಎಣ್ಣೆಯುಕ್ತತೆ ಮತ್ತು ಕೂದಲು ತೆಳುವಾಗುವುದು ಮುಂತಾದ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ ಎಂದು ತಿಳಿಸಿದ್ದಾರೆ.

ಈ ಎಲ್ಲಾ ಸಮಸ್ಯೆಗಳ ನಂತರ ನೆತ್ತಿಯ ಆರೈಕೆಗಳ ಬಗ್ಗೆ ಗಮನಹರಿಸಿದೆ. ಎಕ್ಸ್‌ಫೋಲಿಯೇಟರ್‌ಗಳು, ನೆತ್ತಿಯ ಸೀರಮ್‌ಗಳು, ಮಸಾಜ್ ಪರಿಕರಗಳು ಮತ್ತು ಮೈಕ್ರೋಬಯೋಮ್-ಸ್ನೇಹಿ ಚಿಕಿತ್ಸೆಗಳು ಈಗ ಮುಖ್ಯವಾಹಿನಿಯ ಕೂದಲಿನ ದಿನಚರಿಯ ಭಾಗವಾಗಿದ್ದು, ಅತಿಹೆಚ್ಚು ಜನರು ಇವುಗಳ ಕಡೆ ಗಮನಹರಿಸುತ್ತಿದ್ದಾರೆ.

ವೈರಲ್​ ಆಗುತ್ತಿರುವ ವಿಡಿಯೋಗಳಲ್ಲಿ ಸಾಮಾನ್ಯವಾಗಿ 2 ಗಂಟೆಗಳವರೆಗೆ ಬೆರಳುಗಳನ್ನು ಬಳಸಿ ನೆತ್ತಿಯನ್ನು ಮಸಾಜ್​ ಮಾಡುವುದರಿಂದ ಇದು ರಕ್ತ ಪರಿಚಲನೆ ಸುಧಾರಿಸುತ್ತದೆ. ಜೊತೆಗೆ ನರಮಂಡಲವನ್ನು ಸಡಿಲಗೊಳಿಸುತ್ತದೆ ಮತ್ತು ಪೂರ್ಣ, ಹೊಳೆಯುವ ಕೂದಲಿಗೆ ಕಾರಣವಾಗುತ್ತದೆ ಎಂದು ಹಲವರು ಹೇಳುತ್ತಾರೆ.

ಚರ್ಮರೋಗ ದೃಷ್ಟಿಕೋನದಿಂದ ನೋಡುವುದಾದರೆ, ಇದು ಅನೇಕ ಪ್ರಯೋಜನಗಳನ್ನು ಹೊಂದಿದೆ. ಮಸಾಜ್​ ರಕ್ತದ ಹರಿವನ್ನು ಸುಧಾರಿಸುವುದರ ಜೊತೆಗೆ ನೆತ್ತಿಯ ಸ್ನಾಯುಗಳನ್ನು ವಿಶ್ರಾಂತಿ ಮಾಡಲು ಸಹಾಯ ಮಾಡುತ್ತದೆ. ಇದು ನೆತ್ತಿಯ ಆರತೋಗ್ಯವನ್ನು ಬೆಂಬಲಿಸಿ, ಒತ್ತಡವನ್ನು ಕಡಿಮೆ ಮಾಡುತ್ತದೆ. ಈ ವಿಧಾನವು ಪರೋಕ್ಷವಾಗಿ ಕೂದಲಿಗೆ ಪ್ರಯೋಜನವನ್ನು ನೀಡುತ್ತದೆ. ಆದರೆ ಉದ್ದವಾಗಿರುವುದು ಸ್ವಯಂಚಾಲಿತವಾಗಿ ಉತ್ತಮ ಅಲ್ಲ ಎಂದು ವೈದ್ಯರು ಮಾಹಿತಿ ಹಂಚಿಕೊಂಡಿದ್ದಾರೆ.

ಈ ಮಸಾಜ್​ನಿಂದ ರಕ್ತ ಪರಿಚಲನೆಯು ಕೂದಲು ಕಿರುಚೀಲಗಳಿಗೆ ಆಮ್ಲಜನಕ ಮತ್ತು ಪೋಷಕಾಂಶಗಳನ್ನು ತಲುಪಿಸಲು ಸಹಾಯ ಮಾಡುತ್ತದೆ. ಇದು ನೆತ್ತಿಯ ಬಿಗಿತವನ್ನು ಕಡಿಮೆ ಮಾಡಿ, ಹೊಸ ಕೂದಲು ಬೆಳವಣಿಗೆಯನ್ನು ಉತ್ತೇಜಿಸುತ್ತದೆ.

ಕೂದಲಿನ ಬೆಳವಣಿಗೆಯು ಬಹು ಅಂಶಗಳು, ತಳಿಶಾಸ್ತ್ರ, ಹಾರ್ಮೋನುಗಳು, ಪೋಷಣೆ ಮತ್ತು ಒಟ್ಟಾರೆ ನೆತ್ತಿಯ ಸ್ಥಿತಿಯನ್ನು ಅವಲಂಬಿಸಿರುತ್ತದೆ. ಮಸಾಜ್​ ಪರಿಸರವನ್ನು ಬೆಂಬಲಿಸಬಹುದು. ಆದರೆ, ಕೂದಲನ್ನು ಬೆಳೆಸಲು ಇದೇ ಪರಿಹಾರವಲ್ಲ.

* ಭಾರವಾದ ಎಣ್ಣೆಗಳಿಂದ ನೆತ್ತಿಯನ್ನು ಮಸಾಜ್​ ಮಾಡುವುದರಿಂದ ಕೆಲವೊಮ್ಮೆ ಹಾನಿಯಾಗುವ ಸಂಭವ ಹೆಚ್ಚಾಗುತ್ತದೆ

* ದೀರ್ಘಕಾಲದವರೆಗೆ ಎಣ್ಣೆ ಹಚ್ಚುವುದರಿಂದ ಕೂದಲಿನ ಕಿರುಚೀಲಗಳು ಮುಚ್ಚಬಹುದು

* ಇದು ತಲೆಹೊಟ್ಟು ಅಥವಾ ಶಿಲೀಂಧ್ರಗಳ ಬೆಳವಣಿಗೆಯನ್ನು ಉತ್ತೇಜಿಸುತ್ತದೆ

* ಸೂಕ್ಷ್ಮ ದೇಹವನ್ನು ಹೊಂದಿರುವವರಿಗೆ ನೆತ್ತಿಯ ಕಿರಿಕಿರಿ ಹೆಚ್ಚಾಗಬಹುದು (ಏಜೆನ್ಸೀಸ್​).