ಅಪರಾತ್ರಿಯಲ್ಲಿ ಬೆತ್ತಲಾಗಿ ವಿಡಿಯೋ ಕರೆಮಾಡ್ತಾರೆ ಯುವತಿಯರು- ಎಚ್ಚರ ತಪ್ಪಿದ್ರೆ ಆಪತ್ತು ಗ್ಯಾರೆಂಟಿ!

ಗೋವಿಂದರಾಜು ಚಿನ್ನಕುರ್ಚಿ

ಬೆಂಗಳೂರು: ಅಪರಿಚಿತ ಫೇಸ್​ಬುಕ್, ವಾಟ್ಸ್​ಆಪ್ ಖಾತೆಯಿಂದ ರಾತ್ರಿ ವೇಳೆ ವಿಡಿಯೋ ಕರೆ ಬಂದರೆ ಸ್ವೀಕರಿಸುವ ಮುನ್ನ ಎಚ್ಚರ! ಅಪ್ಪಿತಪ್ಪಿ ಕರೆ ಸ್ವೀಕರಿಸಿದರೆ, ಬೆತ್ತಲಾಗಿರುವ ಹುಡುಗಿ ಜತೆ ಮಾತನಾಡುತ್ತಿರುವ ವಿಡಿಯೋ ರೆಕಾರ್ಡ್ ಆಗಿ ಬಿಡುತ್ತದೆ. ನಂತರ ಅದನ್ನು ತೋರಿಸಿ ಹಣಕ್ಕಾಗಿ ಬ್ಲ್ಯಾಕ್​ಮೇಲ್​ ಮಾಡುವ ಸಾಧ್ಯತೆ ಇದೆ.

ಸೈಬರ್ ಖದೀಮರು ದುಡ್ಡು ಮಾಡುವುದಕ್ಕೆ ಕಂಡುಕೊಂಡಿರುವ ಹೊಸ ವಿಧಾನ ಇದು. ಫೇಸ್​ಬುಕ್, ಟ್ವಿಟರ್, ಇನ್​ಸ್ಟಾಗ್ರಾಂನಲ್ಲಿ ಫ್ರೆಂಡ್ ರಿಕ್ವೆಸ್ಟ್ ಕಳುಹಿಸುತ್ತಾರೆ. ಬಳಿಕ ಸ್ನೇಹ ಬಯಸಿ ವಾಟ್ಸ್​ಆಪ್ ನಂಬರ್ ಪಡೆಯುತ್ತಾರೆ. ನಿಮಗೆ ಗೊತ್ತಿಲ್ಲದೆ ನಿಮ್ಮ ಸಾಮಾಜಿಕ ಜಾಲತಾಣದ ಖಾತೆಗಳಲ್ಲಿ ವೈಯಕ್ತಿಕ, ಸ್ನೇಹಿತರ, ಕುಟುಂಬ ಸದಸ್ಯರ ಮೊಬೈಲ್ ನಂಬರ್ ಮತ್ತು ಫೋಟೋಗಳನ್ನು ಸಂಗ್ರಹಿಸುತ್ತಾರೆ. ವಾಟ್ಸ್​ಆಪ್ ಅಥವಾ ಮೆಸೆಂಜರ್​ನಲ್ಲಿ ವಿಡಿಯೋ ಕಾಲ್ ಮಾಡಿ ಸಂಭಾಷಣೆ ನಡೆಸುತ್ತಾರೆ.

ಇದನ್ನೂ ಓದಿ:  ವಿಜೆ ಚಿತ್ರಾ ಪತಿ ಅರೆಸ್ಟ್​: ಗಂಡನ ವರ್ತನೆಗೆ ಬೇಸತ್ತು ಆತ್ಮಹತ್ಯೆ ದಾರಿ ಹಿಡಿದರಾ ಕಲಾವಿದೆ?

ಆನಂತರ ತಡರಾತ್ರಿ ವಿಡಿಯೋ ಕಾಲ್ ಮಾಡಿ ಏಕಾಏಕಿ ಬೆತ್ತಲೆ ದೃಶ್ಯವನ್ನು ತೋರಿಸುತ್ತಾರೆ. ತಕ್ಷಣ ವಿಡಿಯೋ ಕಾಲ್​ನ ಸ್ಕ್ರೀನ್ ಶಾಟ್ ಅಥವಾ ವಿಡಿಯೋ ರೆಕಾರ್ಡ್ ಮಾಡಿಕೊಳ್ಳುತ್ತಾರೆ. ಕರೆ ಸ್ವೀಕರಿಸಿದವರ ಫೊಟೋ ಜತೆಗೆ ಕರೆ ಮಾಡಿದವರ ಬೆತ್ತಲೆ ಪೋಟೋ ಸಹ ಸೆರೆಯಾಗಿರುತ್ತದೆ. ಇದನ್ನೇ ಬಂಡವಾಳ ಮಾಡಿಕೊಳ್ಳುವ ಮೋಸಗಾರರು ಕರೆ ಸ್ವೀಕರಿಸಿದ ವ್ಯಕ್ತಿಯ ವಾಟ್ಸ್​ಆಪ್​ಗೆ ಅಶ್ಲೀಲ ಫೊಟೋ ಕಳುಹಿಸಿ ಬ್ಲ್ಯಾಕ್​ಮೇಲ್​ ಮಾಡುತ್ತಾರೆ. ಫೋನ್ ಪೇ, ಗೂಗಲ್ ಪೇ ಅಥವಾ ನೆಟ್ ಬ್ಯಾಂಕಿಂಗ್​ನಲ್ಲಿ ಹಣ ಕಳುಹಿಸುವಂತೆ ಬೆದರಿಕೆ ಒಡ್ಡುತ್ತಾರೆ.

ಇದನ್ನೂ ಓದಿ: ಸಹೋದ್ಯೋಗಿಗಳ ಸ್ನಾನದ ದೃಶ್ಯವನ್ನು ಆ ನರ್ಸ್​ ಚಿತ್ರೀಕರಿಸಿ ರವಾನಿಸುತ್ತಿದ್ದುದೇಕೆ?

ಇಲ್ಲವಾದರೆ, ನಿಮ್ಮ ಸ್ನೇಹಿತರು, ಕುಟುಂಬ ಸದಸ್ಯರ ಫೇಸ್​ಬುಕ್ ಖಾತೆಗೆ ಟ್ಯಾಗ್ ಮಾಡುತ್ತೇವೆ ಅಥವಾ ವಾಟ್ಸ್​ಆಪ್​ಗೆ ಫೋಟೋ ಕಳುಹಿಸಿ ತನ್ನ ಬೆತ್ತಲೆ ದೃಶ್ಯ ನೋಡಿರುವ ಬಗ್ಗೆ ತಿಳಿಸಿ ಮರ್ಯಾದೆ ತೆಗೆಯುತ್ತೇನೆ ಎಂದು ಬ್ಲ್ಯಾಕ್​ಮೇಲ್ ಮಾಡಿ ಸುಲಿಗೆ ಮಾಡುತ್ತಾರೆ. ಇಂತಹ ಸೈಬರ್ ಬ್ಲ್ಯಾಕ್​ಮೇಲ್​ ಪ್ರಕರಣಗಳು ದಿನೇದಿನೆ ಹೆಚ್ಚಾಗುತ್ತಿವೆ. ಕೆಲವರು ಮರ್ಯಾದೆಗೆ ಅಂಜಿ ಹಣ ಕೊಟ್ಟು ಸುಮ್ಮನಾಗುತ್ತಿದ್ದಾರೆ. ಅಂತಹವರ ಬಳಿ ಮತ್ತೆ ಮತ್ತೆ ಬೆದರಿಸಿ ಸುಲಿಗೆ ಮಾಡುತ್ತಿದ್ದಾರೆ. ಇನ್ನು ಹಲವರು ಪೊಲೀಸ್ ಠಾಣೆಗೆ ದೂರು ಕೊಟ್ಟು ಆರೋಪಿಗಳ ಬಂಧನಕ್ಕೆ ಮನವಿ ಮಾಡಿದ್ದಾರೆ ಎಂದು ಸೈಬರ್ ಕ್ರೈಂ ವಿಭಾಗದ ಪೊಲೀಸರು ತಿಳಿಸಿದ್ದಾರೆ.

ಪೊಲೀಸರ ಸಲಹೆಗಳು

1 ಫೇಸ್​ಬುಕ್, ಟ್ವಿಟರ್, ಇನ್​ಸ್ಟಾಗ್ರಾಂ ಖಾತೆ ಪ್ರೊಫೈಲ್ ಲಾಕ್ ಮಾಡಿ

2 ಅಪರಿಚಿತರ ಗೆಳೆತನದಿಂದ ದೂರ ಇರುವುದು ಒಳಿತು

3 ಅನಗತ್ಯವಾಗಿ ಮೊಬೈಲ್ ನಂಬರ್, ವೈಯಕ್ತಿಕ ವಿಚಾರ ಹಂಚಿಕೊಳ್ಳಬೇಡಿ

4 ಅಪರಿಚಿತ ನಂಬರ್​ನಿಂದ ವಿಡಿಯೋ ಕಾಲ್ ಬಂದಾಗ ಎಚ್ಚರಿಕೆ ವಹಿಸಿ

5 ಅನಾಮಧೇಯ ವಿಡಿಯೋ ಕಾಲ್ ಬಂದಾಗ ಮೊಬೈಲ್ ಹಿಂಬದಿ ಕ್ಯಾಮರಾ ಆನ್ ಮಾಡಿ

6 ಜಾಲತಾಣದಲ್ಲಿ ಫೋಟೋ, ಮೊಬೈಲ್ ನಂಬರ್​ ಅಪ್​ಲೋಡ್ ಮಾಡದಿರುವುದು ಸುರಕ್ಷಿತ

7 ಅಶ್ಲೀಲ ವಿಡಿಯೋ, ಫೋಟೋ ನೋಡುವುದು, ಚಾಟಿಂಗ್​ನಿಂದ ದೂರ ಉಳಿಯಿರಿ

8 ಹಣ ವಸೂಲಿಗೆ ಬ್ಲ್ಯಾಕ್​ಮೇಲ್ ಮಾಡಿದರೆ ಸೈಬರ್ ಕ್ರೈಂ ಠಾಣೆಗೆ ದೂರು ನೀಡಿ

ಕ್ಷಣ ಕ್ಷಣದ ಸುದ್ದಿಗಳ ಅಪ್ಡೇಟ್ಸ್​ಗಾಗಿ ನಮ್ಮ ಫೇಸ್​ಬುಕ್​ ಪುಟ ಲೈಕ್ ಮಾಡಿ ಮತ್ತು ಫಾಲೋ ಮಾಡಿ..

https://www.vijayavani.net/case-registered-against-unidentified-woman-for-blackmailing-acb-inspector/