ಇಂದು ರಾತ್ರಿಯಿಂದಲೇ ಬೆಂಗಳೂರು ಸ್ತಬ್ಧ: ಲಾಕ್ ಡೌನ್ ಅವಧಿಯಲ್ಲಿ ಏನಿರುತ್ತೆ, ಏನಿರಲ್ಲ?

ಬೆಂಗಳೂರು: ಕರೊನಾ ಸೋಂಕು ನಿಯಂತ್ರಿಸಲು ರಾಜ್ಯರಾಜಧಾನಿ ಮತ್ತು ಬೆಂ. ಗ್ರಾಮಾಂತರ ಜಿಲ್ಲೆಗಳಲ್ಲಿ ಇಂದು(ಮಂಗಳವಾರ) ರಾತ್ರಿ 8ರಿಂದಲೇ ಲಾಕ್​ಡೌನ್​ ಜಾರಿಯಾಗಿದ್ದು, ಈ ಎರಡೂ ಜಿಲ್ಲೆಗಳು ಒಂದು ವಾರ ಕಂಪ್ಲೀಟ್​ ಲಾಕ್​ ಆಗಲಿದೆ.

ಜು.14ರ ರಾತ್ರಿ 8ರಿಂದ ಜು. 23ರ ಮುಂಜಾನೆ 5ರವರೆಗೆ ಬೆಂಗಳೂರು ಲಾಕ್​ ಎಂಬ ಸುದ್ದಿ ಬರುತ್ತಿದ್ದಂತೆ ಮೂರ್ನಾಲ್ಕು ದಿನಗಳಿಂದ ಬಹುತೇಕರು ಗಂಟುಮೂಟೆ ಕಟ್ಟಿಕೊಂಡು ರಾಜಧಾನಿಯನ್ನು ತೊರೆದ ದೃಶ್ಯ ಸಾಮಾನ್ಯವಾಗಿತ್ತು. ಈ ಅವಧಿಯಲ್ಲಿ ಅಗತ್ಯ ವಸ್ತುಗಳ ಪೂರೈಕೆ ಹೊರತುಪಡಿಸಿ ಉಳಿದೆಲ್ಲ ವಾಣಿಜ್ಯ ಚಟುವಟಿಕೆಗಳಿಗೂ ನಿರ್ಬಂಧ ಹೇರಲಾಗಿದೆ. ಅಗತ್ಯ ಸೇವೆಗಳಲ್ಲಿ ಕೆಲಸ ಮಾಡುವವರನ್ನು ಹೊರತುಪಡಿಸಿ ಉಳಿದವರು ಅನಾವಶ್ಯಕವಾಗಿ ರಸ್ತೆಗೆ ಬರುವಂತಿಲ್ಲ. ಒಂದು ಬೇಳೆ ಬಂದ್ರೆ ಪೊಲೀಸರು ಕೇಸ್​ ದಾಖಲಿಸ್ತಾರೆ ಜೋಕೆ!

ಇದನ್ನೂ ಓದಿರಿ ಕಲಾ ವಿಭಾಗದಲ್ಲಿ ರೈತನ ಮಗ ಕರಿಗೌಡ ದಾಸನಗೌಡ್ರ ರಾಜ್ಯಕ್ಕೆ ಟಾಪರ್​

ಒಂದು ವಾರ ಕಾಲ ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಜಿಲ್ಲೆಗಳಲ್ಲಿ ಕೆಎಸ್​ಆರ್​ಟಿಸಿ ಬಸ್​ ಸೇವೆ ಸ್ಥಗಿತಗೊಳ್ಳಲಿದೆ. ಬಿಎಂಟಿಸಿ ಬಸ್ ಕೂಡ ಸಂಚರಿಸುವುದಿಲ್ಲ. ಆಟೋ, ಆ್ಯಪ್​ ಆಧಾರಿತ ಟ್ಯಾಕ್ಸಿ ಸೇವೆಗಳೂ ಸ್ಥಗಿತಗೊಳ್ಳಲಿವೆ. ವೈದ್ಯಕಿಯ ಸಿಬ್ಬಂದಿ, ಸರ್ಕಾರಿ ಕಚೇರಿಗಳಲ್ಲಿ ಕೆಲಸ ಮಾಡುವವರು, ಆರೋಗ್ಯ ಸಂಬಂಧಿ ಕೆಲಸಕ್ಕೆ ಹೋಗುವವರು ಹಾಗೂ ಹೊರಜಿಲ್ಲೆ ಮತ್ತು ರಾಜ್ಯಗಳಿಂದ ರೈಲಿನ ಮೂಲಕ ಬರುವವರ ಸಂಚಾರಕ್ಕಾಗಿ ಬಿಎಂಟಿಸಿಯಿಂದ 134 ಬಸ್​ ಸೇವೆ ಕಲ್ಪಿಸಲಾಗಿದೆ. ಈ ಬಸ್​ಗಳು ಬೆಳಗ್ಗೆ 7ರಿಂದ ಸಂಜೆ 7ರವರೆಗೆ ಮಾತ್ರ ಸಂಚರಿಸಲಿವೆ.

ಏನಿರುತ್ತೆ?: ಅಗತ್ಯ ವಸ್ತು ಮಾರಾಟ ಮತ್ತು ಖರೀದಿಗಷ್ಟೇ ಅನುಮತಿ ನೀಡಲಾಗಿದೆ. ಉಳಿದಂತೆ ಶಾಪಿಂಗ್​ ಮಾಲ್​, ವಾಣಿಜ್ಯ ಮಳಿಗೆಗಳು, ಕಾರ್ಖಾನೆ ಸೇರಿ ಇನ್ನಿತರ ಉದ್ಯಮಗಳು ತೆರೆಯುವಂತಿಲ್ಲ. ಅಂತರರಾಜ್ಯ ಮತ್ತು ಅಂತರ ಜಿಲ್ಲಾ ಸಾರಿಗೆ ಸೇವೆ ರದ್ದಾಗಿದೆ. ಮದ್ಯ ಮಾರಾಟ ಮಾಡುವಂತಿಲ್ಲ

ಲಾಕ್​ಡೌನ್​ ಅವಧಿಯಲ್ಲಿ ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳು, ಔಷಧಾಲಯ, ಆಂಬುಲೆನ್ಸ್​, ಹಾಲು, ದಿನಪತ್ರಿಕೆ, ಪೆಟ್ರೋಲ್​ ಬಂಕ್​ ಕಾರ್ಯ ನಿರ್ವಹಿಸಲಿವೆ. ಆಹಾರ ಮಳಿಗೆಗಳು, ತರಕಾರಿ, ಮಾಂಸ, ಹಣ್ಣಿನ ಮಾರುಕಟ್ಟೆಗಳು ತೆರೆದಿರುತ್ತವೆ. ಸರಕು ಸಾಗಣೆಗೆ ಅವಕಾಶ ಇದೆ. ಪೊಲೀಸ್​, ಅಗ್ನಿಶಾಮಕ ಸೇವೆ ನಿರಂತರ. ಬ್ಯಾಂಕ್​, ಎಟಿಎಂಗಳು ತೆರೆದಿರಲಿವೆ. ಹೋಟೆಲ್​ ತೆರೆದಿರುತ್ತವೆಯಾದರೂ ಪಾರ್ಸೆಲ್​ಗಳಿಗಷ್ಟೆ ಅವಕಾಶ. ಆಹಾರ, ಔಷಧಗಳನ್ನು ಮನೆಗೆ ಡೆಲಿವರಿ ಕೊಡಲು ಅವಕಾಶವಿದೆ. ದಿನಪತ್ರಿಕೆ ಲಭ್ಯ ಇರಲಿದೆ.

ಮಂಗಳೂರು, ಶಿವಮೊಗ್ಗ ಸೇರಿ ಇನ್ನಿತರ ಜಿಲ್ಲೆಗಳಲ್ಲೂ ಲಾಕ್​ಡೌನ್​ ಮಾಡಲು ಆಯಾ ಜಿಲ್ಲಾಧಿಕಾರಿಗಳು ನಿರ್ಧರಿಸಿದ್ದಾರೆ. ಕೆಲ ಜಿಲ್ಲೆಗಳಲ್ಲಿ ಇಡೀ ದಿನ ಲಾಕ್​ಡೌನ್​ ಮಾಡದೆ ಅರ್ಧ ದಿನ ಲಾಕ್​ಡೌನ್​ ಮಾಡಲಾಗುತ್ತಿದೆ.

https://www.vijayavani.net/sex-job-with-ladies-what-happened-to-the-techie/